Shocking: ଯୁବତୀଙ୍କୁ ଘୋଷାଡି ନେଲା କାର୍, ଭାଇରାଲ ହେଉଛି ଭିଡିଓ

ଜୟପୁର(ରାଜସ୍ଥାନ): ରାଜସ୍ଥାନର ହନୁମାନଗଡ ଜିଲ୍ଲାରୁ ଏକ ଭିଡିଓ ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି । ଏଥିରେ ଗୋଟିଏ କାର୍ ଜଣେ ଯୁବତୀଙ୍କୁ ଘୋଷାଡି ନେଉଥିବାର ଦେଖିବାକୁ ମିଳୁଛି । ଯୁବତୀ ଜଣକ କାର୍ ବୋନେଟ୍ ଓହଳି ଥିଲେ ଏବଂ ଡ୍ରାଇଭର୍ ଗାଡି ନ ଅଟକାଇ ତାଙ୍କୁ ଘୋଷାଡି ନେଇଥିଲା । ଏହାଦେଖି କିଛି ଲୋକେ ତାଙ୍କୁ ବଞ୍ଚାଇବାକୁ ଦୌଡି ଆସିଥିଲେ । ପୁରା ଘଟଣାର ଭିଡିଓ ସେଠାରେ ଲାଗିଥିଲା ସିସିଟିଭିରେ କଏଦ ହୋଇଛି ।  

ଘଟଣାଟି ଗତକାଲି(ବୁଧବାର) ପୂର୍ବାହ୍ନ ସମୟରେ ହନୁମାନଗଡ ଜିଲ୍ଲାର ଜଙ୍କସନ ଥାନା ନିକଟ ବସଷ୍ଟାଣ୍ଡରେ ଘଟିଥିଲା । ସିସିଟିଭି ଫୁଟେଜ ଆଧାରରେ ପୋଲିସ କାରକୁ ଟ୍ରେସ୍ କରି ମାମଲା ରୁଜୁ କରିଛି । ଜଙ୍କସନ ଥାନା ଅଧିକାରୀ ବିଷ୍ଣୁ ଖତ୍ରୀ କହିଛନ୍ତି ଯେ, ଏନେଇ ସମ୍ପୃକ୍ତ ଯୁବତୀଙ୍କ ପକ୍ଷରୁ ଥାନାରେ କୌଣସି ଅଭିଯୋଗ ହୋଇନାହିଁ । ପୋଲିସ ମାମଲା ରୁଜୁ କରି ଛାନଭିନ୍ ଚଳାଇଛି । ଭାଇରାଲ ସିସିଟିଭି ଫୁଟେଜରେ ଦେଖାଯାଇଛି, ଗୋଟିଏ କାର୍ ରାସ୍ତାରେ ଯାଉଥିବା ବେଳେ ଜଣେ ଯୁବତୀ ଆସି ସାମ୍ନାରେ ଛିଡା ହୋଇ ଯାଇଥିଲେ । କିନ୍ତୁ ଡ୍ରାଇଭର ଗାଡି ରୋକିବା ବଦଳରେ ଆଗକୁ ମାଡି ଯାଇଥିଲେ । ଏହାପରେ ଯୁବତୀ କାର୍ ବୋନେଟରେ ଓହଳି ପଡିଥିଲେ । ଯୁବତୀ ଚିତ୍କାର କରିବାରୁ ଉପସ୍ଥିତ ଲୋକେ ତାଙ୍କୁ ବଞ୍ଚାଇବାକୁ ପଛେ ପଛେ ଦୌଡିଥିଲେ  । 

ବ୍ୟୁରୋ ରିପୋର୍ଟ, ଇଟିଭି ଭାରତ