Tabu New Hollywood Film : అందం, అభినయంతో కొన్ని దశాబ్దాలుగా సినిమా ఇండస్ట్రీలో రాణిస్తోన్న హీరోయిన్ టబు. రీసెంట్గా క్రూ చిత్రంతో సూపర్ హిట్ అందుకున్న ఆమె తాజాగా మరో బంపర్ ఆఫర్ కొట్టేసింది. ఇంటర్నేషనల్ సిరీస్ అయిన హాలీవుడ్ ప్రాజెక్ట్ 'Dune: Prophecy'లో నటించే అవకాశం దక్కించుకుంది. ఈ సిరీస్‌లో ఆమె సిస్టర్ ఫ్రాన్సెస్కా పాత్రలో కనిపించనున్నట్లు అమెరికన్ సినిమా మీడియా తెలిపింది.
"అట్రాక్టివ్‌గా, స్మార్ట్‌గా, స్ట్రాంగ్‌గా కనిపించే రోల్ పోషిస్తున్నారు టబు. ప్రతి ఒక్క ప్రేక్షకుడికి గుర్తుండిపోయేలా ఉంటుంది ఈ సిస్టర్ ఫ్రాన్సెస్కా పాత్ర. ఒకప్పుడు చక్రవర్తి ప్రేయసిగా ఉన్న ఆమె తిరిగి ప్యాలెస్కు రావడం వల్ల అక్కడి అధికారంలో సమతుల్యత దెబ్బ తింటుంది" అని టబూ పాత్రపై మీడియాలో వార్తలు వినిపిస్తున్నాయి.
వాస్తవానికి ఈ సిరీస్ 2019లో Dune: The Sisterhood పేరుతో అనౌన్స్ చేశారు. Sisterhood of Dune నవల ఆధారంగా తెరకెక్కుతోంది. ఈ ప్రాజెక్టులో ఎమిలీ వాట్సన్, ఒలివియా విలియమ్స్, జోడీ మే, ట్రావిస్ ఫిమ్మెల్, సారా-సోఫీ బౌస్నినా, మార్క్ స్ట్రాంగ్, క్లౌ లీ, జోష్ హ్యూస్టన్, జాడే అనౌకాలతో పాటు కనించనున్నారు టబు. ప్రముఖ రచయిత ఫ్రాంక్ హెర్బర్ట్ క్రియేట్ చేసిన డ్యూన్ ప్రపంచంలోనే ఈ సిరీస్ను కూడా నిర్మిస్తున్నారు.
కాగా, టబు హాలీవుడ్‌లో తొలిసారిగా మీరా నాయర్ డైరక్షన్‌లో 'The Name Sake'లో నటించారు. ఇర్ఫాన్ ఖాన్తో కలిసి నటించిన ఈ సినిమా చాలా పాజిటివ్ టాక్ దక్కించుకుంది. ఆ తర్వాత 2012లో లైఫ్ ఆఫ్ పై సినిమాలో నటించగా, దానికి నాలుగు ఆస్కార్లు దక్కాయి. రీసెంట్గా విడుదలై హిట్ టాక్ సంపాదించుకున్న 'క్రూ' సినిమాలోనూ ప్రధాన పాత్రలో కనిపించారు టబు. అంధాదున్, దృశ్యం 2, భూల్ భూలయ్య 2 లాంటి హిట్ సినిమాలతోనూ టబు అలరించారు.
ఇకపోతే తెలుగులో టబు సాధించిన విజయాలు కోకొల్లలు. 1991లో వెంకటేశ్ నటించిన కూలీ నంబర్ 1 మూవీతో టాలీవుడ్కు పరిచయమైన ఆమె ఆ తర్వాత సిసింద్రీ, నిన్నే పెళ్లాడతా, ఆవిడా మా ఆవిడే అంటూ నాగార్జునతో కలిసి రొమాంటిక్ డ్రామాల్లో నటించి అప్పటి యువత కళ్లల్లో నిలిచిపోయారు.
