Sinusitis Tips In Ayurveda : ముఖంలో కళ్ల దగ్గర ముక్కు పక్క భాగాల్లోని ఎముకల్లో ఉండే సన్నని గాలితో నిండే ప్రదేశాన్ని సైనస్ అంటారు. ఈ భాగంలో ఇన్ఫెక్షన్ సోకి వాచిపోవడాన్నే.. "సైనసైటిస్"గా పిలుస్తారు. అయితే.. ప్రస్తుత కాలంలో చాలా మంది ఈ సమస్యతో బాధపడుతున్నారు. వయసుతో సంబంధం లేకుండా ఎవరిలోనైనా ఈ ఆరోగ్య సమస్య తలెత్త వచ్చని నిపుణులు చెబుతున్నారు. సైనసైటిస్ వచ్చినవారు నిరంతర జలుబు, శ్వాస ఆడకపోవడం, నిత్యం తలనొప్పి వంటి లక్షణాలతో బాధపడుతుంటారు.
ఇంకా.. తల మొత్తం బరువుగా ఉంటుంది. ముఖం మొత్తం వాపు వస్తుంది. కనుబొమ్మలు జివ్వుమని లాగడం వంటి సమస్యలు వేధిస్తుంటాయి. ఒక్కమాటలో చెప్పాలంటే.. సైనసైటిస్ సమస్య నిత్య జీవితంలో తీవ్ర ఇబ్బందులకు గురిచేస్తుంది. ఇంతగా వేధించే ఈ సైనసైటిస్ సమస్యను తగ్గించుకోవడానికి కొన్ని ఆయుర్వేద చిట్కాలు పాటిస్తే సరిపోతుందని అంటున్నారు హైదరాబాద్కు చెందిన ప్రముఖ ఆయుర్వేద ఆచార్యులు డాక్టర్ పి.వి. రంగనాయకులు. ఆ వివరాలు మీ కోసం..
సైనసైటిస్ సమస్య కొంతమందిలో నెలరోజుల్లో తగ్గిపోతే.. మరికొంతమందిలో ఏడాది నుంచి రెండు సంవత్సరాల వరకు కనిపించే అవకాశం ఉంది. సైనస్ సమస్య తీవ్రంగా వేధించినప్పుడు జీవనశైలి, ఆహారపు అలవాట్లలో చాలా రకాల మార్పులు చేసుకోవాలి.
- స్మోకింగ్ పూర్తిగా మానేయాలి.
- ముఖ్యంగా సైనస్ బాధల్ని పెంచే అలర్జీ కారకాలైన దుమ్ము ధూళి, కాలుష్యం ఉన్న చోట నుంచి దూరంగా ఉండాలి.
- నోటిని తరచూ గోరువెచ్చని నీటితో శుభ్రం చేసుకోవాలి.
- ఉదయం, సాయంత్రం వేడి నీటి ఆవిరి పట్టుకోవాలి. నీటిలో యూకలిప్టస్ ఆయిల్ కొన్ని చుక్కలు వేసుకుంటే మంచిది.
- చల్ల గాలికి తిరగకూడదు.
- అలాగే ఫ్రిడ్జ్లో కూల్గా ఉండే డ్రింక్స్, పుల్లటి ఆహార పదార్థాలకు దూరంగా ఉండాలి.
- రోజూ ఆహారంలో ఉల్లి, వెల్లుల్లి వంటి పదార్థాలను ఎక్కువగా తీసుకోవాలి.
- రాత్రి బాగా నిద్రపోవాలి.
- చలికాలంలో చెవులకు రక్షణ కల్పించాలి.
- గోరు వెచ్చటి నువ్వుల నూనెతో ముక్కు, కనుబొమ్మల మధ్య భాగంలో మృదువుగా మసాజ్ చేసుకోవాలి. ఇలా చేస్తే సైనసైటిస్ బాధలు తగ్గుముఖం పడతయాని డాక్టర్ పి.వి రంగనాయకులు చెబుతున్నారు.
"సైనసైటిస్ సమస్య ఉన్న వారు ఫ్యాన్ కింద నేరుగా పడుకోకూడదు. దీనివల్ల సమస్య తీవ్రమవుతుంది. బయట ఆయుర్వేద షాపుల్లో అణు తైలం, షడ్ బింధు తైలం అని రెండు రకాలు దొరుకుతాయి. ఈ రెండు తైలాలో ఏదోఒకటి తీసుకుని రెండు చుక్కలను అప్పుడప్పుడూ ముక్కులో వేసుకోవాలి. దీనివల్ల సైనస్ సమస్య చాలా వరకు తగ్గుతుంది. అలాగే గోరువెచ్చని నీరు ఎక్కువగా తాగాలి."- డాక్టర్ పి.వి రంగనాయకులు
చిత్రకహరీతకి అనే ఔషధం ఆయుర్వేద షాపుల్లో లభ్యమవుతుంది. దీనిని తీసుకోవడం వల్ల కూడా సమస్య తగ్గుముఖం పడుతుందని డాక్టర్ పి.వి రంగనాయకులు సూచిస్తున్నారు.
ఇవి కూడా చదవండి :
సైనస్ ఇబ్బంది పెడుతోందా? ఈ ఆసనాలతో ఫుల్ రిలీఫ్!
సైనస్తో బాధ పడుతున్నారా?.. ఈ చిట్కాలు పాటిస్తే మంచి రిజల్ట్స్ పక్కా!
