Hanuman Garhi Prasad Postal Order : అయోధ్య రామమందిరంలో బాలరాముడి ప్రాణ ప్రతిష్ఠ తర్వాత దేశవిదేశాల నుంచి భక్తులు తరలివస్తున్నారు. అయితే వారంతా బాలరాముడి దర్శించుకునే ముందు హనుమాన్గఢీలో ఉన్న హనుమాన్ ఆలయాన్ని దర్శించుకుని వెళ్తున్నారు. అయితే ప్రస్తుతం పెరుగుతున్న రద్దీ కారణంగా కొంత మంది భక్తులకు హనుమాన్ దర్శించుకోవడం సాధ్యమవ్వడం లేదట.
ఈ నేపథ్యంలో భారతీయ తపాలా శాఖ హనుమాన్ గఢీ ఆలయ ప్రసాదాన్ని పోస్టల్ ద్వారా ఇంటికి పంపే మహత్తర కార్యక్రమానికి శ్రీకారం చుట్టింది. ఇంట్లోనే ఉండి ఆర్డర్ చేసుకునే సదుపాయాన్ని కల్పించింది. తపాలా శాఖ ప్రసాదాన్ని ప్రజలకు చేరవేసేందుకు శ్రీ హనుమాన్గఢీ సంకట్మోచన్ సేనా ట్రస్ట్తో ఒప్పందం చేసుకుంది. ప్రసాదం కోసం దగ్గరలో ఉన్న పోస్టాఫీస్కు వెళ్లి 'డిప్యూటీ పోస్ట్మాస్టర్ అయోధ్య ధామ్ -224123' పేరు మీద ఈ-మనీ ఆర్డర్ తీయాలి. ఇవి రూ.251, రూ.551 ధరల్లో అందుబాటులో ఉంటాయి. పేరు, ఇంటి చిరునామాను ఇచ్చి ఆర్డర్ చేయాలి.
స్పీడ్ పోస్ట్ ద్వారా ఇంటికే
ఆర్డర్ చేశాక స్పీడ్ పోస్ట్ ద్వారా ప్రసాదాన్ని ఇంటికే పంపిస్తామని ప్రయాగ్రాజ్, వారణాసి జోన్ పోస్ట్ మాస్టర్ కృష్ణ కుమార్ యాదవ్ తెలిపారు. 'రూ.251 మనీ అర్డర్కు లడ్డూలు, హనుమాన్ చిత్రం, మహావీర్ గంధం, అయోధ్య దర్శన పుస్తకం ఉంటాయి. అదే రూ.551కు, రూ.251కు అందించే వస్తువలతోపాటు తులసీ మాల, హనుమాన్ యంత్రం ఉంటాయి. స్పీడ్ పోస్ట్ వివరాలు భక్తుల తమ మొబైల్కు ఎస్ఎంఎస్ ద్వారా తెలుసుకునే విధంగా ఏర్పాటు చేశాం. ఈ-మనీ ఆర్డర్లో మీ పూర్తి చిరునామా, పిన్కోడ్ ఫోన్ నంబర్ తప్పనిసరిగా ఇవ్వాలి' అని కృష్ణ కుమార్ యాదవ్ తెలిపారు.
ఇప్పటికే భారత తపాలా శాఖ సహకారంతో శ్రీరాముడి ప్రాణ ప్రతిష్ట మహోత్సవం ఆహ్వాన పత్రికలను పంపిణీ చేశారు. అంతకు మందు భక్తులకు గంగాజలాన్ని, రక్షణ బంధన్ పండుగ కోసం సోదరులకు రాఖీలను చేరవేయడం వంటి కార్యక్రమాలను చేపట్టింది. వీటితో పాటు కొన్ని ప్రత్యేక కార్యక్రమాల్లో ప్రజలకు సాయం చేయటానికి తపాలా శాఖ ముందుకు వచ్చింది.
గ్రాండ్గా రోడ్డు పెళ్లి- విందులో బిర్యానీ, స్వీట్లు- అందుకోసమేనట!
నెల రోజుల్లో అయోధ్య రామయ్యకు రూ.25కోట్ల విరాళాలు- 60లక్షల మంది దర్శనం
