Politcal Parties Responses On Vijay Party : తమిళగ వెట్రి కళగం(టీవీకే) పార్టీ అధినేత దళపతి విజయ్ తమ సిద్ధాంతాలను కాపీ కొట్టారని తమిళనాడు అధికార డీఎంకే ఆరోపించింది. ఆదివారం విల్లుపురంలో జరిగిన టీవీకే బహిరంగ సభలో ఎంకే స్టాలిన్ కుటుంబంపై విజయ్ పరోక్షంగా ఆరోపణలు చేయగా, వాటిపై స్పందించింది. విజయ్ ఆరోపణలు నిరాధారమైనవని సోమవారం డీఎంకే స్పష్టం చేసింది.
తమ సుదీర్ఘ రాజకీయ కాలంలో ఎందరో ప్రత్యర్థులను ఎదర్కొన్నామని, అయినా బలంగా ముందుకు సాగుతామని డీఎంకే నేత ఇళంగోవన్ తెలిపారు. తమ పార్టీ విధానాలతోపాటు సిద్ధాంతాలను విజయ్ కాపీ చేశారని ఆరోపించారు. ఆయన చెప్పినవి ఇప్పటికే తాము చెప్పామని, ప్రస్తుతం అనుసరిస్తున్నామని తెలిపారు. డీఎంకే నాయకులు ప్రజల సమస్యల కోసం పోరాడుతూ జైలుకు వెళ్లారని గుర్తు చేశారు. డీఎంకే ఎప్పుడూ ప్రజల కోసం పోరాడుతుందని తెలిపారు. విజయ్ రాజకీయాల్లోకి వచ్చిన వెంటనే, అధికారంలోకి రావాలని కోరుకుంటున్నట్లు ఉందని విమర్శించారు. తమ పార్టీ నేతల్లా టీవీకే నాయకులు పోరాడలేరని తెలిపారు. డీఎంకేకు, ఇతర పార్టీలకు ఉన్న తేడా అదేనని చెప్పారు.
మరోవైపు, రాజకీయాల్లోకి వచ్చినందుకు విజయ్కు అన్నాడీఎంకే అధికార ప్రతినిధి కోవై సత్యన్‌ అభినందనలు తెలిపారు. టీవీకే భావజాలం అన్ని పార్టీల భావజాలాల కలయికలా అనిపిస్తుందని అన్నారు. కొత్త సీసాలో పాత మందు అని ఎద్దేవా చేశారు. తమిళనాడులోని అన్ని రాజకీయ పార్టీల నుంచి సిద్ధాంతాలను కలిపి తమవిగా చెప్పారని ఆరోపించారు. విజయ్ టీవీకే పార్టీ వచ్చే ఎన్నికల్లో ద్రవిడ పార్టీల ఓట్లను చీల్చివేసే అవకాశం ఉందని బీజేపీ నాయకుడు హెచ్ రాజా అన్నారు. డీఎంకే బలహీనపడుతుందని వ్యాఖ్యానించారు. ద్రవిడియన్ ఐడియాలజీ గురించి మాట్లాడి ఆ ఓట్లను విభజించడం ద్వారా విజయ్ తమకు సహాయం చేస్తారని ఆశిస్తున్నట్లు తెలిపారు.
తమిళనాడు విషయంలో తమ విధానమేంటో చెప్పాలని టీవీకే పార్టీని నామ్‌ తమిళర్‌ కట్చి చీఫ్‌ కన్వీనర్‌ సీమన్‌ డిమాండ్ చేశారు. భవిష్యత్తులో టీవీకే, కూటమి కోసం తమను ఆహ్వానిస్తే వెళ్లబోమని తెలిపారు. తమ పార్టీ సిద్ధాంతం స్పష్టంగా ఉందని, వేరే వాళ్లపై ఆధారపడబోమని స్పష్టం చేశారు. తామే ఒంటరిగా పోరాడుతామని చెప్పారు. టీవీకే సిద్ధాంతాలు సరైన రీతిలో లేవని వ్యాఖ్యానించారు.
