SC Asks Centres Stand Shariat Law : ముస్లిం వ్యక్తిగత చట్టం-షరియత్ నుంచి తనను మినహాయించాలని ఓ మహిళ వేసిన పిటిషన్పై సుప్రీం కోర్టు కేంద్రం అభిప్రాయాన్ని అడిగింది. ముస్లింలను మినహాయించడం సహా భారతీయ వారసత్వ చట్టంలోని ఇతర నిబంధనలను సవాలు చేయడానికి వీలుగా పిటిషన్ను సవరించడానికి పిటిషనర్కు అనుమతి ఇచ్చింది. సీజేఐ జస్టిస్ సంజీవ్ ఖన్నా, జస్టిస్ సంజయ్ కుమార్, కేవీ విశ్వనాథన్ ధర్మాసనం ఈ పిటిషన్ను మంగళవారం పరిశీలించింది. దీనిపై నాలుగు వారాల్లో కౌంటర్ దాఖలు చేయాలని కేంద్రాన్ని ఆదేశించింది. దీనిపై మే 5 నుంచి వాదనలు వింటామని తెలిపింది.
ఇదీ కేసు
కేరళకు చెందిన షఫియా పీఎమ్ 'ఎక్స్-ముస్లిమ్స్ ఆఫ్ కేరళ' అనే బృందానికి ప్రధాన కార్యదర్శిగా వ్యవహరిస్తున్నారు. ఇందులో ఇస్లాంను వదులుకున్న వారు ఉంటారు. తనను ముస్లిం వ్యక్తిగత చట్టం షరియత్ కాకుండా భారతీయ వారసత్వం చట్టం ప్రకారం పాలించాలని సుప్రీం కోర్టు పిటిషన్ దాఖలు చేశారు షఫియా. తాను అధికారికంగా ఇస్లాం విడిచిపెట్టలేదని, ఆర్టికల్ 25 ప్రకారం మతానికి సంబంధించి తనకున్న ప్రాథమిక హక్కులు ఉపయోగించుకుంటున్నట్లు తెలిపారు.
ముస్లిం పర్సనల్ చట్టం కింద ఉండటానికి ఇష్టపడని వారిని, 'సెక్యులర్ చట్టం' అయిన భారతీయ వారసత్వం చట్టం,1925 కింద పరిగణించడానికి అనుమతించాలని సుప్రీంకోర్టును కోరారు పిటిషనర్. ఇండియన్ యంగ్ లాయర్స్ అసోషియేషన్ వర్సెస్ స్టేట్ ఆఫ్ కేరళ శబరిమల కేసు) తీర్పు ప్రకారం- రాజ్యాంగంలోని ఆర్టికల్ 25 ప్రకారం మతానికి సంబంధించిన ప్రాథమిక హక్కుల్లో నమ్మడం లేదా నమ్మకపోవడం అనే హక్కు ఉండాలని వాదించారు. అంటే ఎవరైనా వ్యక్తి తన విశ్వాసాన్ని(మతం) విడిచిపెడితే సదరు వ్యక్తికి వారసత్వం, ఇతర ముఖ్యమైన పౌర హక్కుల విషయంలో ఎలాంటి అనర్హత ఉండకూడదని పేర్కొన్నారు. దేశవ్యాప్తంగా జరిగిన పరిణామాలను ఎత్తిచూపుతూ, ధర్మాసనం ఈ విషయంలో జోక్యం చేసుకోవాలని పిటిషనర్ కోరారు.
ఇదివరకే సుప్రీం కోర్టు పెండింగ్లో ఉన్న కేసుకు ఈ వ్యాజ్యం భిన్నం అని పిటిషనర్ కోర్టుకు తెలిపారు. 'షరియత్ చట్టం ప్రకారం ఇస్లాం మతాన్ని విడిచిపెట్టిన వ్యక్తిని సంఘం నుంచి బహిష్కరిస్తారు. తర్వాత వారికి తల్లిదండ్రుల ఆస్తిలో ఎలాంటి వారసత్వం హక్కు ఉండదు' అని పిటిషన్లో పేర్కొన్నారు. ఇలాంటి పరిస్థితి నెలకొన్నందున తన కుమార్తె విషయంలో పిటిషనర్ ఆందోళన వ్యక్తం చేశారు. షరియత్ చట్టంలోని సెక్షన్ 2,3లో ఉన్న అంశాలు తనను నియంత్రించకుండా ఆదేశాలు జారీ చేయాలని కోర్టుకు విజ్ఞప్తి చేశారు. ఆ చట్టంలో అస్పష్టత ఉందని, న్యాయపరమైన విచారణ ద్వారా సరిచేయవచ్చని పిటిషన్లో పేర్కొన్నారు.
ప్రస్తుతం- మతం, కులం లేదని సర్టిఫికేట్ పొందినప్పటికీ భారత వారసత్వ చట్టం కిందకు రామని పిటిషన్లో పేర్కొన్నారు. ఆర్టికల్ 25 కింద మతాన్ని ఆచరించాలా వద్దా అనే విలువైన ప్రాథమిక హక్కులకు- చట్టం నుంచి రక్షణ లేకపోతే అవి అర్ధరహితం అని వాదించారు.
