ఇన్వెస్టర్లకు గుడ్ న్యూస్​ - ఫ్రీగా SEBI సర్టిఫికేషన్ ప్రోగ్రామ్​​ - స్టడీ మెటీరియల్ కూడా ఉచితం! - SEBI Free Certification Programme

SEBI Free Investor Certification Programme : స్టాక్​ మార్కెట్ నియంత్రణ సంస్థ సెబీ ఇటీవలే స్టాక్ మార్కెట్ పెట్టుబడిదారుల కోసం ఫ్రీ సర్టిఫికేషన్ ప్రోగ్రామ్​ను ప్రారంభించింది. దీని ప్రకారం, మదుపరులకు ఉచితంగా ఒక పరీక్ష పెడతారు. దీనికి కావాల్సిన మెటీరియల్ కూడా పూర్తి ఉచితంగా అందిస్తారు. దీనిలో ఉత్తీర్ణులైనవారికి సర్టిఫికెట్ ఇస్తారు. పూర్తి వివరాలు మీ కోసం.

SEBI Free Investor Certification Programme : స్టాక్‌ మార్కెట్​ నియంత్రణ సంస్థ 'సెక్యూరిటీస్‌ అండ్‌ ఎక్స్ఛేంజ్‌ బోర్డ్‌ ఆఫ్‌ ఇండియా' (SEBI), నేషనల్​ ఇన్​స్టిట్యూట్ ఆఫ్ సెక్యూరిటీస్ మార్కెట్​ (NISM)తో కలిసి పెట్టుబడిదారుల కోసం 'ఫ్రీ సర్టిఫికేషన్ ప్రోగ్రామ్'​ను ప్రారంభించింది. ఇందులో వ్యక్తిగత పెట్టుబడిదారులకు ఆన్​లైన్ పరీక్ష నిర్వహిస్తారు. ఇందుకోసం స్టడీ మెటీరియల్ కూడా పూర్తి ఉచితంగా అందిస్తారు. ఉత్తీర్ణులైన వారికి సర్టిఫికెట్ అందిస్తారు.

ఈ సర్టిఫికేషన్ వల్ల కలిగే లాభాలు ఇవే!
SEBI Investor-Certificate Benefits : ఈ సర్టిఫికేషన్ ప్రోగ్రామ్ వల్ల సాధారణ పెట్టుబడిదారులు స్వచ్చందంగా మార్కెట్లు, పెట్టుబడుల విషయంలో తమ విజ్ఞానాన్ని పరీక్షించుకునేందుకు వీలవుతుంది. ఇండియన్​ సెక్యూరిటీ మార్కెట్లలో పెట్టుబడి పెట్టడం గురించి సమగ్ర జ్ఞానాన్ని పొందడానికి వీలవుతుంది. కనుక ఆసక్తి ఉన్నవాళ్లు investor.sebi.gov.in లేదా https://www.nism.ac.in/sebi-investor-certification-examination వెబ్​సైట్​లోకి వెళ్లి, దీని కోసం అప్లై చేసుకోవచ్చు.

'డిజిటల్ ఫైనాన్షియల్ ఎడ్యుకేషన్​లో ఇదొక ముందడుగు'
'సెక్యూరిటీస్​ మార్కెట్లో డిజిటల్ ఫైనాన్షియల్ ఎడ్యుకేషన్​ను పెంపొందించేందుకు ఈ కొత్త సర్టిఫికేషన్ ప్రోగ్రామ్​ ప్రారంభించాం. ఇది ఒక ముఖ్యమైన ముందడుగు. ఈ ఆన్​లైన్ పరీక్ష వల్ల మార్కెట్ లాభ, నష్టాల గురించి మదుపరుల్లో ఒక అవగాహన ఏర్పడుతుంది. భవిష్యత్​లో తమ పెట్టుబడులను సరైన మార్గంలో పెట్టుకోవడానికి వీలవుతుంది' అని సెబీ అధికారి అనంత్ నారాయణ్ తెలిపారు.

పరీక్షలో అడిగే అంశాలు ఇవే!

• ఆర్థిక రంగం ప్రాథమిక భావనలు. అంటే పొదుపు, పెట్టుబడి, బడ్జెట్, ద్రవ్యోల్బణం మొదలైన వాటిపై అవగాహన ఉండాలి.
• వివిధ ప్రభుత్వ పథకాల గురించి తెలిసి ఉండాలి.
• ప్రైమరీ, సెకండరీ మార్కెట్లతో సహా సెక్యూరిటీస్​ మార్కెట్​పై అవగాహన కలిగి ఉండాలి.
• స్టాక్ ఎక్స్ఛేంజ్​లు, డిపాజిటరీలు, నియంత్రణ సంస్థల గురించి అవగాహన ఉండాలి.
• క్రెడిట్ రిస్క్​, మార్కెట్ రిస్క్​, లిక్విడిటీ రిస్క్ వంటి పెట్టుబడికి సంబంధించిన రిస్క్​ల గురించి తెలుసుకోండి.
• రిస్క్ మేనేజ్​మెంట్ కాన్సెప్ట్స్​పై అవగాహన కలిగి ఉండాలి.
• పెట్టుబడి పద్ధతుల్లో తగిన శ్రద్ధ, నైతిక ప్రవర్తన, పారదర్శకత ప్రాధాన్యతల గురించి తెలుసుకోవాలి.
• పెట్టుబడిదారుల హక్కులు, బాధ్యతలు, వివాద పరిష్కారాలు గురించి అవగాహన కలిగి ఉండాలి.