మీ ఒంట్లో సరిపడా రక్తం లేదా? ఇది తీసుకుంటే రక్తహీనత సమస్యకు చెక్!

-రక్తహీనతతో ఇబ్బంది బాధపడుతున్నారా? -ఆయుర్వేద పద్ధతిలో రక్తహీనతను తగ్గించే ఔషదం

Blood Improve Tips in Telugu: మీ శరీరంలో సరిపడా రక్తం లేక రక్తహీనతతో బాధపడుతున్నారా? దీంతో రక్తం పెంచుకోవడానికి అనేక ప్రయత్నాలు చేస్తున్నారా? అయితే, ఆయుర్వేద పద్ధతిలో చేసే ఈ ఔషధాన్ని ప్రిపేర్​ చేసుకుని తింటే రక్తం వేగంగా పెరుగుతుందని నిపుణులు అంటున్నారు. ఈ నేపథ్యంలో ఈ ఔషధాన్ని ఎలా చేసుకోవాలి? కావాల్సిన పదార్థాలు ఏంటో ప్రముఖ ఆయుర్వేద నిపుణులు డాక్టర్ గాయత్రీ దేవీ చెబుతున్నారు. అదేంటో ఇప్పుడు తెలుసుకుందాం..

కావాల్సిన పదార్థాలు

• 160 గ్రాముల ఉసిరి పెచ్చుల చూర్ణం
• 80 గ్రాముల లోహాభస్మం
• 40 గ్రాముల యష్టి మధు చూర్ణం
• 80 గ్రాముల తిప్ప తీగ చూర్ణం

తయారీ విధానం

• ముందుగా ఓ గిన్నెలో ఉసిరి పెచ్చుల చూర్ణం, లోహాభస్మం, యష్టి మధు చూర్ణం వేసి కలపాలి.
• ఆ తర్వాత స్టౌ ఆన్ చేసి ఓ గిన్నెలో నీళ్లు పోసి అందులో తిప్ప తీగ చూర్ణం పోసి వేడి చేసుకోవాలి.
• తిప్ప తీగ కషాయం మనం పోసిన నీటిలో 4వ వంతు వచ్చే వరకు మరిగించుకోవాలి.
• అనంతరం స్టౌ ఆఫ్ చేసి ఈ కషాయాన్ని వడపోసుకుని పక్కకు పెట్టుకోవాలి.
• ఇప్పుడు చిన్న రోలును తీసుకుని ముందుగా కలిపిన మిశ్రమాన్ని, కషాయాన్ని పోసి 15 నిమిషాల పాటు బాగా నూరాలి.
• అనంతరం అందులోనే ఒకరోజు మొత్తం నానబెట్టుకోవాలి. ఇలా మొత్తం ఏడు రోజుల పాటు కషాయాన్ని, మిశ్రమాన్ని పోసి నూరి నానబెట్టుకోవాలి.
• ఇలా చేసిన తర్వాత చివరకు ముద్దలాగా తయారైన తర్వాత మాత్రలుగా చేసుకోని నీడలో ఆరబెట్టుకుంటే ఔషధం రెడీ అవుతుంది.
• ఈ మాత్రని ఉదయం, సాయంత్రం భోజనం చేసిన తర్వాత వేసుకోవాలని డాక్టర్ గాయత్రీ దేవి చెబుతున్నారు. మనకు ఉన్న రక్త హీనత శాతాన్ని బట్టి సుమారు రెండు నెలల పాటు వాడాలని సూచిస్తున్నారు.

ఉసిరి పెచ్చులు: మనలో విటమిన్ సీ లోపం వల్ల రక్త హీనత సమస్య తలెత్తుతుందని చెబుతున్నారు. ఉసిరిలో విటమిన్ సీ అధికంగా ఉంటుందని వివరిస్తున్నారు. రక్త కణాలు ఉత్పత్తి కావడానికి ఉసిరి బాగా ఉపయోగపడుతుందని అంటున్నారు.

లోహాభస్మం: ఇది మన శరీరంలో ఐరన్ స్థాయిలు పెరగడానికి ఎంతో సహాయ పడుతుందని నిపుణులు చెబుతున్నారు. ఇది రక్తం పెరగడానికి ఎంతగానో ఉపయోగపడుతుందని వివరిస్తున్నారు.

యష్టి మధు: మనలో కొంత మందికి ఐరన్ వాడిన సమయంలో ఇబ్బందిగా ఉంటుంది. అలాంటి వారికి ఇది ఎంతగానో ఉపయోగపడుతుందని చెబుతున్నారు. ఇంకా కడుపు నొప్పి, మంట ఉన్నవారికీ కూడా ఇది సహాయ పడుతుందని వివరిస్తున్నారు.

తిప్ప తీగ: ఇది రక్త హీనత సమస్యకు చక్కటి ఔషధంలా పనిచేస్తుందని చెబుతున్నారు. రక్తం పెంచడానికి మంచి టానిక్​లాగా ఉపయోగపడుతుందని వివరిస్తున్నారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.