When Should ORS be Given to Children: వర్షాకాలంలో వచ్చే వ్యాధుల్లో అతిసారం ఒకటి. దీన్నే డయేరియా అని కూడా అంటారు. పిల్లల్లో మరణాలకు ఇది ప్రధాన కారణం. ప్రపంచ ఆరోగ్య సంస్థ ప్రకారం మూడు లేక అంతకంటే ఎక్కువసార్లు విరేచనాలు వస్తే అతిసారంగా భావిస్తారు. అయితే ఎక్కువ సార్లు విరేచనాలు అయినా, వాంతులు అయినా చాలా మంది తల్లిదండ్రులు తమ పిల్లలకు ఓఆర్ఎస్ (ఓరల్ రీ హైడ్రేషన్ సొల్యూషన్) ఇస్తుంటారు. కొద్దిమంది చాలా మొత్తంలో పిల్లల చేత బలవంతంగా అయినా తాగిస్తుంటారు. అసలు పిల్లలకు ఓఆర్ఎస్ ఇవ్వొచ్చా? ఇస్తే ఎంత మేర ఇవ్వాలి? అనే సందేహాం చాలా మందికి ఉంటుంది. అయితే ఈ ప్రశ్నలకు సమాధానాలను ప్రముఖ పిడియాట్రిషిన్ 'డాక్టర్ రమేష్ దాసరి' అందిస్తున్నారు. ఆ వివరాలు మీ కోసం..
డీహైడ్రేషన్: సాధారణంగా చిన్నపిల్లల్లో డయేరియా, వాంతుల సమస్యలు ఎక్కువగా ఉంటాయి. వీటి కారణంగా చాలా మంది పిల్లలు డీహైడ్రేషన్కు గురవుతుంటారు. డీహైడ్రేషన్ అంటే శరీరంలోని నీరు బాగా క్షీణించిపోవడం. శరీరంలోకి వెళ్లే నీటి కన్నా బయటకు వెళ్లే వాటర్ ఎక్కువున్నప్పుడు ఇటువంటి పరిస్థితి ఏర్పడుతుంది. ఇక డీహైడ్రేషన్ లక్షణాలు చూస్తే..
ప్రధాన లక్షణాలివీ..
- నీళ్లు తాగినా కూడా తరచూ ఎక్కువ నీరు తాగాలనిపిస్తుంది.
- డీహైడ్రేషన్కు గురైతే మూత్రం చిక్కగా పసుపు రంగులో వస్తుంది.
- పిల్లల్లో నిస్సత్తువ, నోరు పొడిబారడం, శరీరమంతా వేడిగా ఉండడం వంటి లక్షణాలు డీహైడ్రేషన్ సమస్యని సూచిస్తాయి.
- చిన్న పిల్లలు తల్లి దగ్గర పాలు తాగినా ఏడుస్తున్నా, రోజుకి ఏడు లేదా ఎనిమిది సార్ల కంటే తక్కువసార్లు మూత్రవిసర్జన చేస్తున్నా తల్లిపాలు సరిపోక డీహైడ్రేషన్కు గురయ్యారని గ్రహించాలి.
ఓఆర్ఎస్ ద్రావణం ఎప్పుడు ఇవ్వాలి: పిల్లల్లో విపరీతమైన వాంతులు, నీళ్ల విరేచనాలు అవుతున్నప్పుడు వాళ్ల శరీరంలో నుంచి పోతున్న నీళ్లని రీప్లెస్ చేయడానికి ఓఆర్ఎస్ ద్రావణం ఎంతగానో ఉపయోగపడుతుందని అంటున్నారు. అయితే ఈ ద్రావణాన్ని డాక్టర్ల సలహా మేరకే ఇవ్వాలని డాక్టర్ రమేష్ అంటున్నారు. ఆయన చెప్పిన వివరాల ప్రకారం..
- శిశువులకు తప్పనిసరిగా తల్లిపాలు ఇవ్వాలి.
- ఇక 10 కేజీల లోపు బరువున్న పిల్లలకు విరేచనాలు/వాంతులు అయిన ప్రతిసారీ 50 ml ఓఆర్ఎస్ ఇవ్వాలంటున్నారు.
- 10 కేజీలకు పైగా బరువున్న పిల్లలకు విరేచనాలు/వాంతులు అయిన ప్రతిసారీ 100 ml ఓఆర్ఎస్ ఇవ్వాలి. అయితే ఈ మొత్తాన్ని ఒకేసారి తాగించకుండా మెల్లిగా తాగించాలని సూచిస్తున్నారు.
పిల్లలకు ఓఆర్ఎస్ ఎప్పుడు ఇవ్వకూడదు: ఓఆర్ఎస్ మంచిది కదా అని దానిని పిల్లలకు అదేపనిగా ఇవ్వొద్దని అంటున్నారు. ముఖ్యంగా ఇటువంటి సందర్భాల్లో అసలు ఇవ్వకూడదని చెబుతున్నారు.
- పిల్లల్లో కొన్నిసార్లు అదేపనిగా వాంతులు అవుతుంటాయి. అంటే ఏది తిన్నా లేదా తాగినా వెంటనే వాంతుల రూపంలో బయటికి వస్తుంటాయి. ఇటువంటి సమయంలో బలవంతంగా ఓఆర్ఎస్ తాగించకూడదని అంటున్నారు.
- అలాగే ఆకుపచ్చ రంగులో వాంతులు అవుతున్నప్పుడు కూడా ఓఆర్ఎస్ ఇవ్వకూడదని డాక్టర్ రమేష్ పేర్కొన్నారు.
- పిల్లలు కొన్ని సార్లు డీహైడ్రేషన్ కారణంగా సృహ తప్పుతుంటారు. అలాంటి పరిస్థితుల్లో కూడా బలవంతంగా ఓఆర్ఎస్ తాగించకూడదని అంటున్నారు.
ఇంట్లోనూ ఓఆర్ఎస్ ద్రావణం చేసుకోవచ్చు?: బయట మార్కెట్లో ఓఆర్ఎస్ ప్యాకెట్లు విరివిగా దొరుకుతాయి. వీటిని ఉపయోగించవచ్చు. అయితే ఓఆర్ఎస్ పేరుతో ఫ్లేవర్డ్ డ్రింక్స్ అందుబాటులో ఉంటాయి. వాటిని పిల్లలకు తాగించకూడదు. ఒకవేళ ఓఆర్ఎస్ ప్యాకెట్లు అందుబాటులో లేకపోతే ఇంట్లోనే ఓఆర్ఎస్ ద్రావణాన్ని ప్రిపేర్ చేసుకోవచ్చంటున్నారు. దీనికోసం లీటర్ కాచి చల్లార్చిన నీటిలో 6 స్పూన్ల చక్కెర, అర స్పూన్ ఉప్పు వేసి పూర్తిగా కరిగే వరకు కలిపితే ఓఆర్ఎస్ లిక్విడ్ రెడీ అవుతుంది. ఈ ద్రావణాన్ని 24 గంటల్లోపు వాడాలి. ఇలా కాకపోయినా మజ్జిగలో కాస్తా ఉప్పు వేసుకుని తాగినా ఫలితం ఉంటుందని డాక్టర్ రమేష్ అంటున్నారు.
"కొంతమంది అవసరం లేకున్నా కూడా పిల్లలకు ఓఆర్ఎస్ ఇవ్వొచ్చా ? అని అడుగుతుంటారు. మామూలుగా ఉండే పిల్లలకు ఓఆర్ఎస్ ఇవ్వాల్సిన అవసరం లేదు. ఎందుకంటే ఇందులో సోడియం, పొటాషియం, బైకార్బోనేట్స్, సిట్రిక్ యాసిడ్స్ ఉంటాయి. ఇవి పిల్లల ఆరోగ్యంపై ప్రతికూల ప్రభావాన్ని చూపిస్తాయి. కాబట్టి, అవసరం లేనప్పుడు ఓఆర్ఎస్ ద్రావణం వాడకూడదు."-డాక్టర్ రమేష్ దాసరి
NOTE: ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
ఇవి కూాడా చదవండి :
మీ పిల్లలను దగ్గు బాధిస్తోందా? - ఈ తియ్యని ఆయుర్వేద ఔషధంతో వెంటనే తగ్గిపోతుంది!
చలికాలంలో పిల్లలకు న్యూమోనియా ప్రమాదం - ఇలా చేయండి - లేకపోతే ఇబ్బందే!
