Relation Between Headache and Drinking Water: ఈ రోజుల్లో చాలా మంది తలనొప్పితో బాధపడుతున్నారు. కొందరికి గంటల్లో తగ్గిపోతే, మరికొందరికి రోజుల వరకూ ఉంటుంది. మరి, దీనికి కారణమేంటి అన్నది చాలా మందికి తెలియదు. మాత్రలు వేసుకుంటూ ఉంటారు. కానీ, కొన్ని తలనొప్పులు నీళ్లు తాగితే తగ్గిపోతాయని చెబుతున్నారు నిపుణులు! ఆ వివరాల కోసం ఓ లుక్కేయండి.
రోజులో ఎదురయ్యే ఒత్తిడితోపాటు పరోక్షంగానూ కొన్ని అంశాలు తలనొప్పికి దారితీయొచ్చని, అందులో డీహైడ్రేషన్ కూడా ఒకటంటున్నారు నిపుణులు. బాడీలో నీటిశాతం తగ్గినా (డీహైడ్రేషన్) తలనొప్పి రావొచ్చట! మానవ మెదడు దాదాపు 73 శాతం నీటితోనే నిర్మితమై ఉంటుందని, సరిపడా నీళ్లు తాగకపోతే శరీరంలో రక్తం పరిమాణం తగ్గి మెదడుకు ఆక్సిజన్ సరఫరా క్షీణిస్తుందని అంటున్నారు. దీంతో రక్తనాళాలు ఉబ్బుతాయని అంటున్నారు. అలాగే ఒంట్లో నీరు తగ్గినప్పుడు మెదడు తాత్కాలికంగా కుంచించుకుపోతుందని, దీంతో మెదడు పుర్రె నుంచి కాస్త వెనక్కి జారి, నొప్పికి దారితీస్తుందని అంటున్నారు. ఈ పరిణామాలన్నీ తలనొప్పికి దారితీస్తాయని హెచ్చరిస్తున్నారు. ఈ నొప్పిని తగ్గించుకోవడానికి రోజూ తగినంత నీరు తాగాలని సూచిస్తున్నారు.
పలు పరిశోధనలు సైతం ఇదే విషయాన్ని స్పష్టం చేస్తున్నాయి. నేషనల్ ఇన్స్టిట్యూట్ ఆఫ్ హెల్త్కు సంబంధించిన నేషనల్ లైబ్రరీ ఆఫ్ మెడిసిన్లో దీనికి సంబంధించిన వివరాలు ప్రచురితమయ్యాయి. వాటి ప్రకారం తలనొప్పి తగ్గేందుకు నీరు తాగడం మంచిదని సూచించారు(రిపోర్ట్ కోసం ఇక్కడ క్లిక్ చేయండి). సుమారు 18 నుంచి 45 సంవత్సరాల వయసు గల 256 మహిళలపై క్రాస్ సెక్షనల్ డివైజ్ ఉపయోగించి సుమారు నెలరోజుల పాటు చేసిన పరిశోధనలో ఈ విషయాలు వెల్లడయ్యాయి. అయితే దీనిపై పూర్తి క్లారిటీ కోసం మరిన్ని అధ్యయనాలు చేయాలని స్పష్టం చేశారు.
తలనొప్పికి ఇతర కారణాలు:
సరిగా తినకపోవటం: భోజనానికీ భోజనానికీ మధ్య గ్యాప్ ఎక్కువ ఉన్నా తలనొప్పి రావొచ్చని నిపుణులు అంటున్నారు. తరచూ తలనొప్పితో బాధపడేవారు ఈ విషయాన్ని గుర్తుంచుకోవాలని సూచిస్తున్నారు. అంతేకాకుండా కొందరికి పిండి పదార్థాలు, మిఠాయిల వంటివి తిన్నప్పుడూ నొప్పి వస్తుండొచ్చని, అలాంటి సమయాల్లో ఆయా పదార్థాలకు దూరంగా ఉండటం మంచిదంటున్నారు.
భంగిమ దెబ్బతినటం: సరిగా కూర్చోకపోవటం, నిలబడకపోవటం వల్ల తల, మెడ, దవడలు, భుజాల వెనక కండరాలు ఒత్తిడికి లోనవుతాయంటున్నారు. ఎక్కువసేపు ఇలాగే కొనసాగితే అక్కడి నాడుల మీదా ఒత్తిడి పెరుగుతుందని తద్వారా ఈ పరిస్థితి తలనొప్పికి దారితీస్తుందని చెబుతున్నారు.
మద్యం: మద్యం తాగడం వల్ల యూరిన్ ఎక్కువగా వస్తుంది. మూత్రంతో పాటు ఉప్పు, విటమిన్లు, ఖనిజాలూ బయటికి పోతాయని, అందువల్ల తలనొప్పి రావొచ్చని వివరిస్తున్నారు. ఇలాంటి అలవాట్లను మార్చుకున్న తర్వాత కూడా తలనొప్పి వేధిస్తూ ఉంటే గనక తప్పకుండా వైద్యులను సంప్రదించాలని సూచిస్తున్నారు.
NOTE: ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
తరచుగా మైగ్రేన్ తలనొప్పి వేధిస్తోందా? - నిపుణులు సూచిస్తున్న సూపర్ డైట్!
