NTR 101 Birth Anniversary : సీనియర్ ఎన్టీఆర్ కథానాయకుడు మాత్రమే కాదు బహుముఖ ప్రజ్ఞాశాలి. ఆయనలో ఓ దర్శకుడు, నిర్మాత, రచయిత కూడా ఉన్నారు. అయితే నటుడిగా ప్రయాణం ప్రారంభించిన ఆయన తన సినీ జీవితంలో దాదాపుగా 93 మంది దర్శకులతో పని చేశారు. ఎంతో మంది కొత్త దర్శకులకు కూడా అవకాశం ఇచ్చి ప్రతిభను పోత్సాహించారు.
స్వీయదర్శకత్వంలోనే ఎక్కువ! - ఎంతో మంది దర్శకులతో పని చేసిన ఎన్టీఆర్ తన స్వీయ దర్శకత్వంలోనూ నటించారు. దాదాపు 17 సినిమాల వరకు చేశారు. అలా తనను ఎక్కువ సినిమాల్లో డైరెక్ట్ చేసిన రికార్డ్ను తన పేరు మీదే రాసుకున్నారు. ఆ తర్వాత ఎన్టీఆర్కు అత్యంత ఆత్మీయులు అయిన సి.ఎస్. రావు, డి. యోగానంద్ ఆయనతో చెరో 16 చిత్రాలకు దర్శకత్వం వహించారు.
పౌరాణిక బ్రహ్మతో 15, జానపద బ్రహ్మతో 13! - ఎన్టీఆర్ హీరోగా 15 చిత్రాలు చేశారు కామేశ్వర రావు. వాటిలో ఎక్కువగా పౌరాణిక చిత్రాలే ఉండటం విశేషం. ఇక, జానపద బ్రహ్మ విఠలాచార్య దర్శకత్వంలో ఎన్టీఆర్ 13 చిత్రాల్లో నటించారట.
ఆయనతో 10 - ఈ ఇద్దరితో చెరో 9 - దర్శకుడు కేవీ రెడ్డితో కలిసి పది చిత్రాలు చేశారు ఎన్టీఆర్. అందులో 'శ్రీకృష్ణ సత్య' ఒకటి. ఇక ఎన్టీఆర్ను సినిమాకు పరిచయం చేసిన వ్యక్తి ఎల్వీ ప్రసాద్. వీరిద్దరి కలయికలో 9 చిత్రాలు వచ్చాయి. ఇక తనను హీరోగా చేసిన బి.వి. సుబ్బారావు దర్శకత్వంలోనూ ఎన్టీఆర్ తొమ్మిది సినిమాల్లో నటించారు.
దర్శకేంద్రుడితో 12, దర్శకరత్నతో ఐదు! - నవతరం దర్శకులతోనూ ఎన్టీఆర్ కమర్షియల్ చిత్రాలు చేశారు. అడవి రాముడుతో పాటు రాఘవేంద్రరావు ఎన్టీఆర్తో చేసిన సినిమాల సంఖ్య 12. దర్శకరత్న దాసరి నారాయణరావు ఐదు చిత్రాలు చేశారు.
ఇక ఎన్టీఆర్ హీరోగా వేదాంతం రాఘవయ్య, వి. మధుసూదన రావు, ఎస్.డి. లాల్ చెరో 8 సినిమాలు చేయగా, దర్శకుల్లో కె. హేమాంబరధరరావు, తాతినేని ప్రకాశ్ రావు 6, పి. పుల్లయ్య, కె. బాపయ్య 5 సినిమాలు తెరకెక్కించారు.
కాగా, ఎన్టీఆర్ ద్విపాత్రాభినయం చేసిన మొదటి సినిమా రాముడు - భీముడు. తాపీ చాణిక్య దర్శకుడు. ఈయనతో ఎన్టీఆర్ నాలుగు సినిమాలు చేశారు. అలానే 'మల్లీశ్వరి' డైరెక్టర్ బీఎన్ రెడ్డి దర్శకత్వంలోనూ నాలుగు చిత్రాల్లో నటించారు.
ఎన్టీఆర్ దైవాంశ సంభూతుడు, ఇవే సాక్ష్యాలు
ఎన్టీఆర్.. కెరీర్లోనే ఎక్కువ టేకులు తీసుకున్న సినిమా ఏంటంటే?
