టాయిలెట్​లో ఎంత సేపు ఉంటున్నారు? ఆ సమయం దాటితే అనేక రోగాలు వస్తాయట! ఇక ఫోన్ తీసుకెళ్తే అంతే సంగతులు!!

-టాయిలెట్​లోకి ఫోన్ తీసుకెళ్తే అనేక రోగాలు వస్తాయట! -క్యాన్సర్​కు దారి తీస్తుందని పరిశోధకుల హెచ్చరిక

How Much Time We Spend in Toilet: మీరు టాయిలెట్​కు ఎంత సమయం వెళ్తున్నారు? వెళ్లేటప్పుడు ఫోన్, న్యూస్ పేపర్ తీసుకుని మరీ వెళ్తున్నారా? అయితే, మీరు అనేక రోగాలను కొని తెచ్చుకున్నట్లే అంటున్నారు పరిశోధకులు. ఎక్కువ సమయం టాయిలెట్​లో గడపడం వల్ల అనేక వ్యాధులు వచ్చే అవకాశం ఉందని అధ్యయనాలు చెబుతున్నాయి. 2016లో 'అమెరికన్ జర్నల్ ఆఫ్ గ్యాస్ట్రో ఎంటరాలజీ' జర్నల్​లో ప్రచురితమైన ఓ అధ్యయనం ప్రకారం.. టాయిలెట్‌లో ఫోన్ ఎక్కువగా వాడే వ్యక్తులకు పైల్స్ వచ్చే అవకాశం ఎక్కువగా ఉందని తేలింది. ఈ పరిశోధనలో న్యూయార్క్​లోని మౌంటి సినాయి స్కూల్ ఆఫ్ మెడిసిన్​కు చెందిన ప్రముఖ గ్యాస్ట్రో ఎంటరాలజిస్ట్ డాక్టర్ అలెన్ బెర్మాన్ పాల్గొన్నారు. ఇంతకీ ఎంత సమయం టాయిలెట్​లో ఉండాలో మీకు తెలుసా?

మీరు టాయిలెట్​లో ఎక్కువసేపు ఫోన్​ను ఉపయోగించడం వల్ల విసర్జన అవయవాలపై అదనపు ఒత్తిడి పడుతుందని నిపుణలు అంటున్నారు. ఇంకా రక్త సరఫరాపై ప్రభావం పడి నాళాలు ఉబ్బుతాయని అంటున్నారు. ఫలితంగా ఇది పైల్స్, ఫిషర్స్​కు దారి తీస్తుందని హెచ్చరిస్తున్నారు. ఇంకా ప్రతి టాయిలెట్​​లోనూ ప్రమాదకరమైన బ్యాక్టీరియా, క్రిములు ఉంటాయి. అదే మీరు టాయిలెట్​లో మొబైల్ ఫోన్ తీసుకెళ్లినప్పుడు అక్కడ ఉన్న సాల్మోనెల్లా, ఇ-కొలి వంటి బ్యాక్టీరియాల కారణంగా కడుపు నొప్పి, యూరినరీ ట్రాక్ట్ ఇన్ఫెక్షన్(యూటీఐ) వంటి సమస్యలు తలెత్తే అవకాశం ఉంటుందంటున్నారు.

క్యాన్సర్​కు దారి తీస్తుంది
ఇంకా కొందరు టాయిలెట్​కి వెళ్లి వచ్చాక హ్యాండ్స్ వాష్ చేసుకోవడం మర్చిపోతుంటారు. మరి కొందరైతే ఆ ఆలోచన లేకుండానే ఆహారాన్ని తీసుకుంటుంటారు. ఒకవేళ చేతులు కడిగినా మొబైల్ మీద క్రిములు అలాగే ఉండిపోతాయి. ఫలితంగా మీరు తినే ఫుడ్​తో పాటు ఆ బ్యాక్టీరియా కడుపులోనికి వెళుతుందంటున్నారు నిపుణులు. ఇది అతిసారం, కడుపు ఉబ్బరం వంటి జీర్ణ సమస్యలకు దారి తీస్తుందని హెచ్చరిస్తున్నారు. ఇంకా మలబద్ధకం వంటి సమస్యలను ఎదుర్కొనేలా చేస్తుందని నిపుణులు చెబుతున్నారు. మలబద్ధకం కారణంగా ఇతర సమస్యలు వస్తాయని.. కొన్ని సందర్భాల్లో క్యాన్సర్​కు దారి తీస్తుందని హెచ్చరిస్తున్నారు.

మరి ఎంత సేపు టాయిలెట్​కు వెళ్లాలి?
టాయిలెట్​కు సుమారు 5-10 నిమిషాల సమయం మాత్రమే తీసుకోవాలని నిపుణులు సూచిస్తున్నారు. ఇంకా టాయిలెట్​కు వెళ్లే సమయంలో ఫోన్లు, పుస్తకాలు, న్యూస్ పేపర్లు లాంటివి తీసుకెళ్లకూడదని సలహా ఇస్తున్నారు. వీటిని ఉపయోగిస్తూ ఎక్కువ సమయం అందులోనే ఉంటారని.. ఫలితంగా అనేక వ్యాధులు వచ్చే అవకాశం ఉంటుందని చెబుతున్నారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.