ఆపిల్ పండుపై స్టిక్కర్ ఎందుకంటే!- సీక్రెట్​ కోడ్ ఏంటో తెలుసా? - STICKERS ON fruits

Stickers On Fruits : పండ్లు కొనడానికి మార్కెట్​ వెళ్తున్నారా? ఎలాంటి పండ్లు మీరు కొనుగోలు చేస్తున్నారు? వాటి నాణ్యతను ఎలా తెలుసుకుంటున్నారు? చాలా మంది పండ్ల కొనే సమయంలో వాటిని గిల్లి, గిచ్చి పరీక్షిస్తారు. ఆపిల్​ పండ్ల విషయంలో వాటిపై స్టిక్కర్​ను గమనించే ఉంటాం. పండు నాణ్యత అంతా ఆ స్టిక్కర్​ను చూసి తెలుసుకోవచ్చని తెలుసా?

Stickers On Fruits : మీరు మార్కెట్​లో స్టిక్కర్‌తో ఉన్న ఆపిల్​ పండు గమనిస్తే అది దాని నాణ్యత, ఖరీదు వివరాలను సూచిస్తుంది. సాధారణంగా స్టిక్కర్‌తో ఉన్న ఆపిల్​ పండ్లు ఎగుమతి నాణ్యత కలిగినవని అర్థం. రైతుల దగ్గర కొనుగోలు చేసిన వ్యాపారులు ధర, నాత్యతను వినియోగదారులకు తెలిపేందుకు స్టిక్కర్​ ను ఉపయోగిస్తారు. కానీ, కొంత మంది వ్యాపారులు ఇదే అలుసుగా తీసుకుని రకరకాల నాణ్యత, ధరకు సంబంధం లేని స్టిక్కర్లు వేయడాన్ని కూడా మనం గమనించవచ్చు.

ప్రతి ఆపిల్‌ను స్టిక్కర్‌తో విక్రయించాలనే విషయం 99% మందికి తెలియదు. అయితే, ఇప్పుడు యాపిల్స్ మాత్రమే కాకుండా నారింజ పండ్లను కూడా స్టిక్కర్లతో అమ్ముతున్నారు. మెరిసే ఆపిల్స్​, వాటిపై ఆకర్షణీయమైన స్టిక్కర్లు చూసి అవి నాణ్యమైనవి, ఖరీదైనవి అనుకుంటే మీరు పొరపడినట్టే. ఆపిల్స్ కొనే ముందు స్టిక్కర్‌ను పరిశీలించాలి. దానిపై ఉన్న కోడ్​ ద్వారా వాటి నాణ్యత తెలుసుకోవాలి. అదెలాగో ఇప్పుడు చూద్దాం.

మార్కెట్లో కొన్ని రకాల ఆపిల్స్​పై స్టిక్కర్లు నాలుగు అంకెల సంఖ్యలు కలిగి ఉంటాయి. స్టిక్కర్లపై 4026 లేదా 4987 వంటి సంఖ్యలు ఉంటే అవి తక్కువ క్వాలిటీ కలిగి ఉన్నాయని అర్థం చేసుకోవాలి. ఆయా పండ్లను పురుగుమందులు, రసాయనాలను ఉపయోగించి పండించినట్లు తెలుసుకోవాలి. ఈ పండ్లపై తరచుగా పురుగుమందులు వాడడం వల్ల అవి తక్కువ ధరకు లభిస్తాయి. వాటిని తింటే, మీరు ఎరువులు, పురుగుమందులు ఉన్న పండ్లను కొనుగోలు చేస్తున్నట్లు అర్థం.

కొన్ని ఆపిల్​ పండ్లపై 84131, 86532 వంటి 8తో మొదలయ్యే ఐదు అంకెల సంఖ్యలు ఉంటాయి. ఇలాంటి స్టిక్కర్లు ఉన్న పండ్లు జన్యుపరంగా మార్పు చెందినవని అర్థం. ఈ పండ్లు సహజమైనవి కాకపోయినా పురుగు మందులు వాడిన పండ్ల కంటే కాస్త బెటర్​. పైగా ధర కూడా ఎక్కువే.

కొన్ని ఆపిల్​ పండ్ల స్టిక్కర్లపై 9తో మొదలయ్యే ఐదు అంకెల కోడ్ ఉంటుంది. 93435 అని ఉంటే ఆ పండు పూర్తిగా సేంద్రియ పద్ధతిలో పండించారని అర్థం చేసుకోవాలి. అంటే పురుగుమందులు, రసాయనాలు ఉపయోగించకుండా పండించినవి కావడంతో ధర ఎక్కువగా ఉంటుంది. ఇవి ఆరోగ్యానికి మేలు చేస్తాయి.

ఒక్కో స్టిక్కర్‌కు ఒక్కో అర్థం ఉన్నా బహిరంగ మార్కెట్​లో చాలా మంది వ్యాపారులు కంపెనీ పేరుతో నకిలీ స్టిక్కర్లను పండ్లపై అంటిస్తున్నారు. వీటికి నాణ్యత, ధరతో సంబంధం లేకున్నా ఎక్స్​పోర్ట్ క్వాలిటీ అంటూ అధిక ధరకు విక్రయించి మోసం చేస్తున్నారు. పండ్లను కొనుగోలు చేసేటప్పుడు స్టిక్కర్లను పరిశీలించి వాటి నాణ్యతను అంచనా వేయడం అనివార్యం.