రోజూ ఉదయం బొప్పాయి తింటున్నారా? ఈ హెల్త్​ బెనిఫిట్స్​ పొందినట్లే !

Papaya Health Benefits: రోజూవారి డైట్​లో పండ్లు తీసుకోవడం ద్వారా ఆరోగ్యపరంగా ఎన్నో లాభాలు ఉంటాయనే విషయం అందరికీ తెలిసిందే. అందులో ముఖ్యంగా బొప్పాయిని చేర్చుకున్నారంటే ఎన్నో ఆరోగ్య ప్రయోజనాలు పొందవచ్చంటున్నారు ఆరోగ్య నిపుణులు. అవేంటో ఇప్పుడు చూద్దాం..

Health Benefits of Papaya: మనం ఆరోగ్యంగా ఉండాలంటే రోజూ సరైన పోషకాహారం తీసుకోవడం చాలా అవసరం. ముఖ్యంగా బాడీకి సరైన పోషకాలు అందించి హెల్తీగా ఉంచడంలో ఫ్రూట్స్​ ఫస్ట్​ ప్లేస్​లో ఉంటాయనడంలో ఎలాంటి సందేహం లేదు. అయితే సీజన్​తో సంబంధం లేకుండా లభించే పండ్లలో బొప్పాయి(Papaya) ఒకటి. ఇది మార్కెట్లోనే కాదు చాలా మంది ఇంటి ఆవరణల్లో కూడా ఎక్కువగా ఉంటుంది. ఈ పండు రుచిగా ఉండడమే కాదు.. దీని వల్ల ఎన్నో ఆరోగ్య ప్రయోజనాలు ఉన్నాయి. సాధారణంగా బాడీలో పేరుకుపోయిన మలినాలను బయటకు పంపేందుకు మార్నింగ్​ టైం బెస్ట్​. అందుకే ఆరోగ్య నిపుణులు మార్నింగ్ లేవగానే వాటర్ తీసుకోవాలని చెబుతారు. ఇక అదే సమయంలో పండ్లు తీసుకోవడం ద్వారా మంచి ప్రయోజనాలు పొందవచ్చంటున్నారు. ముఖ్యంగా మార్నింగ్ ఖాళీ కడుపుతో బొప్పాయి తీసుకుంటే బోలెడు ఆరోగ్య ప్రయోజనాలు మీ సొంతమవుతాయని సూచిస్తున్నారు. మరి ఆ హెల్త్ బెనిఫిట్స్ ఏంటో ఈ స్టోరీలో తెలుసుకుందాం..

పోషకాలు ఫుల్​: రోజూ ఖాళీ కడుపుతో ఒక గిన్నె బొప్పాయి ముక్కలు తినడం వల్ల శరీరానికి వివిధ రకాల విటమిన్లు, మినరల్స్‌ అందడమే కాకుండా మలబద్ధకం బాధలను దూరం చేసుకోవచ్చు. ఒత్తిడిని తగ్గించడంలో కూడా చాలా బాగా సహాయపడుతుంది బొప్పాయి. దీనిలో విటమిన్ ఎ, విటమిన్ సి, విటమిన్ ఇ, ఫోలేట్, మెగ్నీషియం, పొటాషియం, కాపర్​తో పాటు యాంటీ ఆక్సిడెంట్లు ఎక్కువగా ఉంటాయి. అలాగే బొప్పాయిలో పాపైన్ అనే ఎంజైమ్ పుష్కలంగా ఉంటుంది. ఇక ప్రయోజనాల విషయానికొస్తే..

జీర్ణక్రియ మెరుగుదల : మీ డైట్​లో బొప్పాయిని చేర్చుకోవడం ద్వారా జీర్ణక్రియ మెరుగుపడుతుంది. అందులో ఉండే పాపైన్ అనే ఎంజైమ్ జీర్ణక్రియలో తలెత్తే సమస్యలను ఎదుర్కోవడంలో సమర్థవంతంగా పనిచేస్తుంది. అలాగే చైమోపాపైన్.. ప్రొటీన్లను విచ్ఛిన్నం చేయడంలో చాలా బాగా సహాయపడుతుంది. మొత్తంగా ఇందులో ఉండే పోషకాలు అజీర్ణాన్ని తగ్గించి ఆరోగ్యకరమైన జీర్ణవ్యవస్థను ప్రోత్సహిస్తాయి. అదేవిధంగా దీనిని గట్ ఆరోగ్యానికి సూపర్ ఫుడ్ అనొచ్చు.

నేచురల్ డిటాక్సిఫికేషన్ : బొప్పాయిలో ఫైబర్, వాటర్ కంటెంట్ అధికంగా ఉంటుంది. కాబట్టి ఇది మంచి నేచురల్ డిటాక్సిఫికేషన్​గా పనిచేస్తుంది. అంటే బొప్పాయిని ఖాళీ కడుపుతో తీసుకోవడం ద్వారా శరీరంలో పేరుకుపోయిన మలినాలను సులభంగా తొలగించడంలో చాలా బాగా పనిచేస్తుంది.

రక్తంలో చక్కెర స్థాయిలను నియంత్రిస్తుంది : మీరు బొప్పాయిని తీసుకోవడం ద్వారా కలిగే మరో ప్రయోజనమేమిటంటే.. రక్తంలో చక్కెర స్థాయిలను నియంత్రణలో ఉంచుతుంది. ఇది మధుమేహం ఉన్నవారికి ప్రయోజనకరంగా ఉంటుంది.

కొలెస్ట్రాల్ స్థాయిలను తగ్గిస్తుంది : బొప్పాయిలో ఉండే ఫైబర్ కొలెస్ట్రాల్ స్థాయిలను తగ్గించడంలో చాలా బాగా పనిచేస్తుంది. అలాగే గుండె జబ్బుల ప్రమాదాన్ని తగ్గించడంలోనూ సహాయపడుతుంది. బరువు కంట్రోల్​లో ఉండాలనుకునే వారు దీనిని తినడం ద్వారా మంచి ప్రయోజనాలు ఉంటాయి.

రోగనిరోధక శక్తిని పెంచుతుంది : బొప్పాయిని తీసుకోవడం ద్వారా శరీరానికి విటమిన్లు, మినరల్స్, యాంటీ ఆక్సిడెంట్లు పుష్కలంగా లభిస్తాయి. ఫలితంగా బాడీలో రోగనిరోధక శక్తి పెరుగతుంది. ఇది వివిధ జీవక్రియలు సక్రమంగా పని చేయడంలో, వివిధ వ్యాధులను నివారించడంలో చాలా బాగా సహాయపడుతుంది.

చర్మ ఆరోగ్యాన్ని మెరుగుపరుస్తుంది : బొప్పాయిలో ఉండే విటమిన్ సి, యాంటీ ఆక్సిడెంట్లు చర్మ ఆరోగ్యాన్ని మెరుగుపరచడంలో సహాయపడతాయి. అదేవిధంగా మచ్చలు, ముడతలు, ఇతర చర్మ సమస్యలను తగ్గించడంలో ఇది చాలా ఎఫెక్టివ్​గా పనిచేస్తుంది.