காவல் நிலையத்தில் நடந்த வளைகாப்பு நிகழ்ச்சி... அட இவங்களுக்கு உள்ளேயேவா!

சென்னை: புழல் காவல் நிலையத்தில் பெண் முதல் நிலைக் காவலருக்கு கொளத்தூர் காவல் மாவட்ட துணை காவல் ஆணையாளர் வளைகாப்பு நிகழ்வை நடத்தி வைத்தார்.  

சென்னை, கொளத்தூர் பகுதிக்கு உட்பட்ட புழல் எம்.திரி காவல் நிலையத்தில் முதல் நிலை காவலராக பணிபுரிந்து வருபவர் பிரியா. நிறைமாத கர்ப்பிணியான பிரியாவிற்கு வளைகாப்பு நிகழ்ச்சியை, வீட்டில் நடப்பது போன்று நடத்திட புழல் சரக காவல் உதவி ஆணையர் ஆதிமூலத்திடம் காவல் நிலைய ஆய்வாளர் சண்முகம் மற்றும் பெண் காவலர்கள் ஆலோசனை பெற்றனர். 

அதன்படி நேற்று (செப். 2) மாலை பெண் காவலர் பிரியா அவருடைய கணவருடன் காவல் நிலையம் வந்தார். அப்போது அவருக்கு இன்ப அதிர்ச்சியாக வளைகாப்பு நிகழ்ச்சியை துணை ஆணையாளர் சக்திவேல், உதவி ஆணையாளர் ஆதிமூலம், ஆய்வாளர் சண்முகம், குற்றப்பிரிவு ஆய்வாளர் சதீஷ், உதவி ஆய்வாளர்கள் மற்றும் பெண் காவலர்கள் ஆகியோர் நெற்றியில் திலகமிட்டும், வளையல் அணிவித்தும், ஆரத்தி எடுத்தும் பெண் காவலரை வாழ்த்தி, நிகழ்வை நடத்தி வைத்தனர்.

இறுதியில் அனைவருக்கும் ஐந்து வகை வளைகாப்பு உணவு வழங்கப்பட்டது. பின்னர் துணை ஆணையாளர் சக்திவேலிடம், காவலர் பிரியா கண்ணீர் மல்க வாழ்த்து பெற்றார். பின்னர் அனைத்து காவல் அதிகாரிகளுடன் புகைப்படம் எடுத்துக் கொண்டார்.