Symptoms Of Brain Tumor : ప్రస్తుత కాలంలో మారుతున్న జీవనశైలి, ఆహారపు అలవాట్లు, శారీరక శ్రమ లేకపోవడం వంటి వివిధ కారణాల వల్ల అనేక రకాల అనారోగ్య సమస్యలు వస్తున్నాయి. అందులో.. బ్రెయిన్ ట్యూమర్ ఒకటి. మెదడు సమీపంలోని కణాల అసాధారణ పెరుగుదలనే 'బ్రెయిన్ ట్యూమర్' అని అంటారు. ఇది మెదడులోని ఏ భాగంలోనైనా కనిపిస్తుందని, వయసుతో సంబంధం లేకుండా రావొచ్చని ఆరోగ్య నిపుణులు చెబుతున్నారు.
ఈ వ్యాధితో మెదడుపై ఒత్తిడి పెరుగుతుంది. అలాగే కొన్నిసార్లు మొత్తం మెదడు కణజాలం దెబ్బతింటుందని నిపుణులు పేర్కొంటున్నారు. అయితే, ఈ వ్యాధితో బాధపడేవారు ముందుగానే కొన్ని లక్షణాలను గుర్తించి.. త్వరగా చికిత్స తీసుకోవడం వల్ల ప్రయోజనం ఉంటుందంటున్నారు. ముఖ్యంగా యువకులలో బ్రెయిన్ ట్యూమర్ ప్రాబ్లమ్ ఉంటే ఎలాంటి లక్షణాలు కనిపిస్తాయో ఈ స్టోరీలో తెలుసుకుందాం.
తలనొప్పి : బ్రెయిన్ ట్యూమర్‌తో బాధపడేవారికి తలనొప్పి ఎక్కువగా వస్తుందంటున్నారు నిపుణులు. ముఖ్యంగా ఉదయాన్నే నిద్రలేచినప్పుడు ఈ సమస్య తీవ్రంగా ఉంటుందని చెబుతున్నారు. 2021లో 'జర్నల్ ఆఫ్ న్యూరో-ఆంకాలజీ' అనే జర్నల్‌లో ప్రచురిచితమైన ఒక నివేదిక ప్రకారం.. బ్రెయిన్ ట్యూమర్ ఉన్నవారిలో తలనొప్పి ఎక్కువగా ఉంటుందని పరిశోధకులు గుర్తించారు. ఈ పరిశోధనలో అమెరికాలోని 'డ్యూక్ యూనివర్సిటీ మెడికల్ సెంటర్‌'కు చెందిన 'డాక్టర్ డేవిడ్ ఝాంగ్' పాల్గొన్నారు. బ్రెయిన్ ట్యూమర్ ఉన్న వారికి తలనొప్పి ఎక్కువగా వస్తుందని ఆయన పేర్కొన్నారు.
యువకులు స్మోకింగ్కు ఎందుకు అలవాటు పడతారు? - దాన్ని ఎలా అడ్డుకోవాలి? - Causes of Nicotine Addiction
కంటి చూపు తగ్గడం : నిపుణుల అభిప్రాయం ప్రకారం.. బ్రెయిన్ ట్యూమర్‌తో బాధపడేవారిలో కంటి చూపు తగ్గిపోతుంది. ఎందుకంటే.. బ్రెయిన్ ట్యూమర్ వల్ల కళ్ల నుంచి మెదడుకు సమాచారాన్ని తీసుకెళ్లే ఆప్టిక్ నరాలు దెబ్బతింటాయి. ఫలితంగా కంటి చూపు తగ్గిపోతుందంటున్నారు నిపుణులు.
వికారం, వాంతులు : మీకు జ్వరం ఉండి వాంతులు, వికారం వంటి లక్షణాలతో పాటు.. తీవ్రమైన తలనొప్పి సమస్య వేధిస్తుంటే బ్రెయిన్ ట్యూమర్ వ్యాధి ఉన్నట్లుగా భావించాలని నిపుణులు చెబుతున్నారు. మెదడులోని కణితి పెరిగినప్పుడు కణజాలంపై ఒత్తిడి పెరిగి ఇలాంటి లక్షణాలు కనిపిస్తాయని పేర్కొంటున్నారు.
వినికిడి శక్తి తగ్గిపోతుంది : బ్రెయిన్ ట్యూమర్ సమస్య వల్ల వినికిడి శక్తి తగ్గుతుందని సూచిస్తున్నారు నిపుణులు. ఈ వ్యాధితో బాధపడే వారిలో మెదడు నరాలపై ఒత్తిడి కలిగి చెవుల్లో నొప్పిగా ఉంటుందట. ట్యూమర్ వల్ల మెదడులోని వినికిడి నరాలు దెబ్బతిన్నప్పుడు వినికిడి శక్తి తగ్గిపోతుందని చెబుతున్నారు. అలాగే.. కణితి పెరిగే కొద్ది మెదడుపై ఒత్తిడి పెరిగిపోతుంది. దీనివల్ల వినికిడి శక్తిని కోల్పోయే అవకాశం ఉందని అంటున్నారు నిపుణులు.
మూర్ఛ : బ్రెయిన్ ట్యూమర్‌తో బాధపడే వారిలో మూర్ఛ వ్యాధి వచ్చే అవకాశం ఎక్కువగా ఉందని నిపుణులు చెబుతున్నారు. సాధారణంగా ఈ వ్యాధితో బాధపడేవారిలో దాదాపు 40 శాతం మందిలో ఈ లక్షణాలు కనిపిస్తాయని అంటున్నారు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
కనుబొమల వెంట్రుకలు రాలిపోతున్నాయా? - ఈ సమస్య నుంచి ఇలా బయటపడండి! - How To Prevent Eyebrow Hair Loss
