Reasons Why Credit Card Application Rejected : ప్రస్తుత కాలంలో పెరుగుతున్న ఖర్చులు, ఆర్థిక అవసరాలరీత్యా క్రెడిట్ కార్డులు ఎంతగానో ఉపయోగపడుతున్నాయి. అలాగే మరికొందరు బ్యాంకుల నుంచి లోన్ తీసుకుంటారు. అయితే రుణ గ్రహీతలకు రుణ సంస్థలు క్రెడిట్ కార్డు, లోన్ ఇచ్చేముందు పలు విషయాలను పరిగణలోకి తీసుకుంటాయి. వీటి ఆధారంగానే లోన్లు, క్రెడిట్ కార్డులను మంజూరు చేస్తాయి. అందుకే రుణదాతలు లోన్, క్రెడిట్ కార్డు దరఖాస్తు తిరస్కరణకు గురయ్యేందుకు అవకాశం ఉన్న ముఖ్యమైన 8 కారణాలను తెలుసుకోవడం చాలా ముఖ్యం. ఈ తప్పులను చేయకపోతే ఈజీగాలోన్, క్రెడిట్ కార్డును పొందొచ్చు.
పేలవమైన క్రెడిట్ హిస్టరీ
క్రెడిట్ కార్డ్, లోన్ ప్రొవైడర్లు మీ అప్లికేషన్ పై నిర్ణయం తీసుకునే ముందు మీ క్రెడిట్ హిస్టరీని చెక్ చేస్తాయి. మీరు గతంలో రుణాన్ని తీసుకుని తిరిగి సరిగ్గా చెల్లించకపోవడం, అలాగే సమయానికి లోన్లు, బిల్లులు కట్టకపోవడం వంటి వాటిని పరిగణలోకి తీసుకుంటాయి. అలాగే క్రెడిట్ స్కోర్ ను కూడా పరిశీలించి లోన్లు, క్రెడిట్ కార్డులను జారీ చేస్తాయి. అందుకే క్రెడిట్ స్కోర్ 750 పాయింట్లకు పైగా ఉంటేటట్లు చూసుకోవడం ముఖ్యం. ఏదేమైనప్పటికీ లోన్, క్రెడిట్ కార్డ్ మంజూరుపై తుది నిర్ణయం మాత్రం వాటిని జారీ చేసే బ్యాంకులదేననే విషయం మాత్రం గుర్తుంచుకోండి. క్రెడిట్ కార్డు బిల్లులు, లోన్ ఈఎంఐలు సకాలంలో చెల్లిస్తే క్రెడిట్ స్కోర్ తగ్గకుండా మెరుగ్గా ఉంటుంది. అలాగే తక్కువ వ్యవధిలో ఎక్కువ క్రెడిట్ కార్డులు, లోన్ల కోసం దరఖాస్తు చేసినా మీ అప్లికేషన్ రిజెక్ట్ అయ్యే అవకాశం ఉందని గుర్తుపెట్టుకోండి.
వయసు కూడా ముఖ్యమే
లోన్, క్రెడిట్ కార్డు పొందేందుకు కనీస వయసు 18 ఏళ్లు. అయినప్పటికీ రుణదాతలు 18-21 మధ్య వయసున్నవారికి చెల్లబాటు అయ్యే ఆదాయం, అలాగే దరఖాస్తుపై సాక్షి సంతకం లేని పక్షంలో దాన్ని తిరస్కరిస్తాయి.
అస్థిర ఉద్యోగాలు
అలాగే క్రెడిట్ కార్డు, లోన్ జారీ చేసే సంస్థలు మీ ఉద్యోగాన్ని కూడా పరిగణలోకి తీసుకుంటాయి. ఉద్యోగులు తిరిగి రుణం చెల్లించే సామర్థ్యాన్ని పరిశీలిస్తాయి. 1-2 ఏళ్లు ఒకే కంపెనీలో ఉద్యోగం చేస్తే ఫర్వాలేదు. ప్రతి ఆరునెలకొకసారి ఉద్యోగాలు మారుతుంటే మీ దరఖాస్తు తిరస్కరణకు గురయ్యే అవకాశం ఉంది.
తక్కువ ఆదాయం
క్రెడిట్ కార్డు, లోన్ అప్లికేషన్ తిరస్కరణకు గురికావడంలో మీ ఆదాయం కూడా కీలక పాత్ర పోషిస్తుంది. మీరు కనీస బకాయి మొత్తాన్ని చెల్లించగలరో లేదో చెక్ చేస్తాయి. మీరు లోన్, క్రెడిట్ కార్డ్ కోసం దరఖాస్తు చేయాలనుకుంటున్న బ్యాంకు నిర్ణయించిన కనీస ఆదాయ ప్రమాణాలకు అనుగుణంగా లేకుంటే మీ అప్లికేషన్ తిరస్కరణకు గురికావచ్చు.
ఫిజికల్ వెరిఫికేషన్
లోన్ ను మంజూరు చేసే ముందు క్రెడిట్ కార్డు జారీ చేసే సంస్థలు, బ్యాంకులు ఇల్లు, కార్యాలయంలో ఫిజికల్ వెరిఫికేషన్ చేస్తాయి. ఈ ప్రక్రియ ద్వారా మీ స్థిరత్వం, జీవన ప్రమాణాలను నిర్ధరిస్తారు. మీరు అప్లికేషన్ లో పేర్కొనవాటికి భిన్నంగా వారు ఫిజికల్ గా చూసినప్పుడు ఉంటే మీ దరఖాస్తును తిరస్కరించవచ్చు. ఉదా: ఇంటి చిరునామా, ఆఫీసు అడ్రస్ తప్పుగా ఇవ్వడం వంటివి.
ఎక్కువ ఈఎంఐలు చెల్లిస్తున్నట్లైతే
రుణ గ్రహీత ఇప్పటికే పలు ఈఎంఐలను చెల్లించడం, అలాగే మీ ఈఎంఐ నెలవారీ ఆదాయంలో 50 శాతం కంటే ఎక్కువగా ఉంటే మీ లోన్ అప్లికేషన్ రిజెక్ట్ కావొచ్చు. అలాగే ఇప్పటికే ఎక్కువ క్రెడిట్ కార్డులను తీసుకున్నట్లైతే మీ దరఖాస్తు తిరస్కరణకు గురయ్యే అవకాశం ఉంది.
బ్యాంకింగ్
రుణదాతలు లోన్ తీసుకునేవారి అర్హతను పరిశీలించడం కోసం వారి బ్యాంక్ ఖాతాలను చెక్ చేస్తారు. మీకు జీతం సకాలంలో పడుతుందా, చెక్ బౌన్స్ తదితర వివరాలను పరిశీలిస్తారు. ఉద్యోగులు అయితే తమ ఆరు నెలల శాలరీ స్టేట్ మెంట్లు, ఉపాధి పొందుతున్నవారు అయితే 12 నెలల బ్యాంకు స్టేట్ మెంట్స్ ను క్రెడిట్ జారీ సంస్థలకు సమర్పించాల్సి ఉంటుంది. మీ స్టేట్ మెంట్స్ లో ఇన్‌ వర్డ్ చెక్ రిటర్న్స్, మినిమమ్ బ్యాలెన్స్ ఛార్జీలు ఉండకూడదు.
ఆస్తి విషయాల్లోనూ జాగ్రత్త
మీ తనఖా రుణాన్ని ఆమోదించే ముందు బ్యాంకులు, ఆర్థిక సంస్థలు కొన్ని విషయాలను పరిశీలిస్తాయి. మీ తాకట్టు పెట్టిన ఆస్తి విలువ, నిర్మాణ రకం, నాణ్యత, ప్రాంతం వంటివాటిని పరిశీలిస్తాయి. అలాగే మీరు తనఖా పెట్టాలనుకునే ఆస్తి తాలుక టైటిల్స్ లేదా ప్రాపర్టీ డాక్యుమెంట్స్ అందించాలని కోరుతాయి. ఇలాంటేవేవీ సరిగ్గా లేకపోయినా మీ లోన్ తిరస్కరణకు గురికావొచ్చు.
మీ క్రెడిట్ స్కోర్ పెరగాలా? ఈ అపోహలు అస్సలు పెట్టుకోవద్దు! - Tips To Increase Credit Score
