ହଜାର ହଜାର ଭକ୍ତଙ୍କ ମେଳରେ ପୂର୍ଣ୍ଣ ବିଗ୍ରହଙ୍କ ବାହୁଡାଯାତ୍ରା

ଖୋର୍ଦ୍ଧା: ଆଜି ବାହୁଡା ଯାତ୍ରା । ନବଦିନାତ୍ମକ ଲିଳାଖେଳା ସାରି ସିଂହଦ୍ବାର ଅଭିମୁଖେ ପହଞ୍ଚିଛନ୍ତି । ଶ୍ରୀକ୍ଷେତ୍ର ସହିତ ରାଜ୍ୟର ବିଭିନ୍ନ ସ୍ଥାନରେ ବାହୁଡା ଯାତ୍ରା ଅନୁଷ୍ଠିତ ହୋଇଛି । ଖୋର୍ଦ୍ଧା ଜିଲ୍ଲା ଜଗୁଳେଇପାଟଣାର ଅନନ୍ତ ପୁରୁଷୋତ୍ତମ କ୍ଷେତ୍ରରେ ଆଜି ହଜାର ହଜାର ଶ୍ରଦ୍ଧାଳୁଙ୍କ ଉପସ୍ଥିତିରେ ପୂର୍ଣ୍ଣ ବିଗ୍ରହଙ୍କ ବାହୁଡାଯାତ୍ରା ଅନୁଷ୍ଠିତ ହୋଇଛି । ପ୍ରାତରୁ ପ୍ରଭୁଙ୍କ ବିଭିନ୍ନ ନୀତିକାନ୍ତି ପରେ ରଥକୁ ପ୍ରତିଷ୍ଠା କରାଯାଇ ଅପରାହ୍ନରେ ଚତୁର୍ଦ୍ଧାମୂର୍ତ୍ତିଙ୍କ ପହଣ୍ଡି ହୋଇ ରଥାରୂଢ ହୋଇଥିଲେ ମହାପ୍ରଭୁ । ସେହିପରି ଦୀର୍ଘ 40ବର୍ଷ ଧରି ମହାପ୍ରଭୁଙ୍କ ଛେରା ପହଁରା କରି ଆସୁଥିବା ପୂର୍ବତନ ସାଂସଦ ପ୍ରସନ୍ନ ପାଟଶାଣୀ ଛେରାପହଁରା କରିବା ପରେ ଭକ୍ତମାନେ ମହାଆନନ୍ଦରେ ରଥକୁ ମାଉସୀ ମା’ ମନ୍ଦିରରୁ ମନ୍ଦିର ଅଭିମୁଖେ ଟାଣି ଆଣିଛନ୍ତି । ଏଠାରେ ମହାପ୍ରଭୁଙ୍କ ହାତଗୋଡ଼ ଥିବା ପୂର୍ଣ୍ଣ ବିଗ୍ରହ କାହିଁ କେଉଁ କାଳରୁ ପୂଜା ପାଇଆସୁଛନ୍ତି । ସେପଟେ ବାହୁଡା ପାଇଁ ଜିଲ୍ଲା ପ୍ରଶାସନ ପକ୍ଷରୁ ଭକ୍ତ ମାନଙ୍କ ସୁରକ୍ଷା ପାଇଁ ବିଶେଷ ଆୟୋଜନ କରାଯାଇଛି । ଇଟିଭି ଭାରତ, ଖୋର୍ଦ୍ଧା