'CAAను చూసి భారతీయ ముస్లింలు భయపడొద్దు- హిందువులతో సమానంగా వారికి హక్కులు'

CAA Effect On Indian Muslims : పౌరసత్వ సవరణ చట్టం (CAA) అమలుపై భారత్‌లోని ముస్లింలు ఆందోళన చెందాల్సిన పనిలేదని కేంద్ర ప్రభుత్వం స్పష్టం చేసింది. హిందువులతో సమానంగా వారి ముస్లింల హక్కులు కొనసాగుతాయని స్పష్టం చేసింది.

CAA Effect On Indian Muslims : పౌరసత్వ సవరణ చట్టం (CAA) అమలుపై భారతదేశంలోని ముస్లింలు ఆందోళన చెందాల్సిన అవసరం లేదని కేంద్ర ప్రభుత్వం స్పష్టం చేసింది. హిందువులతో సమానంగా, ముస్లింల హక్కులు కొనసాగుతాయని పేర్కొంది. దేశంలోని 18 కోట్ల మంది ముస్లింలు తమ పౌరసత్వాన్ని రుజువు చేసుకునేందుకు ఏ పత్రాలు సమర్పించాల్సిన అవసరం లేదని ప్రకటన విడుదల చేసింది.

ఇస్లాంను చట్టం రక్షిస్తుంది!
పాకిస్థాన్‌, బంగ్లాదేశ్‌, అఫ్గానిస్థాన్‌లలో పీడనకు గురైన ముస్లిమేతరులు, మైనారిటీలు 2014 డిసెంబరు 31లోగా ఇండియాకు వచ్చి ఉన్నట్లయితే వారికి సీఏఏ-2019 చట్టం ప్రకారం, భారత పౌరసత్వాన్ని కల్పించనున్నారు. అయితే సీఏఏపై భారతీయ ముస్లింలు ఆందోళన చెందుతున్న నేపథ్యంలో కేంద్ర ప్రభుత్వం మంగళవారం మరింత స్పష్టతనిచ్చింది.

"పాకిస్థాన్​, బంగ్లాదేశ్, అఫ్గానిస్థాన్​ దేశాల్లో మైనారిటీలు పీడనకు గురి కావడం వల్ల ఇస్లాం అనే పదానికి ప్రపంచవ్యాప్తంగా తీవ్ర అపనింద వచ్చింది. నిజానికి ఇస్లాం శాంతికాముక మతం. విద్వేషం, హింస, పీడనలను అది ఎన్నడూ ప్రబోధించలేదు. అందుకే ఈ కళంకం నుంచి ఇస్లాం మతాన్ని సీఏఏ చట్టం రక్షిస్తుంది. భారతదేశంలోకి వలసవచ్చిన శరణార్థుల్ని వెనక్కి పంపేందుకు పొరుగున ఉన్న ఈ మూడు ముస్లిం దేశాలతో మనకెలాంటి ఒప్పందం లేదు. అక్రమ వలసదారులను వెనక్కి పంపే అంశమే ఈ సీఏఏ చట్టంలో లేదు. కనుక ముస్లింలు అపోహ పడాల్సిన అవసరం లేదు."
- కేంద్ర హోంశాఖ

"భారతదేశంలోనికి అక్రమంగా వలస వచ్చిన వారిని, విదేశీయులుగానే గుర్తించడం జరగుతుంది. పౌరసత్వ చట్టం-1955 మాదిరిగానే సీఏఏ కూడా ఎలాంటి ధ్రువీకరణ పత్రాలు లేకుండా భారత్‌లో అడుగుపెట్టిన వారిని విదేశీయులుగానే గుర్తిస్తుంది. ముస్లింలు భారత పౌరసత్వం కోసం దరఖాస్తు చేయకుండా ఈ చట్టం నిషేధించదు. ఏ దేశానికి చెందిన ముస్లింలైనా పౌరసత్వ చట్టం సెక్షన్‌-6 కింద ఇండియన్ సిటిజన్​షిప్​ కోసం దరఖాస్తు చేసుకోవచ్చు. అది సహజసిద్ధమైన పౌరసత్వాన్ని పరిశీలిస్తుంది" అని కేంద్ర హోంశాఖ తెలిపింది.

ప్రపంచంలోని ఏ దేశానికి చెందిన వ్యక్తులైనా, ముస్లింలు అయినా, మరో మతానికి చెందిన వారైనా ప్రస్తుత చట్టాల ప్రకారం భారతీయ పౌరసత్వం కోసం దరఖాస్తు చేసుకోవచ్చని కేంద్రం స్పష్టం చేసింది. అంతేకాదు పొరుగున్న ఉన్న ఈ మూడు దేశాల్లోని ముస్లింలు ఎవరైనా వేధింపులకు గురవుతుంటే, వారు కూడా ప్రస్తుత చట్టాలను అనుసరించి భారత్‌ పౌరసత్వం కోసం దరఖాస్తు చేసుకోవచ్చని పేర్కొంది. దీనికి సీఏఏ చట్టం ఏమాత్రం అడ్డుకాదని వివరించింది.

స్పెషల్ మొబైల్ యాప్​
ఇండియన్ సిటిజన్​షిప్​ కోసం పాకిస్థాన్​, బంగ్లాదేశ్​, అఫ్గానిస్థాన్​ దేశాల శరణార్థులు దరఖాస్తు చేసుకునేందుకు కేంద్ర సర్కారు కొత్త పోర్టల్‌ను ప్రారంభించింది. సీఏఏ-2019 కింద అర్హత కలిగిన వ్యక్తులెవరైనా indiancitizenshiponline.nic.in వెబ్​సైట్​లో దరఖాస్తు చేసుకోవచ్చని హోంశాఖ తెలిపింది. ఆ మూడు ముస్లిం దేశాల నుంచి భారత్​లోకి ఏ తేదీన వచ్చారో, ఆనాటి నుంచే పౌరసత్వం వర్తిస్తుందని వెల్లడించింది. ఏ దేశం నుంచి వచ్చారో తెలిపేందుకు తొమ్మిది రకాల పత్రాల్లో ఏదో ఒకదానిని, ఏ తేదీన వచ్చారో తెలిపే 20 పత్రాల్లో ఒక దానిని దరఖాస్తుతోపాటు జత చేయాల్సి ఉంటుందని స్పష్టం చేసింది. ‘సీఏఏ-2019’ పేరిట త్వరలో ఓ మొబైల్‌ యాప్‌ను కూడా తీసుకురానున్నట్లు పేర్కొంది.