హోమ్ లోన్ తీర్చేందుకు EPF ఫండ్స్​ వాడుతున్నారా? అయితే ఈ విషయాలు తెలుసుకోండి! - PF Withdrawal For Home Loan

Home Loan Repayment By Using EPF Funds : మీరు హోమ్ లోన్​ తీర్చడానికి ఈపీఎఫ్ ఫండ్స్​ వాడాలని అనుకుంటున్నారా? అయితే ఇది మీ కోసమే. గృహ రుణం తీర్చడానికి పీఎఫ్​ నిధులను తీసే ముందు, ఈ ఆర్టికల్లో చెప్పిన విషయాలు కచ్చితంగా తెలుసుకోండి.

Home Loan Repayment By Using EPF Funds : ఆర్‌బీఐ రెపో రేటును పెంచిన తర్వాత, బ్యాంకులు గృహ రుణాల వడ్డీ రేట్లను బాగా పెంచాయి. అందుకే చాలా మంది ఈ హోమ్​ లోన్ భారాన్ని తగ్గించుకోవడానికి, ఉద్యోగుల భవిష్య నిధి (ఈపీఎఫ్)ని ఉపయోగించాలని భావిస్తున్నారు. అయితే ఇలా చేసే ముందు కచ్చితంగా కొన్ని కీలకమైన విషయాలు తెలుసుకోవాలి. అవేంటో ఇప్పుడు చూద్దాం.

రిటైర్మెంట్ ప్లాన్
ఈపీఎఫ్ స్కీంలోని సెక్షన్ 68బీబీ ప్రకారం, మీరు హోమ్ లోన్ రీపేమెంట్ కోసం పీఎఫ్ మొత్తాన్ని విత్‌డ్రా చేసుకోవచ్చు. ఇందుకోసం మీ ఇంటిని వ్యక్తిగతంగా లేదా ఉమ్మడిగా పీఎఫ్ సభ్యుని పేరుపై నమోదు చేయాలి. అలాగే మీరు పీఎఫ్ అమౌంట్​​ విత్​డ్రా చేయాలంటే, కనీసం పదేళ్ల పీఎఫ్ రికార్డును కలిగి ఉండాలి. ఐదేళ్ల నిరంతర సర్వీసు పూర్తయిన తర్వాత విత్‌డ్రా చేసుకునే పీఎఫ్ మొత్తంపై ఎలాంటి పన్ను ఉండదు.

వడ్డీ రేట్లను బేరీజు వేసుకోవాలి!
ఈపీఎఫ్ అనేది మీరు పదవీ విరమణ చేసిన తరువాత ఆర్థిక భరోసా కల్పిస్తుంది. అయితే మీరు కెరీర్ ప్రారంభ దశలో ఉన్నట్లయితే, ఈపీఎఫ్​లోని డబ్బులు విత్​డ్రా చేసుకున్న ఫర్వాలేదు. ఎందుకంటే, మీ ఈపీఎఫ్ ఖాతాలోకి మరిన్ని నిధులను తిరిగి జమ చేసుకునేందుకు తగినంత సమయం ఉంటుంది.

హోం లోన్ తీసుకునే ముందు కచ్చితంగా బ్యాంక్​​ వడ్డీ రేట్లు, ఈపీఎఫ్ వడ్డీ రేట్లను సరిపోల్చుకోవాలి. హోమ్​ లోన్ వడ్డీ రేటు బాగా ఎక్కువగా ఉన్నప్పుడు మాత్రమే, మీ ఈపీఎఫ్ నిధులు విత్​డ్రా చేసుకోవాలి. లేకుంటే, ఇతర మార్గాల ద్వారా గృహ రుణం తీర్చేందుకు ప్రయత్నాలు చేయాలి.

పీఎఫ్ నిధులు ఎప్పుడు తీసుకోవాలి?
పీఎఫ్ డబ్బులు మొత్తాన్ని ఎప్పుడూ తీయకూడదు. ఒక వేళ తీయాల్సివచ్చినా, అది చివరి ఆప్షన్​గా మాత్రమే ఉపయోగించాలి. తాత్కాలిక సమస్యల కోసం, చిన్నచిన్న రుణాలు, వడ్డీలు తీర్చడం కోసం పీఎఫ్ నిధులు ఉపయోగించకూడదు. అవసరమైతే మీ సేవింగ్స్, ఎఫ్​డీ అకౌంట్​లు ఉపయోగించి, గృహ రుణం తీర్చడానికి ప్రయత్నించాలి. అవసరమైతే మీ ఈఎంఐ కాలపరిమితిని పెంచుకోవడం, రీపేమెంట్ కోసం ఇతర మార్గాలను వెతకడం చేయాలి. ఇలా వీలైనంత వరకు పీఎఫ్ నిధులు ఉపయోగించకపోవడమే మంచిది.