Gold Price Forecast In 2025 : భౌగోళిక రాజకీయ ఒత్తిళ్లు, ప్రపంచ ఆర్థిక అనిశ్చితులు ఇలానే కొనసాగితే 2025లోనూ బంగారం ధరలు బాగా పెరిగే ఛాన్స్ ఉందని ఆర్థిక నిపుణులు అంచనా వేస్తున్నారు. నూతన సంవత్సరంలో 10 గ్రాముల బంగారం ధర రూ.85,000 నుంచి రూ.90,000 వరకు పెరిగే అవకాశం ఉందంటున్నారు.
ప్రభుత్వాల ద్రవ్య విధానాలు, సెంట్రల్ బ్యాంకుల బంగారం కొనుగోళ్లు ఇప్పటిలానే కొనసాగితే, బంగారానికి డిమాండ్ పెరుగుతూ ఉంటుంది. ఒకవేళ భౌగోళిక రాజకీయ సంక్షోభాలు తగ్గి, రూపాయి విలువ క్షీణిస్తే బంగారం ధరలు తగ్గే అవకాశం ఉంటుందని ఆర్థిక నిపుణులు చెబుతున్నారు.
ప్రస్తుతం స్పాట్ మార్కెట్లో 10 గ్రాముల బంగారం ధర రూ.79,350 వరకు ఉంది. మల్టీ కమోడిటీ ఎక్స్ఛేంజ్ (MCX)లో 10 గ్రాముల బంగారం ధర రూ.76,600 వరకు ఉంది.
ఆల్ టైమ్ రికార్డ్ హై
ఈ 2024లో దేశీయ మార్కెట్లో బంగారం ధరలు రికార్డ్ స్థాయిలో పెరిగి, మదుపరులకు దాదాపు 23 శాతం రాబడిని సాధించి పెట్టాయి. ముఖ్యంగా ఈ ఏడాది అక్టోబర్ 30న 10 గ్రాముల బంగారం ధర ఏకంగా రూ.82,400కు చేరుకుని ఆల్ టైమ్ హైరికార్డ్ను నెలకొల్పింది. ఈ ఏడాది వెండి కూడా మదుపరులకు అద్భుతమైన (30 శాతం వరకు) లాభాలను తెచ్చిపెట్టింది. ఒక కేజీ వెండి ధర రూ.1 లక్ష రూపాయలు దాటింది.
ఇక గ్లోబల్ మార్కెట్ విషయానికి వస్తే, ఈ ఏడాది ప్రారంభంలో కోమెక్స్ గోల్డ్ ఫ్యూచర్స్లో ఔన్స్ బంగారం ధర 2,062 డాలర్ల వద్ద ప్రారంభమైంది. అక్టోబర్ 31 నాటికి 2,790 డాలర్ల గరిష్ఠ స్థాయికి చేరింది. దీనితో మదుపరులకు ఏకంగా 28 శాతం మేర లాభం వచ్చింది. భౌగోళిక రాజకీయ ఉద్రిక్తతలు కొనసాగుతున్న సమయంలో బంగారం- మదుపరులకు మంచి పెట్టుబడి అవకాశాన్ని కల్పించింది.
2025లోనూ లాభాల పంటే?
ఇప్పుడున్న భౌగోళిక రాజకీయ ఉద్రిక్తతలు, కేంద్ర బ్యాంకుల బంగారం కొనుగోళ్లు ఇలాగే కొనసాగితే, సెంట్రల్ బ్యాంకులు ఇప్పటిలానే కీలక వడ్డీ రేట్లను తక్కువగానే ఉంచితే, 2025లోనూ బంగారం మంచి పనితీరు కనబరిచే అవకాశం ఉందని నిపుణులు భావిస్తున్నారు.
"2025లో బంగారం ఔట్లుక్ బాగానే ఉంది. కానీ 2024తో పోలిస్తే బంగారం వృద్ధి రేటు కాస్త మితంగానే ఉండవచ్చు. కానీ భౌగోళిక రాజకీయ ఉద్రిక్తతలు ఇలానే కొనసాగినా, లేక మరింత తీవ్రరూపం దాల్చినా, కొత్త ఏడాదిలో బంగారం ధరలు రూ.85,000 నుంచి రూ.90,000 వరకు పెరగవచ్చు. వెండి ధరలు కూడా రూ.1.1లక్షల నుంచి రూ.1.25 లక్షల వరకు పెరిగే ఛాన్స్ ఉంది."
- జతిన్ త్రివేది, ఎల్కేపీ సెక్యూరిటీస్ వీపీ రీసెర్చ్ అనలిస్ట్(కమొడిటీ అండ్ కరెన్సీ)
ఇవి కూడా ప్రభావం చూపించవచ్చు!
కేంద్ర బ్యాంకులు కీలక వడ్డీ రేట్లను పెంచడం, తగ్గించడం చేస్తుంటాయి. ఒక వేళ సెంట్రల్ బ్యాంకులు వడ్డీ రేట్లు తగ్గిస్తే, మార్కెట్లోకి ధన ప్రవాహం పెరుగుతుంది. ఫలితంగా యూఎస్ డాలర్ బలహీనపడుతుంది. ఇలాంటి పరిస్థితుల్లో బంగారం, వెండి ధరలు పెరిగే అవకాశం ఉంటుందని జతిన్ త్రివేది అన్నారు. ఒక వేళ యూఎస్ ఫెడరల్ రిజర్వ్ కీలక వడ్డీ రేట్లను పెంచితే, బంగారం ధరలు పడిపోయేందుకు ఆస్కారం ఉంటుందని పేర్కొన్నారు.
ఏది ఏమైనప్పటికీ ప్రస్తుతం చాలా కేంద్ర బ్యాంకులు బంగారం కొనుగోళ్లకు మొగ్గు చూపుతున్నాయి. పెట్టుబడుల విషయంలో వైవిధ్యీకరణ వ్యూహాలను అనుసరిస్తున్నాయి. పైగా ఇప్పుడు కరెన్సీల స్థిరత్వంపై ప్రపంచవ్యాప్తంగా ఆందోళనలు ఉన్నాయి. కనుక బులియన్ మార్కెట్కు ఇవన్నీ కలిసి వస్తాయని త్రివేది చెబుతున్నారు.
2024లో బంగారానికి రెక్కలు రావడానికి కారణం ఇదే!
'2024లో ఇరాన్-ఇజ్రాయెల్ యుద్ధం, రష్యా-ఉక్రెయిన్ యుద్ధాల వల్ల ప్రపంచ భయం గుప్పిట్లోకి పోయింది. దీనితో మదుపరులు సురక్షిత పెట్టుబడి మార్గమైన బంగారం, వెండి వైపు మొగ్గుచూపారు.' అని త్రివేది వివరించారు.
అయితే 'భౌగోళిక రాజకీయ, ఆర్థిక అనిశ్చితులు ఇప్పుడు కాస్త తగ్గుముఖం పట్టాయని, అందువల్ల ఇప్పుడు బంగారం, వెండి ధరల పెరుగుదల కాస్త నెమ్మదించింది' అని కమెట్రెండ్జ్ రీసెర్చ్ సహవ్యవస్థాపకుడు, ఈసీఓ జ్ఞానశేఖర్ త్యాగరాజన్ తెలిపారు.
అంతా ట్రంప్ చేతిలోనే ఉంది!
'అమెరికా అధ్యక్షుడిగా ఎన్నికైన డొనాల్డ్ ట్రంప్ కొత్త సంవత్సరంలో అధికారం చేపట్టనున్నారు. ఆయన ఇప్పటికే పలు దేశాలపై దిగుమతులపై సుంకాలు విధిస్తామని హెచ్చరిస్తున్నారు. మరోవైపు యూఎస్ ఫెడరల్ రిజర్వ్ ద్రవ్యోల్బణాన్ని 2 శాతానికి తగ్గించాలని లక్ష్యంగా పెట్టుకుంది. కనుక మే తరువాత ఫెడ్ కీలక వడ్డీ రేట్లలో కోత పెట్టినా ఆశ్చర్యపోనవసరం లేదు. ఇవన్నీ బులియన్ మార్కెట్పై తీవ్ర ప్రభావం చూపించే అవకాశం ఉంది' అని జ్ఞానశేఖర్ విశ్లేషించారు.
'2025 మొదటి అర్ధభాగంలో బంగారం ఔట్లుక్ బేరిష్గా ఉంది. అంటే బంగారం ధరలు తగ్గే ఛాన్స్ ఉంది. బహుశా ఔన్స్ బంగారం ధర 2,455కు (ఎంసీఎక్స్ : రూ.73,000 - రూ.73,500) వరకు పడిపోయే అవకాశం ఉంది' అని జ్ఞానశేఖర్ అభిప్రాయపడ్డారు.
కొత్త ఏడాదిలో రూపాయి మరింత క్షీణించే అవకాశం ఉందని, కాబట్టి అంతర్జాతీయ మార్కెట్ ధరలతో పోల్చితే, స్థానికంగా ధరల పతనం అంతగా ఉండకపోవచ్చని జ్ఞానశేఖర్ అంచనా వేస్తున్నారు.
దిగుమతి సుంకాలు తగ్గించడం వల్ల కలిసొచ్చింది!
కేంద్ర ప్రభుత్వం ఈ ఏడాది జులైలో బంగారం దిగుమతి సుంకాన్ని 6 శాతం వరకు తగ్గించింది. దీనితో బంగారం ధరలు దాదాపు 7 శాతం వరకు తగ్గాయి. అంటే 10 గ్రాముల బంగారంపై దాదాపు రూ.5000 వరకు తగ్గింది.
పెళ్లిళ్లు, పండుగల సీజన్లో
ఓ వైపు బంగారం ధరలు తగ్గడం, మరోవైపు పండుగలు, పెళ్లిళ్ల సీజన్ రావడం వల్ల భారత్లో భౌతిక బంగారాన్ని బాగా డిమాండ్ పెరిగింది. దీని వినియోగదారులు, ఆభరణాల వ్యాపారులు ఇద్దరూ లాభపడ్డారు.
"బంగారు ఆభరణాలు వినియోగం 2024లో 17 శాతం మేర పెరిగింది. ప్రధానంగా పండుగలు, వివాహాల వల్ల విపరీతంగా డిమాండ్ పెరిగింది. 2024 జులైలో కేంద్ర ప్రభుత్వం బంగారంపై దిగుమతి సుంకాలను 900 బేసిస్ పాయింట్ల వరకు తగ్గించింది. దీనితో రేట్లు తగ్గి, ఆభరణాలు, గోల్డ్ బార్లు, నాణేలకు అమాంతం డిమాండ్ పెరిగింది."
- రాహుల్ కలంత్రి, కమొడిటీస్ వైస్ ప్రెసిడెంట్, మెహతా ఈక్విటీస్ లిమిటెడ్
ఇక్రా లిమిటెడ్ సీనియర్ వైస్ ప్రెసిడెంట్ శ్రీకుమార్ కృష్ణమూర్తి ప్రకారం, 2019 నుంచి 2024 ఆర్థిక సంవత్సరాల్లో బంగారం సగటున 11 శాతం చొప్పున వార్షిక వృద్ధి రేటు నమోదు చేసింది.
'2024లో దేశంలోని టియర్ 2, టియర్ 3 నగరాల్లో బంగారం దుకాణాలు పెరిగాయి. బ్రాండెడ్ ఆభరణాల కొనుగోలుకు ప్రజలు మొగ్గు చూపుతున్నారు. దీనికి తోడు రుతుపవనాలు అనుకూలంగా ఉండి, గ్రామీణ, వ్యవసాయ ఉత్పత్తులు పెరిగాయి. కస్టమ్స్ సుంకం తగ్గింది. ఇవన్నీ బంగారం వ్యాపారానికి మంచి దన్నుగా నిలిచాయి' అని కృష్ణమూర్తి పేర్కొన్నారు.
టన్నుల కొద్దీ బంగారం కొనుగోలు
"2024లో రిజర్వ్ బ్యాంక్ ఆఫ్ ఇండియాతో సహా, ప్రపంచంలోని చాలా కేంద్ర బ్యాంకులు 500 టన్నులకు మించి బంగారాన్ని కొనుగోలు చేశాయి. దీనితో బంగారానికి ప్రపంచవ్యాప్తంగా గణనీయంగా డిమాండ్ పెరిగింది. ఆర్థిక అనిశ్చితి పరిస్థితుల మధ్య తమ బంగారు నిల్వలను పెంచుకునేందుకు కేంద్ర బ్యాంకులు ఈ వ్యూహాన్ని అనుసరించాయి" అని మోతీలాల్ ఓస్వాల్ ఫైనాన్సియల్ సర్వీసెస్ లిమిటెడ్, కమొడిటీ రీసెర్చ్ అనలిస్ట్ మానవ్ మోదీ పేర్కొన్నారు.
నవంబర్లో భారతదేశం రికార్డ్ స్థాయిలో 14.86 బిలియన్ డాలర్ల విలువైన బంగారాన్ని దిగుమతి చేసుకుంది. ప్రధానంగా పండుగలు, పెళ్లిళ్ల డిమాండ్ వల్ల బంగారం దిగుమతి నాలుగు రెట్లు పెరిగింది.
ఊహించని ట్విస్ట్
అమెరికా అధ్యక్షుడిగా డొనాల్డ్ ట్రంప్ రెండోసారి ఎన్నికవ్వడం బులియన్ మార్కెట్లకు ఊహించని ట్విస్ట్ ఇచ్చింది. క్రిప్టోకరెన్సీ పట్ల ట్రంప్ సానుకూలంగా ఉండడం వల్ల డిజిటల్ ఆస్తుల్లో ర్యాలీ మొదలైంది. ట్రెజరీ రాబడులు పెరిగాయి. దీని వల్ల చాలా మంది పెట్టుబడిదారులు బంగారం నుంచి తమ ఇన్వెస్ట్మెంట్లను వాటిలోకి మళ్లించారు. అంతేకాదు 2024 ద్వితీయార్థంలో ఎక్స్ఛేంజ్ ట్రేడెడ్ ఫండ్స్ (ఈటీఎఫ్) అవుట్ఫ్లోలు కూడా పెరిగాయి. ఇది కూడా బంగారం ధరలపై ఒత్తిడి పెంచింది. ఒకవేళ యూఎస్ ఫెడరల్ రిజర్వ్ 2025లో కీలక వడ్డీ రేట్లను పెంచినా, లేదా వడ్డీ రేట్ల తగ్గింపు పెద్దగా లేకపోయినా బంగారంపై లాభాలు తగ్గవచ్చు.
డోంట్ వర్రీ - లాభాలు వస్తాయ్!
"ఎన్ని ప్రతికూలతలు ఉన్నప్పటికీ, 2025లో బంగారంపై రెండంకెల రాబడి వస్తుంది. అంతర్జాతీయ మార్కెట్లో ఔన్స్ బంగారం ధర 3200 డాలర్లకు చేరుకోవచ్చు. ఎంసీఎక్స్లో 10 గ్రాముల బంగారం ధర రూ.87,000 చేరుకోవచ్చు"
- ప్రథమేశ్ మాల్యా, ఏంజెల్ వన్ డీవీపీ రీసెర్చ్, నాన్-అగ్రి కమొడిటీస్ అండ్ కరెన్సీ
భారత్లో బంగారు నిల్వలు
అంతర్జాతీయ ద్రవ్యనిధి (డబ్ల్యూజీసీ) డేటా ప్రకారం, భారతదేశం 2024 అక్టోబర్లో 27 టన్నుల బంగారాన్ని దిగుమతి చేసుకుంది. చైనా అయితే ప్రపంచంలోనే అతిపెద్ద బంగారం కొనుగోలుదారుగా నిలిచింది.
ఇదిలా ఉండగా, 'దేశీయ డిమాండ్, బలమైన ఎగుమతి సామర్థ్యం, డిజిటలైజేషన్ మొదలైన వాటి వల్ల 2025 బంగారు పరిశ్రమకు చాలా సానుకూలంగా ఉంటుందని' ఆల్ ఇండియా జెమ్అండ్ జ్యువెలరీ డొమస్టిక్ కౌన్సిల్ ఛైర్మన్ సయామ్ మెహ్రా పేర్కొన్నారు.
గ్లోబల్ హబ్గా భారత్
"భారత రత్నాలు, అభరణాల పరిశ్రమకు దేశీయ డిమాండ్ ఉంది. అలాగే మనకు ఎగుమతి సామర్థ్యం కూడా బాగానే ఉంది. కనుక 2025లో 1000 బిలియన్ డాలర్ల వ్యాపారం జరగవచ్చని అంచనా. ఆభరణాల ఉత్పత్తి, ఎగుమతి, వినియోగానికి భారత్ అతిపెద్ద గ్లోబల్ హబ్గా మారుతుంది" అని సయామ్ మెహ్రా అభిప్రాయపడ్డారు. స్థానికంగా, ప్రపంచవ్యాప్తంగా ఉన్న బలమైన డిమాండ్ ఉండడం వల్ల ఈ రంగం 5-6 శాతం వరకు సమ్మేళన వార్షిక వృద్ధి రేటు సాధించే అవకాశం ఉందని మెహ్రా పేర్కొన్నారు.
