Farmer Died In Protest : పంజాబ్- హరియాణా సరిహద్దులో రైతులు, భద్రతా దళాల మధ్య జరిగిన ఉద్రిక్త పరిస్థితుల్లో మరో అన్నదాత ప్రాణాలు కోల్పోయాడు. పోలీసులు కొద్ది రోజుల క్రితం ప్రయోగించిన టియర్ గ్యాస్ కారణంగా ఖనౌరీ సరిహద్దులో ఉన్న దర్శన్ సింగ్(62) అనే రైతు ఆరోగ్యం తీవ్రంగా దెబ్బతింది. దీంతో గురువారం అర్ధరాత్రి దర్శన్ సింగ్ ఆరోగ్య పరిస్థితి విషమించింది. వెంటనే పట్రాన్ కమ్యూనిటీ హెల్త్ సెంటర్‌కు తరలించారు రైతులు. పరిస్థితి విషమించడం వల్ల పాటియాలాలోని రాజేంద్ర ఆసుపత్రికి తరలిస్తుండగా గుండెపోటుతో రైతు దర్శన్ సింగ్ మరణించాడు.
పరిహారం ఇవ్వాలని రైతులు డిమాండ్
తమ డిమాండ్లపై సాధనకు 'దిల్లీ చలో'కు రైతులు పిలుపినిచ్చిన నేపథ్యంలో ఫిబ్రవరి 13 నుంచి పంజాబ్-హరియాణా సరిహద్దులో భటిండా జిల్లాలోని గోనేయానాకు చెందిన దర్శన్ సింగ్ (62) పాల్గొన్నాడు. భద్రతా దళాలు టియర్ గ్యాస్ ప్రయోగించిన కారణంగానే దర్శన్ సింగ్ మరణించాడని అతడి కుటుంబ సభ్యులు ఆరోపించారు. దర్శన్ సింగ్ ఎనిమిదెకరాల భూమి, రూ.8 లక్షల అప్పు ఉందని సమాచారం. ఆయనకు భార్య, కుమార్తె, కుమారుడు ఉన్నారు. 15 రోజుల క్రితమే దర్శన్ సింగ్ కుమారుడికి వివాహం జరిగింది. దర్శన్సింగ్ కుటుంబాన్ని ప్రభుత్వం ఆదుకోవాలని రైతు నేతలు డిమాండ్ చేశారు. దర్శన్ సింగ్ కుటుంబానికి పరిహారం ఇవ్వాలని తెలిపారు.
'వారిపై ఎఫ్ఐఆర్ నమోదు చేస్తేనే అంత్యక్రియలు'
మరోవైపు కర్షకుల ఆందోళనల్లో మరణించిన యువరైతు శుభకరణ్ సింగ్ మృతికి కారణమైనవారిపై ఎఫ్ఐఆర్ నమోదు చేయాలని మరోసారి రైతు నేతలు డిమాండ్ చేశారు. అంతవరకు శుభకరణ్ సింగ్ మృతదేహానికి దహన సంస్కారాలు జరగవని అన్నారు. మృతుడు శుభకరణ్ సింగ్ కుటుంబానికి రూ. కోటి పరిహారం, అతడి సోదరికి ప్రభుత్వ ఉద్యోగం ఇస్తామని పంజాబ్ సీఎం భగవంత్ మాన్ ప్రకటించిన కొన్ని గంటలకే రైతు నేతలు ఈ ప్రకటన చేయడం గమనార్హం.
'శుభకరణ్ సింగ్ మృతికి కారణమైన వారిపై కఠిన చర్యలు తీసుకుంటామని పంజాబ్ సీఎం భగవంత్ మాన్ స్పష్టం చేశారు. అయితే ఇప్పుడు అది కుదరదని అధికారులు చెబుతున్నారు. మేము శుభకరణ్ సింగ్ కుటుంబానికి అన్ని విషయాలు తెలియజేశాం. వారికి డబ్బు ముఖ్యం కాదు. శుభకరణ్ సింగ్ మృతికి కారణమైనవారిపై ఎఫ్ఐఆర్ నమోదు చేశాకే ఆయన దహన సంస్కారాలు నిర్వహిస్తాం. దిల్లీ చలోపై త్వరలో నిర్ణయం తీసుకుంటాం.' అని రైతు నాయకుడు సర్వన్ సింగ్ పంధేర్ తెలిపారు. మరోవైపు, పంజాబ్- హరియాణా సరిహద్దులోని ఖనౌరీ పాయింట్ వద్దకు వెళ్తున్న రైతులను చెదరగొట్టేందుకు పోలీసులు టియర్ గ్యాస్ ప్రయోగించారు. ఈ క్రమంలో అక్కడ కాసేపు ఉద్రిక్త వాతావరణం నెలకొంది.
'రైతుల ఆదాయాన్ని పెంచేందుకు మోదీ కృషి'
రైతులతో చర్చించేందుకు కేంద్ర ప్రభుత్వం ముగ్గురు మంత్రులతో కూడిన కమిటీని ఏర్పాటు చేసిందని కేంద్ర ఆర్థిక మంత్రి నిర్మలా సీతారామన్ తెలిపారు. ముగ్గురు మంత్రుల బృందం రైతులతో చర్చలు జరుపుతుందని చెప్పారు. రైతుల ఆదాయాన్ని పెంచడానికి ప్రధాని మోదీ కృషి చేస్తున్నారని నిర్మల తెలిపారు. 'చిన్న రైతుల కోసం ప్రధాని మోదీ పనిచేస్తున్నారు. యూరియా ధర రూ.300 నుంచి రూ.3,000కు చేరింది. కానీ ప్రస్తుతం కేంద్రం సబ్సిడీపై రైతులకు రూ.300కే యూరియాను అందిస్తుంది. ఎందుకంటే ప్రభుత్వం రైతులను భుజస్కందాలపై మోస్తుంది.' అని నిర్మలా సీతారామన్ తెలిపారు. మరోవైపు, 2014-15 ఆర్థిక సంవత్సరం నుంచి వ్యవసాయ రంగంలో యాంత్రీకరణ కోసం కేంద్రం రూ.6,500 కోట్లు కేటాయించిందని కేంద్ర ప్రభుత్వ అధికారి ఒకరు తెలిపారు. రైతులకు సబ్సిడీపై 15 లక్షలకు పైగా యంత్రాలను అందించిందని పేర్కొన్నారు.
BKU కీలక ప్రకటన
కొందరు రైతులు నిరసనలను హడావిడిగా ప్రారంభించారని భారతీయ కిసాన్ యూనియన్ నాయకుడు గుర్నామ్ సింగ్ అన్నారు. సంయుక్త కిసాన్ మోర్చా, సంయుక్త కిసాన్ మోర్చా (నాన్ పొలిటికల్) గ్రూపులను ఉమ్మడి కమిటీగా ఏర్పాటు చేస్తామని చెప్పారు. ఆ కమిటీ ఆధ్వర్యంలో దిల్లీలో నిరసనలు కొనసాగించాలని కోర్ కమిటీ సమావేశంలో నిర్ణయించామని తెలిపారు. అప్పుడు ప్రభుత్వంపై ఒత్తిడి పెంచి, రైతుల డిమాండ్లు నెరవేర్చుకునేందుకు ప్రయత్నిస్తామని అన్నారు.
'రైతులకు అండగా ఉన్నాం'
హరియాణా ప్రభుత్వం రైతులకు అండగా ఉందని ఆ రాష్ట్ర ముఖ్యమంత్రి మనోహర్ లాల్ ఖట్టర్ తెలిపారు. తమ ప్రభుత్వం రైతులకు యంత్రాలు ఇచ్చిందని అన్నారు. పంజాబ్‌లో పంట వ్యర్థాలు దహనానికి ఆమ్ఆద్మీ పార్టీ బాధ్యత వహించాలని పేర్కొన్నారు. 'రైతుల గురించి మాట్లాడేటప్పుడు హరియాణాలోని విపక్షాలు ఇబ్బంది పడుతున్నాయి. దేశంలో హరియాణా తప్ప ఏ ఇతర రాష్ట్రం 14 పంటలను ఎంఎస్పీపై పంటలను కొనుగోలు చేయలేదు. రూ. 1700 కోట్ల రుణాలను మాఫీ చేశాం. హరియాణా రైతులకు అందుతున్న ఫలాలు తమకు అందట్లేదని పంజాబ్ రైతులు బాధపడుతున్నారు.' ఖట్టర్ తెలిపారు.
కేంద్రంతో చర్చలకు రైతులు 'నో'- శుక్రవారం 'బ్లాక్ డే'గా పాటించాలని దేశ ప్రజలకు విజ్ఞప్తి
'రైతు మృతి బాధాకరం- చర్చలు కొనసాగించాలి'- కేంద్రానికి వెంకయ్య విజ్ఞప్తి
