ଟନେଲ୍‌ରୁ ବାହାରିବେ ନବରଙ୍ଗପୁରର ଭଗବାନ ଭତ୍ରା; ଉତ୍ସାହିତ ପରିବାର

ନବରଙ୍ଗପୁର: ଆଉ କିଛି ସମୟ ପରେ ବାହାରିବେ ଉତ୍ତରକାଶୀ ଟନେଲରେ ଫସି ରହିଥିବା ୪୧ ଶ୍ରମିକ । ଏହି ଶ୍ରମିକମାନଙ୍କ ମଧ୍ୟରେ ଓଡ଼ିଶାର ୫ ଜଣ ଥିବାବେଳେ ସେମାନଙ୍କ ମଧ୍ୟରେ ଅଛନ୍ତି ନବରଙ୍ଗପୁର ଜିଲ୍ଲା ଡ଼ାବୁଗାଁ ବ୍ଲକ୍‌ ତାଲବେଡ଼ା ଗ୍ରାମର ଭଗବାନ ଭତ୍ରା । ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ଜାରି ରହିଛି । କୌଣସି ମୁହୂର୍ତ୍ତରେ ବି ସମସ୍ତେ ବାହାରକୁ ଆସିପାରନ୍ତି । ଏହାକୁ ନେଇ ୧୨ ଦିନ ହେଲା ଚିନ୍ତାରେ ଥିବା ଭଗବାନ ଭତ୍ରାଙ୍କ ପରିବାରରେ ଉତ୍ସାହ ଖେଳିଯାଇଛି  । କେବଳ ତାଙ୍କ ଘର କାହିଁକି ପୁରା ଗାଁରେ ଉତ୍ସାହ ଓ ଉତ୍କଣ୍ଠା ଦେଖିବାକୁ ମିଳୁଛି । ସକାଳୁ ଗ୍ରାମବାସୀ ଭଗବାନଙ୍କ ଘରେ ଭିଡ଼ ଜମାଇଛନ୍ତି । ଗ୍ରାମର ମହିଳାମାନେ ମଧ୍ୟ ମୋବାଇଲ ଧରି ଖବର ଦେଖିବାରେ ବ୍ୟସ୍ତ ରହିଛନ୍ତି । କେତେବେଳେ ଟନେଲ ଭିତରୁ ଭଗବାନ ବାହାରିବେ, ତାହାକୁ ନେଇ ସମସ୍ତଙ୍କ ମନରେ ଉତ୍କଣ୍ଠା  । ସମସ୍ତେ ବୁଝି ସାରିଲେଣି କି ଆଉ କିଛି ସମୟ ପରେ ତାଙ୍କ ଗାଁର ପୁଅ ମାଟି ଅତଡ଼ା ତଳୁ ଜୀବନ ଧରି ଫେରିଆସିବେ  ।

ଇଟିଭି ଭାରତ, ନବରଙ୍ଗପୁର