స్పైస్​జెట్​లో 1350 మంది ఉద్యోగుల తొలగింపునకు రంగం సిద్ధం - కారణం అదేనా?

SpiceJet Plans To Lay Off 1000 Employees : ప్రముఖ విమానయాన సంస్థ స్పైస్​జెట్​ త్వరలో 1350 మంది ఉద్యోగులను తొలగించేందుకు సిద్ధమవుతున్నట్లు సమాచారం. తీవ్రమైన ఆర్థిక సంక్షోభంలో ఉన్న సంస్థ ఖర్చులను తగ్గించుకోవడం కోసమే ఈ నిర్ణయం తీసుకున్నట్లు తెలుస్తోంది. పూర్తి వివరాలు ఇప్పుడు చూద్దాం.

SpiceJet Plans To Lay Off 1000 Employees : సంక్షోభంలో ఉన్న ప్రముఖ విమానయాన సంస్థ స్పైస్​జెట్​ త్వరలో 1350 మంది ఉద్యోగులను తొలగించేందుకు సిద్ధమవుతున్నట్లు సమాచారం. ఎయిర్​క్రాఫ్ట్ ఫ్లీట్​ ఖర్చులు తగ్గించడానికి, సంస్థ కార్యకలాపాలను క్రమబద్ధీకరించడానికే ఈ నిర్ణయం తీసుకున్నట్లు తెలుస్తోంది.

ఆర్థిక సంక్షోభం
'స్పైస్​జెట్​ ఇప్పటికే అనేక ఆర్థిక ఇబ్బందులను ఎదుర్కొంటోంది. అలాగే చట్టపరమైన పోరాటాలు చేస్తోంది. అందుకే సంస్థలో ఉన్న అదనపు సిబ్బందిని తొలగించి, కొంత మేరకు ఖర్చులు తగ్గించుకోవాలని చూస్తోంది. ఈ వారం చివరి నాటికి తుది నిర్ణయం తీసుకునే అవకాశం ఉంది' అని ఓ స్పైస్​జెట్​ అధికారి తెలిపారు.

పింక్ స్లిప్స్​

'ప్రస్తుతం స్పైస్​జెట్​ ఎయిర్​లైన్స్​లో 9000 మంది ఉద్యోగులు ఉన్నారు. వారిలో 10-15% మందిని తొలగించే అవకాశం ఉంది. ఇదే జరిగితే సంస్థకు ఏడాదికి రూ.100 కోట్ల వరకు ఆదా అవుతుంది.'
- ఓ స్పైస్​జెట్ అధికారి

ఇదే జరిగితే స్పైస్​జెట్ ఎయిర్​లైన్స్​లో దాదాపు 1,350 మంది ఉద్యోగాలు కోల్పోయే అవకాశం ఉంది.

అన్ని శాఖల్లోనూ తొలగింపులు
'స్పైస్​జెట్ దాదాపు అన్ని శాఖల్లోనూ అదనంగా ఉన్న ఉద్యోగులను తొలగించేందుకు సిద్ధమవుతోంది. ఇప్పటికే మేనేజ్​మెంట్, కన్సల్టెన్సీ సిబ్బంది సంస్థలో అదనంగా ఉన్న ఉద్యోగుల జాబితాను తయారు చేస్తున్నారు' అని మరో అధికారి తెలిపారు. అయితే దీనిపై స్పైస్​జెట్ ఎలాంటి అధికారిక ప్రకటన చేయకపోవడం గమనార్హం.

ఒడుదొడుకులు
ప్రస్తుతం స్పైస్​జెట్​ వద్ద 10 లీజుకు తీసుకున్న విమానాలు, 30 వరకు ఎయిర్​క్రాఫ్ట్​లు ఉన్నాయి. అయితే ప్రస్తుతం స్పైస్​జెట్ తీవ్రమైన ఆర్థిక సంక్షోభాన్ని, న్యాయపరమైన చిక్కులను ఎదుర్కొంటోంది. అందుకే స్పైస్​జెట్ ఛైర్మన్​ & మేనేజింగ్ డైరెక్టర్ అజయ్ సింగ్​ సంస్థ ఖర్చులను గణనీయంగా తగ్గించడంపై దృష్టి కేంద్రీకరించారు. అలాగే స్పైస్​జెట్​ క్యారియర్​ ఫ్లీట్​ను అప్​గ్రేడ్​ చేసేందుకు, ఆన్​-టైమ్ పెర్ఫార్మెన్స్​ను మెరుగుపరిచేందుకు కృషి చేస్తున్నారు.

స్పైస్​జెట్ ప్రారంభమైనప్పటి నుంచి అనేక యాజమాన్య మార్పులు జరిగాయి. ప్రస్తుతం అజయ్​ సింగ్ నేతృత్వంలో నడుస్తోంది. ఈయన సంస్థను నిలబెట్టేందుకు పెట్టుబడిదారుల నుంచి నిధులు సేకరించే పనిలో ఉన్నారు.

నిధుల సమీకరణ
స్పైస్​జెట్ ప్రిఫరెన్షియల్ ప్రాతిపదికన సెక్యూరిటీలు జారీ చేసి రూ.2,250 కోట్లు సమీకరించాలని నిర్ణయించుకుంది. మొదటి విడతగా రూ.744 కోట్లు సమీకరించినట్లు ఈ జనవరి 26న ప్రకటించింది. అయితే అవసరమైన నిధులు సేకరించడంలో తీవ్రమైన జాప్యం జరుగుతున్నట్లు సమాచారం.

గవర్నమెంట్ ఎమర్జెన్సీ క్రెడిట్​ లైన్ గ్యారెంటీ స్కీమ్ కింద ఇప్పటికే స్పైస్​జెట్ రూ.1000 కోట్ల విలువైన నిధులను పొందింది. మరో రూ.500 కోట్లు కూడా సమకూర్చుకోవడానికి అజయ్​ సింగ్ ప్రయత్నిస్తున్నారు.

లీగల్ ఇష్యూస్​
లీజుకు తీసుకున్న విమానాలకు స్పైస్​జెట్​ అద్దె చెల్లించలేదు. దీనితో లీజర్లు తమ విమానాలను తిరిగి తీసుకోవడానికి సిద్ధమయ్యారు. ఇందుకోసం కోర్టు కేసులు కూడా వేశారు. ఇది స్పైస్​జెట్​కు పెద్ద సమస్యగా మారింది.

కష్టాల్లో
ప్రపంచంలో అత్యంత వేగంగా అభివృద్ధి చెందుతున్న పౌర విమానయాన మార్కెట్లోలో భారత్​ ఒకటి. ముఖ్యంగా దేశీయ విమానాలు పెద్దఎత్తున రాకపోకలు కొనసాగిస్తున్నాయి. అయితే స్పైస్​జెట్​ మాత్రం గతకొంత కాలంగా ఆర్థిక ఇబ్బందులతో సతమతమవుతోంది. 2023లో స్పైస్​జెట్​ 83.90 లక్షల మంది ప్రయాణికులను గమ్యస్థానాలకు చేర్చింది. దేశంలో దీని మార్కెట్ వాటా 5.5 శాతంగా ఉండడం గమనార్హం.