America Elections 2024 : డెమోక్రటిక్‌ పార్టీ తరఫున అమెరికా అధ్యక్ష అభ్యర్థిత్వ రేసులో ఉన్న జో బైడెన్ తొలి విజయాన్ని నమోదు చేశారు. దక్షిణ కరోలినా ప్రైమరీలో మిన్నెసొటా ప్రతినిధి డీన్‌ ఫిలిప్స్‌, రచయిత మెరియన్ విలియమ్సన్‌పై ఆయన ఘన విజయం సాధించారు. ఈ సందర్భంగా మాట్లాడిన బైడెన్, 2020లో అందరి అంచనాలను తలకిందులు చేస్తూ దక్షిణ కరోలినా ఓటర్లు తన విజయానికి బాటలు వేశారని పేర్కొన్నారు. 2024లోనూ ఇదే తరహా ఫలితాలు పునరావృతం అవుతాయని ఆశాభావం వ్యక్తం చేశారు. రిపబ్లికన్ పార్టీ తరఫున అధ్యక్ష రేసులో ఉన్న అభ్యర్థి డొనాల్డ్ ట్రంప్‌నకు ఓటమి తప్పదని అన్నారు. కాగా, ఇప్పటికే న్యూ హాంప్‌షైర్ రిపబ్లికన్ ప్రెసిడెంట్ ప్రైమరీలో ప్రత్యర్థి నిక్కీ హేలీపై డొనాల్డ్ ట్రంప్ గెలుపొందారు.
"2020లో దక్షిణ కరోలినా ప్రజలు తప్పు చేశారని నిరూపించారు. ఇప్పుడు వీరు అందించిన విజయం మా ప్రచారానికి కొత్త ఊపిరి పోసింది. నేను విజయం దిశగా వెళ్లేందుకు ఈ ప్రాంతం ఓటర్లంతా ఏకతాటిపైకి వచ్చారు. రానున్న ఎన్నికల్లో డొనాల్డ్ ట్రంప్ను ఓడించి నన్ను మళ్లీ అధ్యక్షుడిగా మీరు చూడాలనుకుంటున్నారన్న విషయం నాకు స్పష్టంగా అర్థమవుతోంది. దీంట్లో ఎటువంటి సందేహం లేదు"
--జో బైడెన్, అధ్యక్షుడు
బైడెన్ విక్టరీకి వీరే కారణం!
తాజాగా జరిగిన సౌత్ కరోలినా ప్రైమరీలో బైడెన్ గెలవబోతున్నట్లుగా పలు మీడియా సంస్థలు ఇదివరకే జోస్యం చెప్పాయి. దక్షిణ కరోలినా ప్రాంతాన్ని రిపబ్లికన్లకు కంచుకోటగా చెబుతారు. ఇక్కడ నాలుగింట ఒకవంతు నల్లజాతీయులే ఉంటారు. ప్రస్తుత లెక్కల ప్రకారం ఇక్కడ 26 శాతం మంది నల్లజాతికి చెందిన ఓటర్లు ఉన్నారు. కాగా, దేశం మొత్తం ఓటర్లలో వీరి వాటా 11 శాతం. గత ఎన్నికల్లో ప్రతీ 10 మంది నల్లజాతీయుల్లో 9 మంది ప్రస్తుత అధ్యక్షుడు జో బైడెన్‌కే జై కొట్టారని ఏపీ ఓట్‌క్యాస్ట్‌ సర్వేలో తేలింది. తాజాగా జరిగిన ప్రైమరీలోనూ బైడెన్ గెలవడానికి వీరే కారణం కావచ్చని విశ్లేషకులు అభిప్రాయపడుతున్నారు. ఫిబ్రవరి 6న నెవాడాలో, ఫిబ్రవరి 27న మిషిగన్‌, మార్చి 5న పలు రాష్ట్రాల్లో డెమోక్రటిక్‌ పార్టీ ప్రైమరీలు జరగనున్నాయి.
అమెరికా రివెంజ్! ఇరాక్, సిరియాలోపై యుద్ధ విమానాలతో దాడి
'దాడులు ఆపకపోతే తీవ్ర పరిణామాలు'- హౌతీ స్థావరాలపై విరుచుకుపడ్డ అమెరికా
