ట్రైన్​లో చైన్‌ లాగిన వారిని ఎలా కనిపెడతారు! - మీకు తెలుసా?

How Loco Pilot Know Who Pulled Train Chain : సరైన కారణం లేకుండా రైల్లో చైన్​ లాగడం నేరం. అయినా ఏదో ఒక కారణంతో ప్రయాణికులు అప్పుడప్పుడూ చైన్ లాగి ట్రైన్ ఆపేస్తుంటారు. అయితే.. సరిగ్గా ఆ బోగీలోకే సిబ్బంది వస్తారు. అంతేకాదు.. ఎవరు లాగారో కూడా కనిపెడతారు. ఇదంతా ఎలా సాధ్యం? వాళ్లకు ఎలా తెలుస్తుంది?

How Loco Pilot Know Who Pulled Train Chain : మన దేశంలో రోజూ లక్షలాది మంది తమ గమ్యస్థానాలకు చేరుకోవడానికి ఎక్కువగా ఉపయోగిస్తున్న రవాణా మార్గాలలో రైలుది మొదటి స్థానం. తక్కువ ఖర్చుతో ఎక్కువ దూరం సురక్షితంగా చేరుకోవడానికి.. ఎక్కువ మంది రైలు ప్రయాణం వైపు మొగ్గు చూపుతారు. దేశంలోని అనేక ప్రాంతాలకు రైలు నెట్‌వర్క్‌ ఉండటంతో ఎక్కడికి వెళ్లాలన్నా ఈజీగా చేరుకోవచ్చు.

అయితే.. అత్యవసర పరిస్థితుల్లో రైలును ఆపడానికి వీలుగా.. భారతీయ రైల్వే శాఖ చైన్‌ సిస్టమ్‌ను ఏర్పాటు చేసింది. రైలుకు అనుసంధానించిన ప్రతి బోగిలోనూ ఈ చైన్ ఉంటుంది. అత్యవసర పరిస్థితుల్లో ఈ చైన్‌ లాగితే.. వెంటనే లోకో పైలట్ ట్రైన్​ను ఆపేస్తాడు. ఈ ఏర్పాటు చాలా సార్లు ప్రయాణికులకు మేలు చేస్తుంది. అయితే.. ఎక్కడో ఒక బోగీలో చైన్​ లాగితే.. ఇంకెక్కడో ఇంజన్​లో ఉన్న లోకో పైలట్‌కు ఆ విషయం ఎలా తెలుస్తుంది? అంతేకాదు.. సరిగ్గా అదే బోగీ వద్దకు ఎలా వస్తారు? ఎవరు లాగారన్నది ఎలా కనిపెడతారు? అనే సందేహాలు చాలా మందిలో ఉంటాయి. ఈ సందేహాలకు ఇక్కడ సమాధానాలు చూద్దాం. దీని వెనుక ఉన్న లాజిక్‌ ఏంటో ఇప్పుడు కనుక్కుందాం.

అసలు కథ ఇది!
ప్రతి రైలు బోగిలోనూ ఉండే చైన్‌ అనేది ఒక ఎమర్జెన్సీ బ్రేక్ లాంటిది. దీనిని అత్యవసర సమయంలో ఎవరైనా లాగవచ్చు. అయితే.. ఏ బోగిలో చైన్‌ లాగారు అనేది తెలుసుకోవడానికి.. ప్రతి బోగిలోనూ ఒక ఎమర్జెన్సీ ఫ్లాషర్‌ (లైట్‌)ను రైల్వే అధికారులు ఏర్పాటు చేస్తారు. ప్రయాణికులు ఎవరైనా చైన్‌ను లాగినప్పుడు వెంటనే ఇది ఆన్‌ అవుతుంది. ఈ ఫ్లాష్‌ సిగ్నల్‌ లైట్‌.. రైలు ఇంజన్​లో ఉన్న లోకో పైలట్‌ దగ్గర కూడా కనిపిస్తుంది. ఏ బోగీలో లాగారనే వివరం అందులో కనిపిస్తుంది. దీంతో లోకోపైలట్‌ వెంటనే అప్రమత్తమై.. ట్రైన్‌ను ఆపేస్తారు. ఆ తర్వాత లోకోపైలట్‌ ఇంజిన్ దిగి.. ఏ బోగిలో చైన్‌ను లాగారో అక్కడికి వెళ్తారు. వారితోపాటు గార్డ్‌ కూడా వస్తారు.

ఆ బోగీలోకి వెళ్లి.. ఇక్కడ ఎవరు చైన్ లాగారని అడుగుతారు. సరైన కారణంతో చైన్ లాగినవారు ఎలాగో తామే అని చెబుతారు. ఎందుకు ఆ పని చేశారో కూడా వివరిస్తారు. ఒకవేళ అనవసర కారణంతో ఎవరైనా లాగితే.. పక్కనున్నవారు చెప్పడం ద్వారా వారి వివరాలు సేకరిస్తారు. కారణం సరిగా లేకపోతే అదుపులోకి తీసుకొని ఫైన్ విధిస్తారు. చైన్​ లాగడంతో వెలిగిన ఎమర్జెన్సీ ఫ్లాషర్‌ను వారు ఆఫ్​ చేస్తేనే ఆగిపోతుంది. దాన్ని ఆపేసి.. తిరిగి మళ్లీ రైలును స్టార్ట్‌ చేస్తారు.

రైలులో చైన్‌ను ఎప్పుడు లాగవచ్చు?
మెడికల్ ఎమర్జెన్సీ, లేదా ఎవరికైనా ప్రమాదం జరిగినప్పుడు మాత్రమే లాగాలి. అలాగే పిల్లలు, లేదా వృద్ధులు, దివ్యాంగులు ట్రైన్ ఎక్కకముందే రైలు కదిలిన సందర్భంలోనూ లాగవచ్చు. అంతే తప్ప మరే ఇతర సమయాల్లోనూ చైన్ లాగకూడదు. సరైన కారణం లేకపోతే కేసు కూడా నమోదు చేసే అవకాశాలు ఉంటాయి.