కంపెనీ 'గ్రాట్యుటీ' ఇవ్వడానికి నిరాకరిస్తోందా? ఇలా చేస్తే ప్రోబ్లమ్ సాల్వ్​! - Gratuity Problems And Solutions

What To Do If Your Employer Refuses To Pay Gratuity : మీరు ప్రైవేట్ కంపెనీలో పనిచేశారా? కంపెనీ మీకు చెల్లించాల్సిన గ్రాట్యుటీని ఇవ్వకుండా ఇబ్బంది పెడుతోందా? అయితే ఇది మీ కోసమే. చట్టబద్ధంగా మీకు రావాల్సిన గ్రాట్యుటీని ఎలా పొందాలో ఇప్పుడు చూద్దాం.

What To Do If Your Employer Refuses To Pay Gratuity : ఉద్యోగులకు గ్రాట్యుటీ అమౌంట్ అనేది చాలా ముఖ్యమైనది. అయితే చాలా కంపెనీలు ఉద్యోగులకు గ్రాట్యుటీ చెల్లించకుండా ఇబ్బంది పెడుతూ ఉంటాయి. ఇలాంటి పరిస్థితుల్లో ఉద్యోగులు ఏ విధంగా తమకు రావాల్సిన గ్రాట్యుటీని పొందాలో, ఇక్కడ తెలిపిన ఉదాహరణ ద్వారా తెలుసుకుందాం.

ప్రశ్న: నాకు 64 ఏళ్లు. పదవీ విరమణ చేశాను. ఒక ప్రైవేట్ కంపెనీలో 2000-10 వరకు పనిచేశాను. మళ్లీ 2012-22 మధ్య కాలంలో రెండోసారి కూడా అక్కడే పనిచేశాను. తరువాత పదవీ విరమణ చేశాను. అయితే కంపెనీ నాకు రెండవ పదవీకాలానికి సంబంధించిన గ్రాట్యుటీని మాత్రమే చెల్లించింది. కానీ 2000-10 మొదటి పదవీకాలానికి సంబంధించిన గ్రాట్యుటీ ఇవ్వలేదు. మరి ఇలాంటి పరిస్థితుల్లో గ్రాట్యుటీని పొందడానికి నేను ఏం చేయాలి?

జవాబు : గ్రాట్యుటీ చెల్లింపు చట్టం, 1972 ప్రకారం, కంపెనీ లేదా యజమాని తమ దగ్గర 5 ఏళ్లు నిర్విరామంగా పనిచేసిన ఉద్యోగికి కచ్చితంగా గ్రాట్యుటీ చెల్లించాలి. అంటే గ్రాట్యుటీ అనేది ఉద్యోగి చట్టబద్ధమైన హక్కు. సెక్షన్ 4(6) ప్రకారం ఎట్టి పరిస్థితుల్లోనూ ఉద్యోగికి అటువంటి చట్టబద్ధమైన హక్కును నిలిపేయడం కుదరదు. 1972 చట్టం సెక్షన్ 4 ప్రకారం, ఉద్యోగి సదరు సంస్థ నుంచి 2000-10 కాలానికి, అలాగే 2012-2022 మధ్య కాలానికి కూడా గ్రాట్యుటీని పొందేందుకు అర్హుడు.

దీనిని మరింత సింపుల్​గా చెప్పాలంటే, ఉద్యోగి 2000-2010 వరకు అంటే ఐదేళ్లకు పైబడి నిరంతరంగా సేవలు అందించారు. అందువల్ల 2000-2010 కాలానికి గ్రాట్యుటీని పొందేందుకు అతను అర్హుడు. 2012-2022 మధ్యకాలంలో అతను మళ్లీ సదరు సంస్థలో పనిచేశాడు. చట్టం ప్రకారం, అతను మళ్లీ తాజాగా ఉద్యోగం ప్రారంభించినట్లు లెక్క. కనుక చట్టం ప్రకారం ఈ ఐదు సంవత్సరాలకు కూడా అతను గ్రాట్యుటీ స్వీకరించడానికి అర్హుడు.

నోటీస్ ఇవ్వండిలా!
ఉద్యోగికి 2000-10 కాలానికి గ్రాట్యుటీ చెల్లించలేదు కనుక వెంటనే అతను కంపెనీకి నోటీస్ పంపించాలి. అక్టోబరు 1, 1987 నాటి సెక్షన్ 7(3-A) ప్రకారం 10 శాతం వడ్డీతో సహా గ్రాట్యుటీ చెల్లించాలని స్పష్టం చేస్తూ, సంబంధిత పత్రాలను జత చేసి లీగల్ నోటీసును పంపాలి. అప్పటికూడా యజమాని గ్రాట్యుటీ చెల్లించకపోతే, గ్రాట్యుటీ రికవరీ కోసం సెక్షన్ 8 కింద కేస్ ఫైల్​ చేయవచ్చు. ఇందుకోసం సంబంధిత కంట్రోలింగ్ అథారిటీకి ఫిర్యాదు చేయాలి. లేబర్ కమిషనర్ లేదా కంట్రోలింగ్ అథారిటీ మీరు చేసిన ఫిర్యాదుతో సంతృప్తి చెందితే యజమాని నుంచి గ్రాట్యూటీ మొత్తాన్ని రికవరీ చేయాలని కలెక్టర్‌కు ఆదేశాలు ఇస్తుంది. ఈ విధంగా ఉద్యోగులు తమకు రావాల్సిన గ్రాట్యుటీని పొందవచ్చు.