'వాహనాలు మాట్లాడుకుంటాయ్'- రోడ్డు ప్రమాదాలు తగ్గించేలా 'ఐఐటీ' సాంకేతికత

IIT Jodhpur Vehcle Technology : రోడ్డు ప్రమాదాలు తగ్గించేలా ఐఐటీ జోధ్​పుర్ పరిశోధకులు అధునాతన ఆవిష్కరణ చేశారు. వాహనాల మధ్య కమ్యూనికేషన్ నెలకొల్పేలా సాంకేతికత అభివృద్ధి చేశారు. పూర్తి సురక్షితంగా సమాచార బదిలీ జరిగేలా దీన్ని రూపొందించారు.

IIT Jodhpur Vehcle Technology : రహదారిపై ప్రమాదాలు తగ్గించే దిశగా, రోడ్డు రవాణాలో విప్లవాత్మక మార్పులు తెచ్చే విధంగా ఇండియన్ ఇన్​స్టిట్యూట్ ఆఫ్ టెక్నాలజీ (ఐఐటీ) జోధ్​పుర్ అధునాతన సాంకేతికత రూపొందించింది. రోడ్డుపై ప్రయాణించే వాహనాల మధ్య కమ్యూనికేషన్ నెలకొల్పేలా సాంకేతికతను అభివృద్ధి చేసింది. 'నోవెల్ ఎంఏసీ బేస్డ్ ఆథెంటికేషన్ స్కీమ్' (నోమాస్- NOMAS) సాంకేతికతను తయారు చేసి వాహనాల్లో ఇన్​స్టాల్ చేసింది.

నోమాస్ టెక్నాలజీ పరీక్షలు

ఐఓవీ (ఇంటర్నెట్ ఆఫ్ వెహికిల్) ఆధారితంగా పని చేసినప్పటికీ ఈ డివైజ్​లోని డేటా పూర్తిగా సురక్షితంగా ఉంటుందని ఆవిష్కర్తలు చెబుతున్నారు. ఐఐటీ జోధ్​పుర్ కంప్యూటర్ సైన్స్, ఇంజినీరింగ్ విభాగం అసోసియేట్ ప్రొఫెసర్ డా.దేబాశిష్ దాస్, పీహెచ్​డీ విద్యార్థి హిమాని సికార్వార్ ఈ సాంకేతికత అభివృద్ధిపై పని చేశారు. వీరు చేసిన ఈ ఆవిష్కరణకు సంబంధించిన వివరాలు 'ఐఈఈఈ- ట్రాన్సాక్షన్స్ ఇన్ ఇంటెలిజెంట్ ట్రాన్స్​పోర్టేషన్ సిస్టమ్స్​'లో ప్రచురితమయ్యాయి.

ప్రయోగాల కోసం రూపొందించిన నమూనా రహదారి

రహదారిపై కదులుతున్న సమయంలో వాహనాల మధ్య కమ్యూనికేషన్ ఏర్పాటు చేయడం ఈ సాంకేతికత ద్వారా సాధ్యమవుతుంది. రియల్ టైమ్​లో వాహనాల మధ్య సమాచార బదిలీ జరుగుతుంది. రోడ్డు స్థితిగతులు ఎలా ఉన్నాయి? ట్రాఫిక్ జామ్​ ఏర్పడిందా? యాక్సిడెంట్లు ఏవైనా జరిగాయా అన్న సమాచారాన్ని పంచుకునే వీలు కలుగుతుంది. తద్వారా జరగబోయే ప్రమాదాలు నివారించడం సాధ్యమవుతుంది. అభివృద్ధి చెందిన కొన్ని దేశాల్లో ఇలాంటి సాంకేతికతను ఉపయోగిస్తున్నారు. కానీ భారత్​లో ఇలాంటి సాంకేతికత అందుబాటులో లేదు. భవిష్యత్ కోసం సన్నద్ధతలో భాగంగా ఐఐటీ జోధ్​పుర్ తాజా పరిశోధన చేపట్టింది.

ఆవిష్కర్తల బృందం

"ఈ సాంకేతికత వల్ల వాహనాల మధ్య కమ్యూనికేషన్ మెరుగుపడుతుంది. రోడ్డు ప్రమాదాలు తగ్గించేందుకు ఇది ఉపయోగపడుతుంది. కానీ ప్రమాదాల నివారణకు ఇదొక్కటే మార్గం కాదు. రహదారుల కండిషన్, ట్రాఫిక్ మేనేజ్​మెంట్, డ్రైవర్ పనితీరు, రూల్స్​కు అనుగుణంగా వాహనాలను నడపడం వంటి అంశాలు మెరుగుపడితేనే ప్రమాదాలు తగ్గుతాయి. ఎందుకంటే రహదారులపై వాహనాల సంఖ్య పెరుగుతూనే ఉంటుంది. కాబట్టి, ప్రతి దశలో మెరుగుదల కనిపిస్తేనే సురక్షిత ప్రయాణం సాధ్యమవుతుంది."
-ఐఐటీ ప్రొఫెసర్లు

డ్రైవర్​పైనా కన్నేసి ఉంచుతుంది!
వాహనం నడుపుతున్న డ్రైవర్ పనితీరును కూడా నోమాస్ సాంకేతికత ద్వారా విశ్లేషించవచ్చు. ఇందులోని 'డ్రైవర్స్ డ్రైవ్ మానిటర్' అనే పరికరం, చోదకుడు వాహనాన్ని ఏ విధంగా నడుపుతున్నాడనే విషయంపై అంచనాకు వస్తుంది. డ్రైవర్ ఒత్తిడిలో ఉన్నాడా అనే దానిపైనా నిర్ధరణకు వస్తుంది. ఒకవేళ ఒత్తిడిలో ఉన్నాడని అనిపిస్తే వెంటనే డ్రైవర్​ను అలర్ట్ చేస్తుంది.