Abhinav Gomatam New Movie : టాలీవుడ్ ప్రముఖ కమెడియన్ అభినవ్ గోమఠం గురించి ప్రత్యేకంగా చెప్పాల్సిన అవసరం లేదు. 'మళ్లీరావా' చిత్రంతో టాలీవుడ్ ఎంట్రీ ఇచ్చిన ఆయన.. 'ఈ నగరానికి ఏమైంది' చిత్రంలో తనదైన కామెడీతో ప్రేక్షకులను బాగా నవ్వించారు. ఆ తర్వాత 'మీకు మాత్ర‌మే చెబుతా', 'ఇచ్చట వాహనములు నిలపరాదు', 'సేవ్ టైగ‌ర్' చిత్రాలతో క‌మెడియ‌న్‌గా మంచి పాపులారిటీ సంపాందించుకున్నారు. ఇప్పుడు హీరోగా మారారు. 'ఈ నగరానికి ఏమైంది' చిత్రంలో ఆయన చెప్పిన పాపులర్ డైలాగ్ పేరునే టైటిల్గా ఫిక్స్ చేశారు. అభినవ్ కథానాయకుడిగా 'మ‌స్తు షేడ్స్ ఉన్నాయ్ రా' సినిమా తెరకెక్కనుంది. పోస్టర్ కూడా రిలీజ్ చేశారు. వైశాలి రాజ్ హీరోయిన్గా నటిస్తోంది. ఈ సినిమాకు తిరుప‌తి రావు ఇండ్ల ద‌ర్శ‌క‌త్వం వహిస్తున్నారు. ఆరెమ్ రెడ్డి, భ‌వాని కాసుల, ప్ర‌శాంత్‌.వి సంయుక్తంగా నిర్మిస్తున్నారు. ల‌వ్‌, కామెడీ ఎంట‌ర్‌టైన‌ర్‌గా చిత్రాన్ని తెరకెక్కిస్తున్నారు. ఫిబ్ర‌వ‌రి చివర్లో సినిమాను థియేటర్లలో రిలీజ్ చేయనున్నారు.
రామం రాఘవం : కమెడియన్ ధనరాజ్ దర్శకుడిగా మారి ఓ చిత్రం తెరకెక్కిస్తున్న సంగతి తెలిసిందే. ఈ సినిమాలో ప్రముఖ నటుడు సముద్రఖని ప్రధాన పాత్రలో నటిస్తున్నారు. తాజాగా ఈ సినిమా టైటిల్ పోస్టర్ను రిలీజ్ చేశారు. 'రామం రాఘవం' అనే పేరుతో సినిమా రాబోతుంది. పోస్టర్‌లో తండ్రి కొడుకులుగా సముద్రఖని, ధనరాజ్ కనిపిస్తున్నారు. ఇంటెన్స్‌తో కూడిన ఈ పోస్టర్కు మంచి స్పందన వస్తోంది. ఇప్పటివరకు ఎప్పుడూ చూడని తండ్రి కొడుకుల కథను అద్భుతంగా తెరమీద చూపించబోతున్నట్లు దర్శకుడు ధనరాజ్ తెలిపారు. ఈ సినిమాలో మోక్ష, హరీష్ ఉత్తమన్, శ్రీనివాసరెడ్డి, చిత్రం శ్రీను, రాకెట్ రాఘవ, రచ్చ రవి తదితరులు నటిస్తున్నారు. ఈ చిత్రానికి విమానం చిత్ర దర్శకుడు శివ ప్రసాద్ యానాల కథను సమకూర్చారు. అరుణ్ చిలువేరు సంగీతం అందిస్తున్నారు. మార్తాండ్ కె వెంకటేష్ ఎడిటర్. దుర్గా ప్రసాద్ ఈ సినిమాకు కెమెరామెన్. స్లేట్ పెన్సిల్ స్టోరీస్ బ్యానర్ పై ప్రభాకర్ ఆరిపాక సమర్పణలో పృథ్వి పొలవరపు నిర్మిస్తున్నారు.
