Shah Rukh Khan Gerua Accident : బాలీవుడ్ బాద్షా షారుక్ ఖాన్, కాజోల్ కెమిస్ట్రీ గురించి ప్రత్యేకంగా చెప్పాల్సిన పనేం లేదు. దశాబ్దానికి పైగా ఎన్నో సినిమాల్లో కలిసి నటించిన వీళ్లని సినీ లవర్స్ ముద్దుగా బాలీవుడ్ ఐకానిక్ కపుల్గా చెప్పుకుంటుంటారు. అప్పట్లో వీరిద్దరినీ కలిపి స్క్రీన్ మీద చూసేందకు థియేటర్ల ముందు యూత్ క్యూ కట్టేవారు. 1993లో 'బాజీగర్' చిత్రంతో మొదలైన వీరి ప్రయాణం 2015లో విడుదలైన 'దిల్వాలే' వరకూ సాగింది. వీరిద్దరూ నటించిన సినిమాలన్నీ దాదాపు సూపర్ హిట్లుగానూ నిలిచి బాక్సాఫీసు వద్ద మంచి కలెక్షన్లు సాధించాయి. ఈ క్యూట్ కపుల్ గురించి చాలా మందికి తెలియని ఓ ఆసక్తికర విషయం ఏంటంటే ఒకానొక సమయంలో కాజోల్ లేకపోయుంటే షారుక్ ఓ ప్రమాదంలో ఇరుక్కునే వారట. కాజోల్ తన ప్రాణాలను కాపాడిందని ఇందుకు తనకు ఎప్పుడూ రుణపడి ఉంటానంటూ షారుక్ స్వయంగా ఓ ఇంటర్వ్యూలో చెప్పారు. అసలు ఏం జరిగిందంటే?
2010లో విడుదలైన 'మై నేమ్ ఈజ్ ఖాన్' తర్వాత ఐదేళ్ల పాటు తెర మీద కనిపించని ఈ జంట, 2015లో తిరిగి 'దిల్ వాలే' అనే సినిమాలో నటించారు. రోహిత్ శెట్టి డైరెక్షన్లో రూపొందిన ఈ చిత్రంలో షారుక్ ఖాన్, కాజోల్తో పాటు వరుణ్ ధావన్, కృతి సనన్ కూడా నటించారు. ఈ సినిమా బాక్సాఫీస్ వద్ద ఆశించిన స్థాయిలో టాక్ అందుకోకపోయినా, ఇందులోని సాంగ్స్ మ్యూజిక్ లవర్స్ను తెగ ఆకట్టుకున్నాయి. ముఖ్యంగా 'గేరువా' అనే సాంగ్లో షారుక్- కాజల్ కెమిస్ట్రీ చూసి పాత రోజులను గుర్తుచేసుకున్నారు వారి అభిమానులు. కానీ ఈ పాట షూటింగ్ సమయంలో మూవీ టీమ్ చాలా ఇబ్బందులను ఎదుర్కోవాల్సి వచ్చిందట. చిత్రీకరణ సమయంలో షారుక్ ఓ పెను ప్రమాదం నుంచి తప్పించుకున్నారట.
సినిమా విడుదలకు ముందే 'గెరువా' పాట షూటింగ్కు సంబంధించిన కొన్ని వీడియో క్లిప్స్ను విడుదల చేశారు మేకర్స్. ఆ సమయంలో షారుక్ , కాజోల్ సహా దర్శకుడు రోహిత్ శెట్టి, కొరియోగ్రాఫర్ ఫరా ఖాన్ల మధ్య జరిగిన హస్య సన్నివేశాలను, ఇబ్బందులను చూపిస్తూ మేకర్స్ ఈ వీడియోను విడుదల చేశారు. అందులో షారుక్ ప్రాణాలను కాజోల్ కాపాడిన క్లిప్ కూడా ఉంటుంది.
ఇదే కాకుండా అప్పట్లో ఓ ఇంటర్వ్యూలోనూ షారుక్ ఆ ఇన్సిడెంట్ను గుర్తు చేసుకున్నారు. కాజోల్ తన ప్రాణాలను కాపాడారంటూ షారుక్ చెప్పుకొచ్చారు. అక్కడే ఉన్న కాజోల్ కూడా "అవును ఆ రోజు సరైన సమయంలో నిన్ను పట్టుకుని ఉండకపోతే నువ్వు జలపాతంలో పడిపోయే వాడివి ఇప్పుడిలా బ్రతికి ఉండేవాడివి కాదు" అంటూ సరదాగా అన్నారు. దానికి బాద్షా "ఆ రోజు నా ప్రాణాలను కాపాడినందుకు చాలా ధన్యవాదాలు. నువ్వు నా రుణం తీర్చుకున్నావ్. ఇందుకు నేను నీకు జీవితాంతం రుణపడి ఉంటాను. ఇప్పుడు నా జీవితం నీది" అంటూ నవ్వుతూ బదులిచ్చారు.
షారుక్, కాజోల్ కాదు - బీటౌన్లో ఈ హిట్ పెయిరే ఫేమస్! - Actress Most Films With Shahrukh
