India US Drone Deal : భారత్‌కు 31 'ఎంక్యూ-9బీ' రకం సాయుధ డ్రోన్ల విక్రయానికి అమెరికా పచ్చజెండా ఊపింది. దాదాపు రూ.33 వేల కోట్ల ప్రతిపాదిత ఒప్పందానికి ఆమోద ముద్ర వేసింది. కాగా, గతేడాది జూన్‌లో ప్రధాని నరేంద్ర మోదీ అగ్రరాజ్యం అమెరికా పర్యటన సందర్భంగా ఈ డ్రోన్లకు ఒప్పందాన్ని ప్రకటించారు. 'రూ.33 వేల కోట్ల అంచనా వ్యయంతో ఎంక్యూ-9బీ డ్రోన్లు, సంబంధిత పరికరాలను భారత్‌కు విక్రయించేందుకు ఆమోదం తెలుపుతూ విదేశాంగ శాఖ నిర్ణయం తీసుకుంది' అని అమెరికా డిఫెన్స్ సెక్యూరిటీ కోఆపరేషన్ ఏజెన్సీ గురువారం ఓ ప్రకటనలో తెలిపింది.
ఈ ప్రతిపాదిత విక్రయం అమెరికా- భారత్‌ల మధ్య వ్యూహాత్మక సంబంధాన్ని బలోపేతం చేస్తుందని అమెరికా ఏజెన్సీ పేర్కొంది. ఇండో-పసిఫిక్‌, దక్షిణాసియాలో ప్రధాన రక్షణ భాగస్వామి భద్రతను మెరుగుపరచడానికి ఈ ఒప్పందం సాయం చేస్తుందని వివరించింది. కాగా, చట్టసభకు ఈ విషయాన్ని తెలియజేసేందుకు అవసరమైన పత్రాలను అందజేసినట్లు తెలిపింది.
యూఎస్-ఇండియా మధ్య కుదిరిన ఈ ఒప్పందం ప్రకారం భారత్‌కు రానున్న 31 డ్రోన్లను సీగార్డియన్ రకం డ్రోన్లుగా అధికారులు పేర్కొన్నారు. వీటిల్లో 15 డ్రోన్లను నౌకాదళానికి అప్పగించనున్నారు. ఆర్మీ, వాయుసేనకు ఎనిమిది చొప్పున కేటాయించనున్నారు.
అమెరికా ప్రశంస!
సాయుధ బలగాల నిఘా సామర్థ్యాలను మెరుగుపరచడానికి భారత్ ఈ డ్రోన్లను కొనుగోలు చేస్తోంది. ముఖ్యంగా చైనాతో వాస్తవ నియంత్రణ రేఖ (ఎల్‌ఓసి) వెంబడి దీర్ఘకాలికంగా నెలకొన్న సమస్యను పరిష్కరించడంలో ఈ డ్రోన్లు సహాయపడనున్నాయి. మరోవైపు భారత్ తన మిలిటరీని ఆధునీకరించడంలో భాగంగా చేస్తున్న కృషిని అమెరికా ప్రశంసించింది. ఈ డ్రోన్లను భారత్ తమ భద్రతా దళాల్లోకి చేర్చుకోవడం వల్ల చాలా వరకు ఇబ్బందులు తొలగుతాయని చెప్పింది.
డ్రోన్ ప్రత్యేకతలు!
సీగార్డియన్ డ్రోన్లను ప్రధానంగా మూడు సేవల కోసం కొనుగోలు చేస్తోంది భారత్. ఇవి సముద్రంలో నిఘా వ్యవస్థలా పనిచేయడమే కాకుండా అత్యవసర సమయాల్లో ఉపయోగపడతాయి. హై ఆల్టిట్యూడ్ లాంగ్ ఎండ్యూరెన్స్ కలిగిన ఈ డ్రోన్లు 35 గంటలకుపైగా గాలిలో ఉండగలవు. నాలుగు హెల్‌ఫైర్ క్షిపణులును, దాదాపు 450 కిలోల బాంబులను మోసుకెళ్లగలవు.
హెచ్-1బీ వీసాల జారీకి కొత్త రూల్స్!- మారిన నిబంధనలు ఇవే!
ఇక అమెరికా వీసా మరింత భారం- హెచ్1బీ సహా ఐదు కేటగిరీల ఫీజులు పెంపు
