Cabinet Approves One Nation One Election Bill : 'ఒకే దేశం- ఒకే ఎన్నికలు' బిల్లుకు కేంద్ర కేబినెట్ ఆమోదం తెలిపింది. ప్రస్తుతం కొనసాగుతున్న పార్లమెంట్ శీతాకాల సమావేశాల్లోనే జమిలి ఎన్నికల బిల్లును ప్రవేశపెట్టే అవకాశం ఉందని సంబంధిత వర్గాల సమాచారం. దీంతో కీలక బిల్లులు సభ ముందుకు వచ్చే అవకాశం ఉన్న నేపథ్యంలో 13, 14 తేదీల్లో తప్పనిసరిగా సభకు హాజరు కావాలని తమ ఎంపీలకు బీజేపీ, కాంగ్రెస్ విప్ జారీ చేశాయి.
ఏకాభిప్రాయ సాధనకు ప్రయత్నాలు!
ప్రధాని నరేంద్ర మోదీ అధ్యక్షతన జరిగిన కేంద్ర మంత్రివర్గం జమిలి ఎన్నికల బిల్లుకు ఆమోదముద్ర వేసింది. జమిలి ఎన్నికలపై భిన్నాభిప్రాయాలు వ్యక్తమవుతోన్న వేళ దీనిపై ఏకాభిప్రాయం సాధించేందుకు ప్రభుత్వం ప్రయత్నిస్తున్నట్లు తెలుస్తోంది. విస్తృత సంప్రదింపుల కోసం జాయింట్‌ పార్లమెంటరీ కమిటీ (జేపీసీ)కి ఈ బిల్లును సిఫార్సు చేయాలని ప్రభుత్వం యోచిస్తున్నట్లు సంబంధిత వర్గాలు తెలిపాయి. ఈ కమిటీ ద్వారా వివిధ రాష్ట్రాల శాసనసభల స్పీకర్లను సంప్రదించేందుకు కూడా ప్రభుత్వం ఆసక్తిగా ఉన్నట్లు పేర్కొన్నాయి.
ఈ సమావేశాల్లోనే బిల్లు తెచ్చేందుకు ప్లాన్
పార్లమెంటు నుంచి పంచాయతీ వరకు అన్ని ఎన్నికలనూ ఒకేసారి నిర్వహించడంపై మాజీ రాష్ట్రపతి రామ్ నాథ్ కోవింద్ నేతృత్వంలో జమిలి ఎన్నికలకు సంబంధించిన నివేదికకు భారత రాష్ట్రపతి ద్రౌపదీ ముర్ముకు ఈ ఏడాది మార్చిలో అందించారు. దీనికి కేంద్ర మంత్రివర్గం ఈ సెప్టెంబరులోనే పచ్చజెండా ఊపింది. తాజాగా జరుగుతున్న పార్లమెంట్ సమావేశాల్లోనే ఈ బిల్లును పార్లమెంట్లో ప్రవేశపెట్టాలని ప్రభుత్వం భావిస్తోంది. ఈ నేపథ్యంలో కేంద్ర కేబినెట్ జమిలి బిల్లుకు ఆమోదం తెలిపింది.
రాజ్యాంగ సవరణలు
జమిలి ఎన్నికల నిర్వహించాలంటే పలు రాజ్యాంగ సవరణలు చేయాల్సి ఉంటుంది. ఆర్టికల్ 82ఏ, 83(2), ఆర్టికల్ 327 వంటి పలు ఆర్టికల్స్ సవరించాల్సి ఉంటుంది. అలాగే జమిలి బిల్లు ఆమోదం పొందాలంటే పార్లమెంటేేతో పాటు దేశంలోని సగం రాష్ట్రాల అసెంబ్లీలు అందుకు అంగీకరించాలి.
'ఇదొక ముఖ్యమైన అడుగు'
మరోవైపు జమిలి ఎన్నికల బిల్లుకు కేంద్ర కేబినెట్ ఆమోదం తెలపడంపై ప్రధాని మోదీ సహా పలువురు విపక్ష నేతలు స్పందించారు. కేంద్ర మంత్రివర్గం తీసుకున్న నిర్ణయాన్ని ఎక్స్ వేదికగా ప్రధాని మోదీ ప్రశంసించారు. ఇది భారతదేశ ప్రజాస్వామ్యాన్ని పెంపొందించే దిశకు ఒక ముఖ్యమైన అడుగని పేర్కొన్నారు.
"జమిలి ఎన్నికలపై ఉన్నత స్థాయి కమిటీ సిఫార్సులను కేంద్ర కేబినెట్ ఆమోదించింది. జమిలి ఎన్నికల కమిటీకి నాయకత్వం వహించినందుకు, పలు రాజకీయ పార్టీలను సంప్రదించినందుకు మాజీ రాష్ట్రపతి రామ్నాథ్ కోవింద్ను అభినందిస్తున్నాను. ఇది మన ప్రజాస్వామ్యాన్ని రూపొందించే దిశగా ఒక ముఖ్యమైన అడుగు" అని ప్రధాని మోదీ ఎక్స్ లో పోస్టు చేశారు.
'అలా చేయడం వల్ల ప్రజాధనం వృథా కాదు'
అలాగే జమిలి ఎన్నికలకు కేంద్ర వ్యవసాయ శాఖ మంత్రి శివరాజ్ సింగ్ చౌహాన్ మద్దతు తెలిపారు. దేశంలో తరచూ ఎన్నికలు నిర్వహించడం వల్ల సమయం, ప్రజాధనం వృథా అవుతుందని అన్నారు. తరచుగా జరిగే ఎన్నికలు ప్రజా సంక్షేమ కార్యక్రమాలకు విఘాతం కలిగిస్తాయని అభిప్రాయపడ్డారు.
'అభివృద్ధి ఆగిపోతుంది'
ఒడిశాలో జరిగినట్లే దేశం మొత్తం ఒకేసారి శాసనసభ, లోక్సభ ఎన్నికలు జరగాలని అసోం సీఎం హిమంతబిశ్వ శర్మ అభిప్రాయపడ్డారు. లేదంటే అభివృద్ధి పనులు ఆగిపోతాయని తెలిపారు. జమిలి ఎన్నికలకు సంపూర్ణ మద్దతును ఆయన ప్రకటించారు.
దృష్టి మరల్చడానికే!
అయితే జమిలి ఎన్నికల ప్రతిపాదన ఆచరణాత్మకమైనది కాదని కాంగ్రెస్ పేర్కొంటోంది. తమ పార్టీ జమిలి ఎన్నికలకు మద్దతివ్వడం లేదని, ప్రజాస్వామ్యం మనుగడ సాగించాలంటే ఎప్పుడు అవసరమైతే అప్పుడు ఎన్నికలు నిర్వహించాలని వాదిస్తోంది. ప్రజల ప్రశ్నల నుంచి దృష్టి మరల్చడానికి ప్రభుత్వం ప్రయత్నిస్తోందని ఆరోపించింది.
32 రాజకీయ పార్టీలు మద్దతు
జమిలి ఎన్నికల నిర్వహణకు 32 రాజకీయ పార్టీలు మద్దతు తెలిపాయని మాజీ రాష్ట్రపతి నేతృత్వంలోని రాంనాథ్‌ కోవింద్ కమిటీ తెలిపింది. జమిలి సాధ్యాసాధ్యాలపై గతంలో వివిధ పార్టీలతో చర్చలు జరిపిన సమయంలో మొత్తం 47 ప్రాంతీయ, జాతీయ పార్టీలు అభిప్రాయాలను కమిటీతో తెలిపినట్లు వివరించింది. అందులో 32 పార్టీలు మద్దతిస్తే, 15 పార్టీలు ఆ ఆలోచనతో వ్యతిరేకించాయని పేర్కొంది. జాతీయ పార్టీల్లో కాంగ్రెస్, ఆప్‌, బీఎస్పీ, సీపీఎంలు.. ఏకకాల ఎన్నికలను వ్యతిరేకించగా బీజేపీ, NPP మద్దతిచ్చినట్లు మార్చిలో రాష్ట్రపతి ద్రౌపదీ ముర్ముకు కోవింద్ కమిటీ సమర్పించిన రిపోర్టులో ఉంది. ఈ ఎన్నికల వల్ల వనరులు ఆదా అవడమే కాక సామాజిక సామరస్యం నెలకొనడం, ఆర్థికాభివృద్ధికి ప్రోత్సాహం లభించడం జరుగుతుందని ఆ 32 పార్టీలు అభిప్రాయపడ్డాయని నివేదించింది.
