ଲଘୁଚାପ ପ୍ରଭାବରେ ପୁରୀରେ ଲଗାଣ ବର୍ଷା, ହୋଟେଲରେ ଫସିଛନ୍ତି ପର୍ଯ୍ୟଟକ

ପୁରୀ: ଲଘୁଚାପ ପ୍ରଭାବରେ ପୁରୀରେ ଆରମ୍ଭ ହୋଇଛି ବର୍ଷା । ସକାଳୁ ପ୍ରବଳ ବର୍ଷା ଲାଗିରହିଥିବାରୁ ସାଧାରଣ ଜୀବନ ଯାତ୍ରା ଠପ୍‌ ହୋଇଯାଇଛି । ପୁରୀ ସହରବାସୀ ଓ ପୁରୀକୁ ବୁଲିବାକୁ ଆସିଥିବା ପର୍ଯ୍ୟଟକ ଯାତାୟତ ଅସୁବିଧା ଭୋଗିଛନ୍ତି । ପ୍ରବଳ ବର୍ଷା ଲାଗି ରହିଥିବାରୁ ଅନେକ ପର୍ଯ୍ୟଟକ ବୁଲାବୁଲି ନ କରିପାରି ହୋଟେଲରେ ଫସି ରହିଛନ୍ତି । ଫଳରେ ଅନେକ ପର୍ଯ୍ୟଟକ ନିରାଶ ହୋଇଛନ୍ତି । ଏପଟେ ପୁରୀ ସହରର ତଳିଆ ଅଞ୍ଚଳଗୁଡିକ ଜଳମଗ୍ନ ହୋଇଛି । ବର୍ଷା ପାଣି ଜମିରହିଥିବାରୁ ତଳିଆ ଅଞ୍ଚଳରେ ଥିବା ଏକାଧିକ ୱାର୍ଡର ବାସିନ୍ଦା ଅସୁବିଧାର ସମ୍ମୁଖୀନ ହୋଇଛନ୍ତି । ସେପଟେ ପାଣିପାଗ ବିଭାଗର ସୁଚନା ଅନୁଯାୟୀ ଆହୁରି ୨ ଦିନ ପ୍ରବଳ ବର୍ଷା ଲାଗି ରହିବ । ପୁରୀ ଜିଲ୍ଲାରେ ମଧ୍ଯ ଅତି ପ୍ରବଳ ବର୍ଷା ଆଶଙ୍କା ରହିଥିବା ପାଣିପାଗ ବିଭାଗ ପକ୍ଷରୁ ପୂର୍ବରୁ ସୁଚନା ଦିଆଯାଇଛି । ଇଟିଭି ଭାରତ, ପୁରୀ