ఉగ్రవాది నిజ్జర్‌ హత్య కేసులో ముగ్గురి అరెస్టు- భారత సంతతికి చెందిన వారే! - Nijjar Death Case

Canada Nijjar Death Case: ఖలిస్థానీ వేర్పాటువాది హర్దీప్‌ సింగ్‌ నిజ్జర్‌ హత్య కేసులో నిందితులుగా పేర్కొంటూ కెనడా పోలీసులు ముగ్గురిని అరెస్టు చేశారు. భారత సంతతికి చెందిన కరణ్‌ప్రీత్‌ సింగ్‌, కమల్‌ప్రీత్‌ సింగ్‌, కరణ్‌ బ్రార్‌లను అదుపులోకి తీసుకున్నారు.

Canada Nijjar Death Case: ఖలిస్థానీ వేర్పాటువాది హర్దీప్‌ సింగ్‌ నిజ్జర్‌ హత్య కేసులో నిందితులుగా పేర్కొంటూ శుక్రవారం కెనడా పోలీసులు ముగ్గురిని అరెస్టు చేశారు. నిజ్జర్​ను చంపడానికి భారత ప్రభుత్వం నియమించిన హిట్​ స్క్వాడ్​లో సభ్యులుగా అనుమానిస్తూ కరణ్‌ప్రీత్‌ సింగ్‌ (28), కమల్‌ప్రీత్‌ సింగ్‌ (22), కరణ్‌ బ్రార్‌ (22)లను అదుపులోకి తీసుకున్నారు. తాజాగా వారి ఫొటోలను పోలీసులు. అయితే వీరందరూ భారత సంతతికి చెందినవారని రాయల్​ కెనేడియన్ మౌంటెడ్​ పోలీసులు (ఆర్​సీఎమ్​పీ) ఓ ప్రకటనలో తెలిపారు. ఈ మేరకు మీడియాతో మాట్లాడిన ఆర్​సీఎమ్​పీ అసిస్టెంట్​ కమిషనర్ డేవిడ్ టెబౌల్​, నిజ్జర్​ హత్య దార్యాప్తు వేగంగా జరుగుతోందని వెల్లడించారు.

"నిజ్జర్​ హత్యలో ప్రమేయం ఉన్నట్లు ఆరోపణలు ఎదుర్కొంటున్న ముగ్గురు నిందితులను అరెస్టు చేసి అభియోగాలు మోపారు. అయితే సాక్ష్యాధారాల స్వభావంపై మేం ఎలాంటి వ్యాఖ్యలు చేయదలచుకోలేదు. అలాగే నిజ్జర్​ హత్య వెనుక ఉన్న ఉద్దేశం గురించి కూడా మాట్లాడలేం. ఈ విషయంలో దర్యాప్తు మాత్రం చాలా క్రియాశీలకంగా జరుగుతుందని చెప్పగలను. ఈ విషయాలపై ప్రత్యేక, విభిన్నమైన దర్యాప్తులు కొనసాగుతున్నాయి. అది ఈరోజు అరెస్టైన వ్యక్తుల ప్రమేయానికి మాత్రమే సంబంధించినది కాదు. భారత ప్రభుత్వ ప్రమేయంపై కూడా దర్యాప్తు కొనసాగుతోంది" అని డేవిడ్ టెబౌల్ తెలిపారు.

అయితే నిజ్జర్​ హత్యలో భారత ప్రభుత్వం హస్తం ఉందా లేదా అనే విషయాన్ని కెనడా పబ్లిక్​ సేఫ్టీ మినిస్టర్​ డొమినిక్ లెబ్లాంక్ నిర్ధరించలేదు. కానీ అలాంటి విషయాల్లో దర్యాప్తును ఆర్​సీఎంపీకి అప్పగించాలని చెప్పారు. "కెనడా ప్రభుత్వ భద్రతా యంత్రాంగం, RCMP, సెక్యూరిటీ ఇంటెలిజెన్స్ సర్వీస్ చేసే పనిపై నాకు పూర్తి విశ్వాసం ఉంది. ఈ పోలీసుల చర్యను బట్టి చూస్తే, ఈ కేసును ఆర్​సీఎంపీ సీరియస్​గా తీసుకున్నట్లు తెలుస్తోంది" అని డొమినిక్ అన్నారు.

ఇదిలా ఉండగా, భారత్​ ప్రమేయం ఉన్నట్లు కెనడియన్ మీడియాలో వస్తున్న ఊహాగానాలపై పోలీసులు ఎలాంటి ఆధారాలు బయటపెట్టలేదు. ఈ ఆరోపణలను భారత్​ పదే పదే ఖండిస్తోంది. వాటిని అసంబద్ధం, ఎవరో కావాలనే అలా చేస్తున్నట్లు తిప్పికొట్టింది.

ఇదీ కేసు
2023 జులై 18న బ్రిటిష్‌ కొలంబియాలోని సర్రే ప్రాంతంలో ఓ గురుద్వారా వెలుపల నిజ్జర్‌ హత్య జరిగింది. నిజ్జర్‌ హత్యలో భారత్‌ ఏజెంట్ల పాత్ర ఉందంటూ కెనడా ప్రధాని జస్టిస్‌ ట్రూడో ఆరోపించారు. దీంతో రెండు దేశాల మధ్య విభేదాలు తలెత్తాయి. అయితే కెనడా ప్రధాని ట్రూడో చేసిన ఆరోపణలను భారత్‌ ఖండించింది. ఆధారాల్లేకుండా నిందలు వేయడం తగదని గట్టిగా హెచ్చరించింది. హత్యకు సంబంధించి ఆధారాలు సమర్పిస్తే పరిశీలించి దర్యాప్తునకు సహకరించే అంశంపై నిర్ణయం తీసుకుంటామని భారత్‌ స్పష్టంగా చెప్పింది.