ఐసీఐసీఐ కస్టమర్లకు అలర్ట్​ - ఆ వాట్సాప్ మెసేజెస్, కాల్స్ నమ్మితే ఇక అంతే! - ICICI Bank Fraud Alert

ICICI Bank Fraud Alert : ఐసీఐసీఐ బ్యాంక్ కస్టమర్లకు అలర్ట్. సైబర్​ నేరగాళ్లు వాట్సాప్​, ఈ-మెయిల్స్, ఎస్​ఎంఎస్​ల ద్వారా హానికరమైన లింక్​లు (Malicious Links) పంపించి హ్యాకింగ్​కు పాల్పడుతున్నారు. పొరపాటున మీరు ఈ లింక్స్ క్లిక్ చేశారో, ఆర్థికంగా చాలా నష్టపోయే ప్రమాదం ఉంది. జాగ్రత్త!

ICICI Bank Fraud Alert : ఐసీఐసీఐ బ్యాంక్ తమ కస్టమర్లకు ఒక హెచ్చరిక చేసింది. సైబర్ నేరగాళ్లు వాట్సాప్, ఈ-మెయిల్స్​కు, ఎస్​ఎంఎస్​ల ద్వారా పంపిస్తున్న అనుమానాస్పద, హానికరమైన లింక్​లు క్లిక్ చేయవద్దని సూచించింది. పొరపాటున ఈ లింక్​లు క్లిక్ చేస్తే, ఆర్థికంగా తీవ్రంగా నష్టపోయే ప్రమాదం ఉందని హెచ్చరించింది. అలాగే నేరగాళ్లు బ్యాంకు అధికారులలాగా ఫోన్లు కూడా చేస్తున్నారు. వీటిని కూడా నమ్మవద్దని ఐసీఐసీఐ బ్యాంక్ సూచించింది.

ఆర్థికంగా నష్టపోవడం ఖాయం!
మీరు కనుక సైబర్ నేరగాళ్లు పంపించిన లింక్స్ ఓపెన్ చేస్తే, మీ డివైజ్​లోకి హానికరమైన సాఫ్ట్​వేర్లు లేదా అప్లికేషన్​లు ఇన్​స్టాల్ అయిపోతాయి. దీనితో మీ డివైజ్​లో డేటా, బ్యాంకింగ్ వివరాలు వారి చేతికి చిక్కుతాయి. మీకు రావాల్సిన ఓటీపీలు కూడా సైబర్ నేరగాళ్లకే చేరతాయి. దీనితో మీ బ్యాంక్ అకౌంట్​ల్లోని డబ్బులు మొత్తం సైబర్ నేరగాళ్ల దోచుకుంటారు. అందువల్ల కస్టమర్లు తమ స్మార్ట్​ఫోన్​, కంప్యూటర్లలో ఎలాంటి అనుమానాస్పద సాఫ్ట్​వేర్లు, అప్లికేషన్​లు ఇన్​స్టాల్ చేసుకోవద్దని ఐసీఐసీఐ బ్యాంక్ తెలిపింది.

"ఐసీఐసీఐ బ్యాంక్​ ఎప్పుడూ వాట్సాప్ మెసేజ్​లు​, ఎస్​ఎంఎస్​లు చేసి, ఫలానా నంబర్​కు కాల్​ చేయమని, లేదా అప్లికేషన్ డౌన్​లోడ్ చేసుకోమని కస్టమర్లను కోరదు."
- ఐసీఐసీఐ బ్యాంక్​

ఈ జాగ్రత్తలు తప్పనిసరి!
ICICI Bank Provided Safety Tips For Customers : ఐసీఐసీఐ బ్యాంక్ తమ కస్టమర్ల కోసం కొన్ని సేఫ్టీ టిప్స్​ కూడా చెప్పింది. అవేంటో ఇప్పుడు చూద్దాం.

1. కస్టమర్లు తమ మొబైల్​లో లేటెస్ట్ ఆపరేటింగ్ సిస్టమ్​ను, సెక్యూరిటీ ప్యాచెస్​ను అప్​డేట్ చేసుకోవాలి.
2. కేవలం గూగుల్ ప్లేస్టోర్​, యాపిల్ యాప్​ స్టోర్​ల్లోని అధికారిక యాప్​లను మాత్రమే ఇన్​స్టాల్ చేసుకోవాలి.
3. తమ డివైజ్​ల్లో పవర్​ఫుల్ యాంటీ వైరస్​లను ఇన్​స్టాల్ చేసుకోవాలి. వాటిని ఎప్పటికప్పుడు అప్​డేట్ చేస్తూ ఉండాలి.
4. ఏదైనా కొత్త యాప్ ఇన్​స్టాల్ చేసే ముందు, అది ఏయే పర్మిషన్స్​ అడుగుతోందో చెక్ చేసుకోవాలి.
5. అనుమానాస్పద లింక్స్​ను ఎట్టి పరిస్థితుల్లోనూ క్లిక్ చేయకూడదు.
6. హానికరమైన, అనధికారిక అప్లికేషన్​లను ఎప్పుడూ ఓపెన్ చేయకూడదు. ఇన్​స్టాల్ చేసుకోకూడదు.
7. ఓటీపీ, పాస్​వర్డ్, పిన్​, కార్డ్ నంబర్​లను ఎట్టిపరిస్థితుల్లోనూ ఎవరికీ చెప్పకూడదు.
8. అత్యవసరమైతే బ్యాంక్ కస్టమర్ కేర్​కు ఫోన్ చేసి, సహాయం తీసుకోవాలి.
9. అవసరమైతే పోలీసులకు కూడా రిపోర్ట్​ చేయాలి.