ନବୀନ ନିବାସ ଆଗରେ ହାଇଡ୍ରାମା, ହଜିଗଲା ମନ୍ତ୍ରୀଙ୍କ ଚପଲ

ଭୁବନେଶ୍ବର: କିଏ ନେଇଗଲା ମନ୍ତ୍ରୀଙ୍କ ଚପଲ, ନା ହଜିଗଲା । ନବୀନ ନିବାସ ଆଗରେ ଚପଲ ଖୋଜିବାରେ ବ୍ୟସ୍ତ ସଂସଦୀୟ ବ୍ୟାପାରମନ୍ତ୍ରୀ ବିକ୍ରମ କେଶରୀ ଆରୁଖ । ଧାନ କିଣାରେ ଅବ୍ୟବସ୍ଥା ନେଇ ନବୀନ ନିବାସ ଆଗରେ ହାଇଡ୍ରାମା ଦେଖିବାକୁ ମିଳିଥିବା ବେଳେ, କାହାର କେଉଁ ଚିନ୍ତା କିନ୍ତୁ ମନ୍ତ୍ରୀଙ୍କ ଚାଲିଛି ଚପଲ ଖୋଜା । ବିଜେପି-ବିଜେଡି ଉଭୟ ଦଳର ବିଧାୟକ ଆଗକୁ ଆଗକୁ ମାଡି ଚାଲିଥିବା ବେଳେ ମନ୍ତ୍ରୀ କିନ୍ତୁ ଖାଲି ପାଦରେ ଚାଲି ଚାଲି ନିଜ ଚପଲ ଖୋଜୁଥିବାର ନଜର ଆସିଥିଲେ । ବିଜେପି ବିଧାୟକମାନେ ଧାନ ବିକ୍ରି ଅବବ୍ୟସ୍ଥା ନେଇ ମୁଖ୍ୟମନ୍ତ୍ରୀଙ୍କୁ ଭେଟିବା ପାଇଁ ନବୀନ ନିବାସକୁ ପ୍ରବେଶ କରିବା ସମୟରେ ସେଠାରେ ଅସମ୍ଭବ ଭିଡ ଦେଖିବାକୁ ମିଳିଥିଲା । ଏହାରି ଭିତରେ ହଟ୍ଟହଟ୍ଟାର ଶିକାର ହୋଇଛନ୍ତି ସଂସଦୀୟ ମନ୍ତ୍ରୀ ବିକ୍ରମ କେଶରୀ ଆରୁଖ । ଅସମ୍ଭବ ଭିଡ ଭିତରେ ତାଙ୍କ ପାଦରୁ ଚପଲ ବାହାରାଯାଇଥିବା ଦେଖିବାକୁ ମିଳିଥିଲା । ତେବେ କିଛି ସମୟ ପରେ ମନ୍ତ୍ରୀ ତାଙ୍କ ଚପଲ ଖୋଜି ପାଇବାରେ ସଫଳ ହୋଇଥିଲେ ।