S&P India's Growth Forecast : ప్రస్తుత ఆర్థిక సంవత్సరంలో (2024-25) భారత్ 6.8 శాతం జీడీపీ వృద్ధి సాధిస్తుందన్న తన అంచనాలను యథాతథంగా కొనసాగిస్తున్నట్లు అంతర్జాతీయ రేటింగ్ సంస్థ స్టాండర్డ్‌ అండ్ పూర్స్ (ఎస్&పీ) స్పష్టం చేసింది. అక్టోబరులో జరిగే ద్రవ్య విధాన సమీక్షలో ఆర్బీఐ కీలక వడ్డీ రేట్లను తగ్గించే అవకాశం ఉన్నట్లు తెలిపింది. తన తాజా ఆసియా-పసిఫిక్‌ ఎకనామిక్‌ అవుట్లుక్లో ఈ మేరకు ఎస్&పీ పేర్కొంది.
'వడ్డీ రేట్లపై ఆర్బీఐ నిర్ణయం'
2025-26 ఆర్థిక సంవత్సరానికిగానూ భారత జీడీపీ వృద్ధి అంచనాను 6.9 శాతం వద్దే ఉంచింది ఎస్ అండ్ పీ గ్లోబల్ రేటింగ్స్. భారతదేశంలో పటిష్ఠమైన వృద్ధిరేటు రిజర్వ్ బ్యాంక్ తన లక్ష్యాలకు అనుగుణంగా ద్రవ్యోల్బణాన్ని అరికట్టడానికి ఉపయోగపడుతుందని పేర్కొంది. "భారత్లో 2024-2025 ఆర్థిక సంవత్సరానికి వృద్ధి రేటు అంచనా 6.8 శాతం. ఆర్బీఐ అక్టోబర్లో వడ్డీ రేట్లను తగ్గించడం ప్రారంభిస్తుందని మేము భావిస్తున్నాం. ఆర్బీఐ ఆహార ద్రవ్యోల్బణాన్ని వడ్డీ రేట్ల తగ్గింపునకు అడ్డంకిగా పరిగణిస్తోంది. ఆహార ధరల పెరుగుదల తగ్గితే తప్ప, ద్రవ్యోల్బణాన్ని 4 శాతం వద్ద కొనసాగించడం చాలా కష్టమని భావిస్తోంది. ప్రస్తుత ఆర్థిక సంవత్సరంలో ద్రవ్యోల్బణం సగటున 4.5 శాతంగా ఉంటుంది" అని ఎస్ అండ్ పీ తెలిపింది.
గత ఆర్థిక సంవత్సరంలో(2023-24) భారత ఆర్థిక వ్యవస్థ 8.2 శాతం వృద్ధి చెందిందని రేటింగ్ సంస్థ వెల్లడించింది. ఈ ఏడాది జులైలో ప్రవేశపెట్టిన కేంద్ర బడ్జెట్లో ప్రభుత్వం ఆర్థిక ఏకీకరణకు కట్టుబడి ఉందని, మౌలిక సదుపాయాలపై ఎక్కువ బడ్జెట్ను కేటాయించిందని పేర్కొంది. మార్చి 2025తో ముగిసే ప్రస్తుత ఆర్థిక సంవత్సరంలో రూ.11.11 లక్షల కోట్ల మూలధన వ్యయాన్ని కేంద్రం బడ్జెట్లో కేటాయించిందని వెల్లడించింది.
కీలక వడ్డీ రేట్లు తగ్గే అవకాశం!
ఆర్బీఐ ద్రవ్య విధాన పరపతి సమీక్ష అక్టోబర్ 7-9 వరకు జరగనుంది. ఈ సమీక్షలో కీలక వడ్డీ రేట్లపై నిర్ణయం తీసుకునే అవకాశం ఉంది. కాగా, ద్రవ్యోల్బణాన్ని అదుపులో ఉంచడానికి ఆర్బీఐ 2023 ఫిబ్రవరి నుంచి బెంచ్మార్క్ వడ్డీ రేటును 6.5 శాతం వద్ద స్థిరంగా ఉంచుతోంది. అయితే, ఇటీవలే యూఎస్ ఫెడరల్ రిజర్వ్ కీలక వడ్డీ రేట్లను 50 బేసిస్ పాయింట్లు మేర తగ్గించింది. ఈ నేపథ్యంలో వచ్చే నెలలో జరిగే సమావేశంలో ఆర్బీఐ కూడా వడ్డీ రేట్లను 25 బేసిస్ పాయింట్ల మేర తగ్గించొచ్చని అంచనాలు ఉన్నాయి.
