IRCTC Madhya Pradesh Jyotirlinga Darshan Package: ద్వాదశ జ్యోతిర్లింగాలను దర్శించుకోవాలని చాలా మందికి ఉంటుంది. కానీ అక్కడికి వెళ్లడం, టికెట్ల బుకింగ్ వంటి పలు వివరాలు తెలియక ప్రయాణాలను వాయిదా వేసుకుంటారు. అయితే అలాంటివారు ఇకపై ఎటువంటి టెన్షన్ లేకుండా ఇండియన్‌ రైల్వే కేటరింగ్‌ అండ్‌ టూరిజం కార్పొరేషన్‌ తీసుకొచ్చిన ప్యాకేజీ ద్వారా మధ్యప్రదేశ్లో ఉన్న రెండు జ్యోతిర్లింగాలను దర్శించుకోవచ్చు. మరి ఆ ప్యాకేజీ ఏంటి? ధర ఎంత? ఏఏ ప్రదేశాలు కవర్ అవుతాయి? అనే వివరాలు ఈ స్టోరీలో చూద్దాం..
మధ్యప్రదేశ్లో రెండు జ్యోతిర్లింగాలు ఉన్నాయి. ఒకటి ఉజ్జయిని మహా కాళేశ్వరుని ఆలయం, రెండోది ఓంకారేశ్వర ఆలయం. ఈ రెండింటితో పాటు మరికొన్ని ఆలయాలను సందర్శించుకునేందుకు వీలుగా.. IRCTC మధ్యప్రదేశ్ జ్యోతిర్లింగ దర్శన్‌ (MADHYA PRADESH JYOTIRLINGA DARSHAN) పేరుతో ప్యాకేజీ తీసుకొచ్చింది. కాచిగూడ నుంచి ఈ రైలు మొదలవుతుంది. ఐదు రాత్రులు, ఆరు పగళ్లు ఈ టూర్ కొనసాగుతుంది. ప్రతి బుధవారం ఈ రైలు అందుబాటులో ఉంటుంది.
ప్రయాణం వివరాలు ఇలా..
- మొదటి రోజు కాచిగూడలో సాయంత్రం 4:40 గంటలకు సంపర్క్ క్రాంతి ఎక్స్ప్రెస్ రైలు (ట్రైన్‌ నెం.12707) బయల్దేరుతుంది. రాత్రంతా జర్నీ ఉంటుంది.
- రెండో రోజు ఉదయం 8:15 గంటలకు భోపాల్‌ రైల్వే స్టేషన్కు చేరుకుంటారు. అక్కడ ముందుగానే బుక్‌ చేసిన హోటల్‌కు తీసుకెళ్తారు. కాసేపు విశ్రాంతి తీసుకున్న తర్వాత సాంచి స్థూపం చూడటానికి వెళ్తారు. ఆ తర్వాత భోజేశ్వర్ మహాదేవ్ టెంపుల్ను దర్శించుకోవాలి. తిరిగి భోపాల్‌ చేరుకొని ట్రైబల్‌ మ్యూజియం వీక్షిస్తారు. రాత్రి భోపాల్‌లోనే స్టే ఉంటుంది.
- మూడో రోజు టిఫెన్‌ చేశాక ఉజ్జయినికి బయల్దేరుతారు. హోటల్లో చెకిన్ అయిన తర్వాత ఉజ్జయిని లోని ఆలయాలైన శ్రీ మహాకాళేశ్వర ఆలయం, హరసిద్ధి ఆలయం, మంగళనాథ్ ఆలయం, నవగ్రహ శని మందిరం, శ్రీ చింతామన్ గణేష్ ఆలయం, రామ్ ఘాట్, శ్రీ గఢ్కాళికా ఆలయాల్ని దర్శించుకుంటారు. ఆ రాత్రి ఉజ్జయినిలోనే బస ఉంటుంది.
- నాలుగో రోజు ఉదయం బ్రేక్ఫాస్ట్ తర్వాత మహేశ్వర్కు స్టార్ట్ అవుతారు. అక్కడ అహిల్యాదేవి కోట, నర్మదా ఘాట్‌ను సందర్శిస్తారు. అక్కడి నుంచి ఓంకారేశ్వర్కు బయలుదేరుతారు. అక్కడ ఓంకారేశ్వర దేవాలయాన్ని దర్శించుకోవాలి. రాత్రికి ఓంకారేశ్వర్లో బస ఉంటుంది.
- ఐదో రోజు ఉదయం టిఫిన్‌ చేశాక ఇందౌర్కు బయల్దేరుతారు. అక్కడ లాల్బాగ్ ప్యాలెస్, గణేష్ మందిరాన్ని దర్శించుకుంటారు. ఆ తర్వాత ఇందౌర్ రైల్వే స్టేషన్కు వెళ్తారు. రాత్రి 8 గంటలకు యశ్వంత్‌పూర్‌ ఎక్స్ప్రెస్ రైలు (ట్రైన్‌ నెం: 19301)లో కాచిగూడకు బయల్దేరుతారు. ఆ రోజు రాత్రంతా జర్నీ ఉంటుంది.
- ఆరో రోజు రాత్రి 10 గంటలకు కాచిగూడ రైల్వే స్టేషన్ చేరుకోవటంతో యాత్ర పూర్తవుతుంది.
ప్యాకేజీ ధరలు చూస్తే:
1 - 3 ముగ్గురు వ్యక్తులు బుక్‌ చేసుకుంటే..
- కంఫర్ట్‌లో ఒక్కో ప్రయాణికుడికి సింగిల్ షేరింగ్కి రూ.35,880, ట్విన్ షేరింగ్‌కు రూ.20,180, ట్రిపుల్ షేరింగ్‌కు రూ.15,750 చెల్లించాలి. 5 - 11 ఏళ్ల మధ్య చిన్నారులకు విత్ బెడ్‌కు రూ.11,910, విత్ అవుట్ బెడ్ అయితే రూ.10,020 చెల్లించాలి.
- స్టాండర్ట్‌లో సింగిల్ షేరింగ్కి రూ.33,390, ట్విన్ షేరింగ్‌కు రూ.17,700, ట్రిపుల్ షేరింగ్‌కు రూ.13,260. ఇక 5-11 ఏళ్ల మధ్య చిన్నారులకు విత్ బెడ్‌తో రూ.9,420, అదే విత్ అవుట్ బెడ్ అయితే రూ. 7,530 చెల్లించాలి.
నలుగురు నుంచి ఆరుగురు కలిసి బుక్‌ చేసుకుంటే..
- కంఫర్ట్‌లో డబుల్‌ షేరింగ్‌కు రూ.16,580, ట్రిపుల్ షేరింగ్‌కు రూ.14,210 చెల్లించాలి. 5-11 ఏళ్ల మధ్య చిన్నారులకు విత్ బెడ్ అయితే రూ. 11,910, విత్ అవుట్ బెడ్ అయితే రూ.10,020 చెల్లించాలి.
- స్టాండర్డ్‌లో డబుల్‌ షేరింగ్‌కు రూ. 14,100, ట్రిపుల్ షేరింగ్‌కు రూ.11,720 చెల్లించాలి. 5-11 ఏళ్ల మధ్య చిన్నారులకు విత్ బెడ్‌తో రూ.9,420, విత్ అవుట్ బెడ్ అయితే రూ. 7,530 చెల్లించాలి.
- ప్రస్తుతం ఈ టూర్ జులై 3వ తేదీన స్టార్ట్ అవుతుంది. ఈ టూర్‌కు సంబంధించిన ఇతర వివరాలు, టికెట్ల బుకింగ్ కోసం ఈ లింక్పై క్లిక్‌ చేయండి.
