ଭୁବନେଶ୍ବରରେ ଭୟଙ୍କର ବର୍ଷା ! ରାସ୍ତାରେ ଆଣ୍ଠିଏ ଉଚ୍ଚର ପାଣି, ଲୋକେ ନାକେଦମ

ଭୁବନେଶ୍ବର: ଅସରାଏ ବର୍ଷାରେ ଭାସିଲା ରାଜଧାନୀ । କେଇ ଘଣ୍ଟା ମଧ୍ୟରେ ସହରରେ ଦେଖାଦେଲା ଜଳବନ୍ଦୀ ସମସ୍ୟା । ଆଜି ବର୍ଷାରେ ଢେର ଭିଜିଛି ଭୁବନେଶ୍ବର । କିଛି ଦିନର ଗୁଳୁଗୁଳି ପରେ ପୁଣି ମିଳିଛି ତ୍ରାହି । ପ୍ରବଳ ବର୍ଷା ଯୋଗୁଁ ରାସ୍ତା ଉପରେ ଆଣ୍ଠିଏ ଉଚ୍ଚର ପାଣି ଲହଡ଼ି ଭାଙ୍ଗୁଛି । ଡ୍ରେନ ପାଣି ଉଛୁଳି ରାସ୍ତାରେ ଭାସୁଛି । ଡ୍ରେନ୍‌ ଜାମ ଯୋଗୁଁ ବର୍ଷା ଜଳ ନିଷ୍କାସିତ ହୋଇପାରୁନାହିଁ । ଫଳରେ ସାଧାରଣ ଯାତାୟତ ଏକ ପ୍ରକାର ଠପ ହୋଇଯାଇଛି । ଲଗାତାର ଦୁଇ ଘଣ୍ଟାର ବର୍ଷା ପରେ ଭୁବନେଶ୍ବରର ବିଭିନ୍ନ ସ୍ଥାନରେ ଜଳବନ୍ଦୀ ହୋଇଥିଲା । ରାସ୍ତା ଉପରେ ଅଧାବୁଡ଼ା ଅବସ୍ଥାରେ ବହୁ ଗାଡ଼ି ରହିଛି । ଫଳରେ ଲୋକେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଆଗାମୀ ଦୁଇ ଘଣ୍ଟା ପାଇଁ ଟ୍ବିନ ସିଟି ଭୁବନେଶ୍ବର ଓ କଟକକୁ ପାଣିପାଗ ବିଭାଗ ପକ୍ଷରୁ ଆଲର୍ଟ ଜାରି କରାଯାଇଛି । 

ଇଟିଭି ଭାରତ, ଭୁବନେଶ୍ବର