Joe Biden On Israel : ఇరాన్ అణు కేంద్రాలకు సంబంధించిన ప్రాంతాలపై ఇజ్రాయెల్ దాడులకు తాము మద్దతివ్వబోమని అమెరికా అధ్యక్షుడు జో బైడెన్ బుధవారం తెలిపారు. ఇరాన్పై మరిన్ని ఆంక్షలు విషయమై జీ7 దేశాలతో టెలిఫోన్లో జరిపిన చర్చల తర్వాత బైడెన్ ఈ ప్రకటన చేయడం గమనార్హం. జీ7 దేశాలు ఇరాన్పై విధించబోయే ఆంక్షల వివరాలను త్వరలో వెల్లడించవచ్చని బైడెన్ తెలిపారు. ఈ చర్చలో భాగంగా ఇజ్రాయెల్పై ఇరాన్ చేసిన క్షిపణి దాడులకు అన్ని సభ్యు దేశాలు ముక్తకంఠంతో ఖండించాయని వైట్హౌజ్ ఓ ప్రకటనలో చెప్పింది. మరోవైపు, ఇరాన్ దాడికి కచ్చితంగా ప్రతిచర్య ఉంటుందని యూఎస్ డిప్యూటీ సెక్రటరీ ఆఫ్ స్టేట్ కర్ట్ క్యాంప్బెల్ వెల్లడించారు. ఈవ విషయంలో అమెరికా, ఇజ్రాయెల్ అధికారుల చర్చలు కొనసాగుతాయన్నారు.
8మంది ఇజ్రాయెల్ సైనికులు మృతి
ఇదిలా ఉండగా, హెజ్‌బొల్లా అంతమే లక్ష్యంగా లెబనాన్‌లో ఇజ్రాయెల్ దళాలు భీకర పోరాటం చేస్తున్నాయి. దక్షిణ లెబనాన్‌లో హెజ్బొల్లాతో జరిగిన పోరులో తమ సైనికులు ఎనిమిది మంది ప్రాణాలు కోల్పోయినట్లు ఇజ్రాయెల్ ప్రకటించింది. ఒకవైపు లెబనాన్‌లో దాడులు చేస్తూనే మరోవైపు గాజా, సిరియాలపై ఇజ్రాయెల్ దళాలు విరుచుకుపడ్డాయి. శత్రు స్థావరాలు లక్ష్యంగా ఈ రెండు ప్రాంతాల్లో ఇజ్రాయెల్ సైన్యం వైమానిక దాడులు చేశాయి.
UN సెక్రటరీ జనరల్కు ఇజ్రాయెల్ నో ఎంట్రీ
మరోవైపు, ఇరాన్ దాడిని ఖండించని కారణంగా ఐరాస సెక్రటరీ జనరల్ ఆంటోనియో గుటెరస్‌ను తమ దేశంలోకి ప్రవేశించకుండా నిషేధిస్తున్నట్లు ఇజ్రాయెల్ ప్రకటించింది. తమ దేశానికి గుటెరస్ వ్యతిరేకంగా ఉన్నారని ఆరోపించింది. దీనిపై ఐక్యరాజ్యసమితి స్పందించింది. తాము ఇజ్రాయెల్తో కాంటాక్ట్లో ఉంటామని, అది బాధ్యత అని చెప్పింది. ఇజ్రాయెల్ ఆరోపణలను ఆ దేశం అంతర్జాతీయ సంస్థ సిబ్బందిపై చేసిన మరో దాడిగా ఐరాస ప్రతినిధి స్టీఫెన్ డుజారిక్ అన్నారు.
నస్రల్లా అల్లుడు మృతి
సిరియాలోని డమాస్కస్‌లోని మజ్జే జిల్లాలో నివాస భవనాలే లక్ష్యంగా ఇజ్రాయెల్ జరిపిన దాడుల్లో మృతిచెందిన ఇద్దరు లెబనాన్‌లు మృతి చెందారు. వారితో పాటు హసన్‌ నస్రల్లా అల్లుడు హసన్‌ జాఫర్‌ అల్‌- ఖాసిర్‌ సైతం మరణించినట్లు సిరియాన్‌ మానవ హక్కుల అబ్జర్వేటరీ తెలిపింది. ఇక, హెజ్‌బొల్లాకు చెందిన ఓ మీడియా కూడా దీన్ని ధ్రువీకరించింది. గత వారం బీరుట్‌లో జరిగిన దాడుల్లో హెజ్‌బొల్లా అధిపతి హసన్‌ నస్రల్లా మృతి చెందారు. ఈ దాడుల్లోనే ఆయన కుమార్తె సైతం మృతి చెందినట్లు వార్తలు వచ్చాయి.
