WATCH: ମାଡିଗଲା ଦ୍ରୁତଗାମୀ ଟ୍ରକ୍‌, ଜୀବନ ହାରିଲେ ଟୋଲ୍‌ ପ୍ଲାଜା କର୍ମଚାରୀ

ଚେନ୍ନାଇ: ତାମିଲନାଡୁ ମଦୁରାଇ ନିକଟ ମସ୍ଥାନପଟ୍ଟି ଟୋଲପ୍ଲାଜା ନିକଟରେ ଭୟଙ୍କର ଦୃଶ୍ୟ । ଟୋଲ ପ୍ଲାଜା କର୍ମଚାରୀଙ୍କ ଉପରେ ଚଢିଗଲା ଦ୍ରୁତଗାମୀ ଟ୍ରକ୍‌ । ଏହି ଦୁର୍ଘଟଣାରେ ଜଣେ ଟୋଲ ପ୍ଲାଜା କର୍ମଚାରୀଙ୍କ ମୃତ୍ୟୁ ଘଟିଥିବା ବେଳେ ୩ ଜଣ ଲୋକ, ୨ ଜଣ ଯାତ୍ରୀ ଓ ଅନ୍ୟ ଜଣେ ମହିଳା ଟୋଲପ୍ଲାଜା କର୍ମଚାରୀ ଗୁରୁତର ଭାବେ ଆହତ ହୋଇଛନ୍ତି । ମୃତ କର୍ମଚାରୀ ଜଣକ ହେଉଛନ୍ତି ମଦୁରାଇ ଜିଲ୍ଲା ଶାଖିମଙ୍ଗଲମ ଅଞ୍ଚଳର ସତୀଶ କୁମାର ।  

ପୋଲିସର କହିବା ଅନୁସାରେ ଆନ୍ଧ୍ରପ୍ରଦେଶ କାକିନାଡାରୁ ଟ୍ରକଟି ୩୦ ଟନ୍‌ ଚାଉଳ ନେଇ କେରଳ ଅଭିମୁଖେ ଗସ୍ତ କରୁଥିଲା । ତେବେ ଗୁଣ୍ଟୁର ଅଞ୍ଚଳର ଡ୍ରାଇଭର କେ ବାଲାକ୍ରିଷ୍ଣନ (୪୧) ଟ୍ରକର ଡ୍ରାଇଭର ଥିଲେ । ଟ୍ରକଟି ବଣ୍ଡକୋଲି ନିକଟ ବ୍ରିଜରୁ ବ୍ରେକ୍‌ ଫେଲ ହୋଇଥିଲା । ଫଳରେ ନିୟନ୍ତ୍ରଣ ହରାଇ ଡ୍ରାଇଭର ଜଣକ ଟୋଲପ୍ଲାଜା ନିକଟରେ ଟ୍ରକକୁ ଅଟକାଇପାରିଲେ ନାହିଁ । ଏଣୁ ଡ୍ରାଇଭର ଜଣକ ଏକ ଗଛକୁ ଧକ୍କା ଦେଇ ଟ୍ରକକୁ ରୋକିବାକୁ ଉଦ୍ୟମ କରିଥିଲେ । ହେଲେ ରାସ୍ତାକଡ଼ରେ ଅନେକ ରେସ୍ତୋରାଁ ଥିବାରୁ ଏଥିରେ ସେ ବିଫଳ ହୋଇଥିଲେ । ଗୋଟିଏ ପଟେ ରାସ୍ତାକଡ଼ରେ ପ୍ରବଳ ଗାଡ଼ି ଜମା ହୋଇରହିଥିବାରୁ ତାକୁ ଧକ୍କା ଦେବା ପରିବର୍ତ୍ତେ ଡ୍ରାଇଭର ଜଣକ ଟୋଲପ୍ଲାଜା ଆଡ଼କୁ ଗାଡ଼ି ବୁଲାଇଥିଲେ ।  

ଏହି ସମୟରେ ମୃତ କର୍ମଚାରୀ ସତୀଶ ଦ୍ରୁତଗାମୀ ଟ୍ରକକୁ ରୋକିବାକୁ ଚେଷ୍ଟା କରି ତା' ଆଗକୁ ଚାଲିଆସିଥିଲେ । ଫଳରେ ଟ୍ରକଟି ତାଙ୍କୁ ମାଡ଼ି ଯାଇଥିଲା । ଏହି ଦୁର୍ଘଟଣାରେ ତାଙ୍କର ମୃତ୍ୟୁ ଘଟିଛି । ଏହାପରେ ବିପରୀତ ଦିଗରୁ ଆସୁଥିବା ଏକ ଯାତ୍ରାବାହୀ ଯାନକୁ ଟ୍ରକଟି ଧକ୍କା ଦେଇଥିଲା । କାରରେ ଟୋଲପ୍ଲାଜା ଅଭିମୁଖେ ଆସୁଥିବା ୨ ଜଣ ଯାତ୍ରୀଙ୍କ ସମେତ ମହିଳା ଟୋଲପ୍ଲାଜା କର୍ମଚାରୀ ମଧ୍ୟ ଆହତ ହୋଇଛନ୍ତି  ।  

ବ୍ୟୁରୋ ରିପୋର୍ଟ, ଇଟିଭି ଭାରତ