Agnipath Scheme 2024 : సార్వత్రిక ఎన్నికల వేళ ఉత్తరాది రాష్ట్రాల్లో తీవ్ర దుమారం రేపిన అగ్నిపథ్ పథకంలో మార్పులు చేసే దిశగా కేంద్రం యోచిస్తున్నట్లు తెలుస్తోంది. అగ్నిపథ్ ప్రస్తుత నిబంధనల ప్రకారం అగ్నివీరులుగా సర్వీసులో ఉన్నవారిలో 75 శాతం మంది నాలుగేళ్ల తర్వాత విధుల నుంచి వైదొలగాల్సి ఉంటుంది. 25 శాతం మందిని మాత్రమే రెగ్యులర్ సర్వీసుల్లోకి తీసుకుంటారు. దీనిపై విపక్షాల నుంచి తీవ్ర విమర్శలురాగా, మిత్రపక్షాలు సైతం అగ్నిపథ్‌ను సమీక్షించాలని డిమాండ్ చేశాయి. ఈ నేపథ్యంలో రెగ్యులర్ సర్వీసులోకి తీసుకునే అగ్నివీరుల సంఖ్యను పెంచే దిశగా అడుగులు పడుతున్నట్లు రక్షణశాఖకు చెందిన సీనియర్ అధికారి ఒకరు వెల్లడించారు. నాలుగు ఏళ్ల తర్వాత 50 శాతం మంది అగ్నివీరులను కొనసాగించాలని, వయోపరిమితిని 23 ఏళ్లకు పెంచాలని సైన్యం సిఫారసు చేసినట్లు ఆయన పేర్కొన్నారు. జీతభత్యాల్లోనూ మార్పులు చేసే యోచనలో ఉన్నట్లు తెలిపారు.
సైనిక బలం తగ్గే అవకాశం!
అంతర్గత సర్వేలు నిర్వహించిన సైన్యం అగ్నిపథ్ పథకంలో మార్పులకు సంబంధించి ఇప్పటికే పలు ప్రతిపాదనలు కేంద్రానికి సమర్పించింది. అగ్నివీరులుగా నియమించిన వారిలో కేవలం 25శాతం మందినే రెగ్యులర్ సర్వీసుల్లో కొనసాగిస్తే సైనిక బలం తగ్గే అవకాశం ఉందని, దాన్ని నివారించడానికి తిరిగి సర్వీస్‌లోకి తీసుకునే వారి సంఖ్య పెరగాలని నౌకదళ విశ్రాంత అధికారి ఒకరు తెలిపారు. ఎంతో శ్రమపడి శిక్షణ అందించిన సైనికుల పూర్తిస్థాయి సేవలను సైన్యం వినియోగించుకోవాలని వెల్లడించారు.
అగ్నిపథ్‌పై విమర్శలు
త్రివిధ దళాల్లో నియామకాలకు సంబంధించి జూన్‌ 2022లో అగ్నిపథ్ పథకాన్ని కేంద్ర ప్రభుత్వం తీసుకొచ్చింది. 17 నుంచి 21 ఏళ్ల వయసున్న యువతీ యువకులు మాత్రమే అగ్నివీర్‌లుగా విధులు నిర్వర్తించేందుకు అర్హులుగా కేంద్రం పేర్కొంది. నాలుగేళ్లు ముగిసిన తర్వాత సర్వీస్‌ నుంచి తప్పుకొనే అగ్నివీర్‌లకు పెన్షన్ సౌకర్యాలు లభించవు. దీనిపై భగ్గుమన్న విపక్షాలు మిగతా 75శాతం అగ్నివీరుల పరిస్థితి ఏంటని ప్రశ్నించాయి. అగ్నిపథ్‌పై విమర్శలు వెల్లువెత్తిన నేపథ్యంలో పలు ప్రభుత్వ ఉద్యోగాల్లో వారికి కేంద్రం, పలు రాష్ట్ర ప్రభుత్వాలు రిజర్వేషన్లు కల్పించాలని నిర్ణయించాయి.
బీజేపీకి JDU బిగ్ షాక్- ఆ పథకంపై రివర్స్ గేర్! - Agnipath Scheme JDU
అవసరమైతే అగ్నిపథ్ స్కీమ్ను మారుస్తాం: రక్షణ మంత్రి రాజ్నాథ్ - Rajanth Singh On Agnipath Scheme
