ఈ వ్యాధి వస్తే ఎముకలు వట్టిగానే విరిగిపోతాయి - జాగ్రత్తలు తీసుకోకుంటే అంతే!

How to Prevent Osteoporosis : మనం ఆరోగ్యంగా ఉండటంలో ఎముకల పాత్ర ఏంటన్నది చెప్పాల్సిన పనిలేదు. అయితే.. వయసు పెరిగేకొద్దీ ఎముకలు బలహీనమవ్వడం సహజం. ఆస్టియోపోరోసిస్ సమస్య కారణంగా బోన్స్ మరింత వీక్ అవుతాయి. దీన్నే బోలు ఎముకల వ్యాధి అంటారు. ఆ వివరాలేంటో ఈ స్టోరీలో చూద్దాం..

How to Prevent Osteoporosis: సాధారణంగా వయసు పెరిగే కొద్దీ ఎముకలకు సంబంధించిన సమస్యలు పెరుగుతుంటాయి. చిన్న తనంలో కూడా కొన్ని రకాల ఎముకల వ్యాధులు తలెత్తుతాయి. అందులో బోలు ఎముకల వ్యాధి ఒకటి. అసలు ఈ వ్యాధి అంటే ఏమిటి..? ఏ వయసు వారికి వస్తుంది..? తీసుకోవాల్సిన జాగ్రత్తల గురించి నిపుణులు ఏం చెబుతున్నారు? అన్నది ఈ స్టోరీలో చూద్దాం.

బోలు ఎముకల వ్యాధి: ఎముకల సాంద్రత తగ్గుతుంది. ఎముకల కణజాలం దెబ్బతిని.. వాటి ఆరోగ్యం క్షీణించడం వల్ల ఎముకల్లో పగుళ్ల సమస్య ఏర్పడుతుంది. ఈ పరిస్థితిని బోలు ఎముకల వ్యాధి అంటారు. ఇది సైలెంట్​ కిల్లర్​. ఎముకలు విరిగేంత వరకూ ఎలాంటి లక్షణాలూ లేకుండా ఈ వ్యాధి అభివృద్ధి చెందుతుంది.

ఎవరికొస్తుంది..: ఈ సమస్య వయసు పెరిగిన వారిలో, మెనోపాజ్‌లో ఉన్న మహిళలకి వచ్చే అవకాశం ఉంది. మగవారిలో వయసు పెరిగే కొద్దీ సమస్య ఉంటుంది. రెగ్యులర్‌గా పగుళ్లు, ముఖ్యంగా వెన్నెముక, మణికట్టు, తుంటి, ఇతర బరువు మోసే ఎముకల్లో పగుళ్లు వచ్చే ప్రమాదం పెరుగుతుంది. వయసు మళ్లిన వారిలో ఇవి ఎక్కువగా ఉంటాయి.

వయసుల వారీగా తీసుకోవాల్సిన జాగ్రత్తలు :

బాల్యం : ఎముక ఆరోగ్యానికి బలమైన పునాది బాల్యం, కౌమారదశలో పడుతుంది. ఈ వయసులో పాల ఉత్పత్తులు, ఆకు కూరలు, బలవర్ధకమైన ఆహారాలు, గింజలు వంటి కాల్షియం అధికంగా లభించే ఆహారాన్ని తీసుకోవడం చాలా ముఖ్యం. ముఖ్యంగా.. సూర్యకాంతి నుంచి లభించే విటమిన్ డి.. కాల్షియం చాలా ముఖ్యం. ఈ వయసులో రన్నింగ్, స్పోర్ట్స్ వంటి కార్యకలాపాలలో పాల్గొనడం వల్ల ఎముకలు ధృడంగా అభివృద్ధి చెందుతాయి.

యుక్త వయస్సు: యుక్త వయస్సులోకి ప్రవేశించినప్పుడు.. కాల్షియం కోసం సమతుల ఆహారాన్ని తీసుకోవడం చాలా ముఖ్యమైనది. సరిపడా బరువు మెయింటైన్​ చేసేందుకు వ్యాయామాలు, బోన్స్​ స్ట్రాంగ్​గా ఉండేందుకు ఎక్సర్​సైజస్​ రెగ్యులర్​గా చేయాలి. అలాగే స్మోకింగ్​ అండ్​ డ్రింకింగ్​ మానేయడం చాలా ముఖ్యం. ఎందుకంటే ఈ అలవాట్లు ఎముక ఆరోగ్యానికి హాని కలిగిస్తాయి.

మధ్య వయసు: మధ్య వయసులో హార్మోన్ల మార్పులు, ముఖ్యంగా మెనోపాజ్‌లో ఉన్న మహిళల్లో, ఎముకల ఆరోగ్యంపై ప్రభావం చూపుతుంది. దీనికి నివారణగా హార్మోన్లు బ్యాలెన్స్​గా ఉంచుకునేందుకు సరిపడా ఆహారం, చిన్న చిన్న వ్యాయామాలు చేయడం మంచిది. అలానే డాక్టర్లను సంప్రదించి సరైన చికిత్స తీసుకోవడం ముఖ్యం.

వృద్ధులు: ఇక ఈ సమస్య ఈ వయసు వారిలో ఎక్కువగా ఉంటుంది. ఈ ఏజ్​లో ఎముకల బలాన్ని కాపాడుకోవడం ముఖ్యం. ఇందుకోసం చిన్న చిన్న వ్యాయామాలు చేయడం మంచిది. అలాగే రెగ్యులర్​గా హెల్త్​ చెకప్​లు చేయించుకోని తగిన జాగ్రత్తలు తీసుకోవడం కీలకం.

ఇక చివరగా.. బోలు ఎముకల వ్యాధిని నివారించాలంటే.. బాల్యం నుంచే సరైన జాగ్రత్తలు తీసుకోవాలి. సమతుల్య ఆహారం, క్రమం తప్పకుండా వ్యాయామాల ద్వారా బోలు ఎముకల వ్యాధి ప్రమాదాన్ని గణనీయంగా తగ్గించవచ్చు.