AAP Leaders Protest : ఆమ్ఆద్మీ పార్టీని అంతం చేయాలని బీజేపీ లక్ష్యంగా పెట్టుకుందని దిల్లీ ముఖ్యమంత్రి అరవింద్ కేజ్రీవాల్ ఆరోపించారు. బీజేపీకి ఆప్ భవిష్యత్తులో సవాలుగా మారుతుందన్న భయంతోనే 'ఆపరేషన్‌ ఝాడు'ను ప్రారంభించిందని అన్నారు. ఆప్ నేతల ఆరెస్టులకు నిరసనగా బీజేపీ కార్యాలయం వద్ద నిరసనకు ముందు తమ నేతలు, కార్యకర్తలను ఉద్దేశించి మాట్లాడారు
"ఆప్ ఎదుగుదలపై ప్రధాని నరేంద్ర మోదీ ఆందోళన చెందుతున్నారు. పార్టీ చాలా వేగంగా అభివృద్ది చెందింది. ఆప్ను అణిచివేసేందుకే ఆపరేషన్‌ ఝాడును బీజేపీ ప్రారంభించింది. రానున్న కాలంలో ఆప్ నేతలను అరెస్ట్ చేస్తారు. బీజేపీకి ఆప్ పెద్ద సవాల్గా మారుకుండా ఉండేందుకు భవిష్యత్తులో మా బ్యాంకు ఖాతాలను స్తంభింపజేస్తారు. పార్టీ కార్యాలయాన్ని మూసి వేసి వీధుల్లోకి తీసుకొస్తారు. మున్ముందు మనకు పెద్ద సవాళ్లు ఉంటాయి. వాటిని ఎదుర్కోవడానికి సిద్దంగా ఉండండి" అంటూ కేజ్రీవాల్ ప్రసంగించారు.
అడ్డుకున్న పోలీసులు!
మరోవైపు, ఆమ్ఆద్మీ పార్టీ కార్యాలయం ఎదుట ఉద్రిక్తత నెలకొంది. తమ పార్టీ నేతల అరెస్ట్కు నిరసనగా బీజేపీ కార్యాలయానికి ర్యాలీగా వెళ్లేందుకు ఆప్ యత్నించగా పోలీసులు అడ్డుకున్నారు. దీంతో దిల్లీ సీఎం కేజ్రీవాల్, ఇతర నేతలు ఆప్ కార్యాలయం ముందు బైఠాయించి నిరసన చేపట్టారు. ఫలితంగా ఆ ప్రాంతంలో ఉద్రిక్త పరిస్థితులు నెలకొన్నాయి. అయితే ఆప్ ఆందోళన పిలుపుతో దిల్లీలోని పండిట్ దిన్దయాల్ ఉపాధ్యాయ మార్గ్‌లో పోలీసులు 144 సెక్షన్‌ విధించారు. ఐటీవో మెట్రో స్టేషన్‌ను తాత్కాలికంగా మూసివేశారు. బీజేపీ కేంద్ర కార్యాలయం వద్ద భారీ బందోబస్తు ఏర్పాటు చేశారు. ఈ క్రమంలో బీజేపీ కార్యలయానికి వచ్చిన ఆప్ కార్యకర్తలను అదుపులోకి తీసుకున్నారు.
'నిందితులను కాపాడేందుకే నిరసనలు'
ఆమ్ ఆద్మీ పార్టీ తలపెట్టిన నిరసనను ఉద్దేశించి ఎంపీ స్వాతీ మాలీవాల్ తీవ్ర విమర్శలు చేశారు. 'ఒకప్పుడు నిర్భయకు న్యాయం చేయాలని మనమంతా వీధుల్లోకి వచ్చాం. 12 ఏళ్ల తర్వాత ఈరోజు సీసీటీవీ ఫుటేజీని మాయం చేసి, ఫోన్‌ను ఫార్మాట్‌ చేసిన నిందితుణ్ని కాపాడేందుకు వీధుల్లోకి వస్తున్నామా? ఈ మాత్రం చొరవ మాజీ మంత్రి మనీశ్ సిసోదియా విషయంలో చూపి ఉంటే పరిస్థితులు మరోలా ఉండేవి. ఆయనే బయట ఉంటే ఈరోజు నాకు ఈ దుస్థితి వచ్చి ఉండేది కాదు' అని మాలీవాల్ ఎక్స్లో పోస్ట్ చేశారు.
