କଟକ ବସ୍ତିକୁ କାଳବୈଶାଖୀ ଭୟ, ବାତ୍ୟା ଆଶ୍ରୟ ସ୍ଥଳ ଦାବି ଉଠିଲା

କଟକ: ସିଏମସି ଆଗରେ ଗର୍ଜିଲେ ବସ୍ତି ବାସିନ୍ଦା । କାଳବୈଶାଖୀରେ ବାସିନ୍ଦାଙ୍କ ଘର ଭଙ୍ଗା ସହାୟତା ଓ ପଟ୍ଟା ସହ ସ୍ଥାୟୀ ଘର ଦାବିରେ ବସ୍ତି ବାସିନ୍ଦାଙ୍କ ମିଳିତ ମଞ୍ଚ ପକ୍ଷରୁ ସିଏମସି ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି। ଗତ ୧୯ତାରିଖ ଅପରାହ୍ନରେ ଭୟଙ୍କର ଝଡବର୍ଷାରେ ପ୍ରଶାସନ ଉଚ୍ଛେଦ କରି ରଖିଥିବା ବସ୍ତି ଓ ଅନ୍ୟାନ୍ୟ ବସ୍ତିଗୁଡିକର କିଛି ଘର ଭାଙ୍ଗିବା ଓ ଅନେକ ଘରର ଆଜବେଷ୍ଟସ୍ ଓ ଟିଣ ସିଟ୍ ଉଡିଯିବା ଦ୍ବାରା ବହୁ ଆସବାବପତ୍ର ନଷ୍ଟ ହୋଇଛି । ଯାହାକୁ ନେଇ ଆଜି ନ୍ୟାୟ ପାଇବା ପାଇଁ ଆନ୍ଦୋଳନ ପନ୍ଥା ଆପଣେଇଛନ୍ତି ବସ୍ତି ବାସିନ୍ଦା ।  

ବସ୍ତି ବାସିନ୍ଦାଙ୍କ କହିବାନୁସାରେ, ୨ବର୍ଷ ପୂର୍ବରୁ ବସ୍ତିଗୁଡିକୁ ଆଇନ ସମ୍ମତ ଉପଯୁକ୍ତ ଥଇଥାନ ନକରି ହଜାର ହଜାର ପରିବାରକୁ ନଦୀଶଯ୍ୟାରେ ବେଆଇନ ଭାବେ ଜଗତପୁର ବିରୂପା କୂଳ ନିମପୁରଠାରେ ଏବଂ କାଠଯୋଡ଼ି କୂଳ ବାଲିସାହିଠାରେ ରଖାଗଲା ।  ବସ୍ତିଗୁଡିକୁ ଆଇନ ସମ୍ମତ ଥଇଥାନ ନ କରାଯାଇ ସ୍ଥାୟୀ ଘର ନଦେବା ଫଳରେ ବସ୍ତିବାସିନ୍ଦାମାନେ ବାରମ୍ବାର ବିପର୍ଯ୍ୟୟର ସମ୍ମୁଖୀନ ହେଉଛନ୍ତି । ଆକସ୍ମିକ ଭାବେ କୌଣସି ବଡ଼ ଧରଣର ପ୍ରାକୃତିକ ବିପର୍ଯ୍ୟୟ ହେଲେ ବହୁ ଧନ ଜୀବନ ଯିବାର ଆଶଙ୍କା ରହିଛି । ବର୍ତ୍ତମାନ ସ୍ଥିତିରେ ଜଗତପୁର ନିମପୁରର ବିରୁପା କୂଳ ବସ୍ତିଗୁଡିକର ଓ କାଠଯୋଡି କୂଳ ବାଲିସାହି ବସ୍ତିଗୁଡିକର ଅନେକ ବାସିନ୍ଦା ସେମାନଙ୍କର ପିଲାଛୁଆ ଧରି ଖୋଲା ଆକାଶ ତଳେ ପ୍ରବଳ ଗ୍ରୀଷ୍ମ ପ୍ରବାହ ଭିତରେ ଅସହ୍ୟ ଯନ୍ତ୍ରଣା ଭୋଗୁଛନ୍ତି।

ଏଭଳି ଦୟନୀୟ ପରିସ୍ଥିତିରେ ବସ୍ତି ବାସିନ୍ଦାଙ୍କ ମିଳିତ ମଞ୍ଚ ପକ୍ଷରୁ ସିଏମସି ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି । ଜଗତପୁର ବିରୁପାକୂଳ ବସ୍ତି ଓ କାଠଯୋଡି କୂଳ ବାଲି ସାହି ବସ୍ତିରେ ଝଡ ବର୍ଷାରେ କେତେକ ଘର ସମ୍ପୂର୍ଣ୍ଣ ଭାଙ୍ଗି ପଡ଼ିଥିବା ବେଳେ ଅନେକ ଘରର ଆଜବେଷ୍ଟସ୍ ସିଟ ଉଡିଯାଇଥିଲା । ଫଳରେ ସମସ୍ତ ଆସବାବ ପତ୍ର ନଷ୍ଟ ହୋଇଯାଇଥିବାରୁ ସେହି କ୍ଷତିଗ୍ରସ୍ତ ପରିବାରଗୁଡିକୁ ଅବିଳମ୍ବେ ଘର ନିର୍ମାଣ ଓ ଆନୁସଙ୍ଗିକ ସହାୟତା ଯୋଗାଇ ଦେବା ଓ ଦୁଇବର୍ଷ ପୂର୍ବରୁ ପ୍ରଶାସନ ଦ୍ବାରା ବସ୍ତି ବାସିନ୍ଦାଙ୍କୁ ଉଚ୍ଛେଦ କରାଯାଇ ଜଗତପୁର ବିରୁପାକୂଳରେ ଏବଂ କାଠଯୋଡ଼ି କୂଳ ବାଲିସାହିରେ ବସ୍ତିଗୁଡିକର ରଖାଯିବା ଦିନରୁ ବାସିନ୍ଦାମାନେ ବାରମ୍ବାର ପ୍ରାକୃତିକ ବିପର୍ଯ୍ୟୟର ସମ୍ମୁଖୀଣ ହୋଇ ଆସୁଛନ୍ତି । 

ଯଥାଶୀଘ୍ର ସେମାନଙ୍କୁ ପଟ୍ଟା ପ୍ରଦାନ କରି ଆବାସ ଯୋଜନାରେ ସ୍ଥାୟୀ ଘର ନିର୍ମାଣ କରି ଯୋଗାଇ ଦେବା, କାଠଯୋଡି କୂଳ ସିଡିଏ ୧୧ରୁ ୧୩ ନମ୍ବର ପର୍ଯ୍ୟନ୍ତ ବସ୍ତିଗୁଡିକର ବହୁ କୁଡିଆ ଝଡରେ ଉଡିଯାଇଛି । ଯଥାଶୀଘ୍ର ଶ୍ରମଜୀବୀ ବସ୍ତିବାସିନ୍ଦାମାନଙ୍କୁ ସହାୟତା ଯୋଗାଇ ଦେବା ପ୍ରମୁଖ ଦାବି କରାଯାଇଛି ।  ଅନ୍ୟପଟେ ସିଏମସି କର୍ପୋରେଟର ମଧ୍ୟ ଏହି ଅବସ୍ଥାକୁ ନେଇ ସିଏମସିକୁ ଟାର୍ଗେଟ କରିଛନ୍ତି ।  ବସ୍ତି ବାସିନ୍ଦାଙ୍କ ଯଥାଶୀଘ୍ର ନ୍ୟାୟ ଦେବା ସହ ବସ୍ତି ଅଞ୍ଚଳରେ ଏକ ବାତ୍ୟା ଆଶ୍ରୟ ସ୍ଥଳ ନିର୍ମାଣ ପାଇଁ ଦାବି କରିଛନ୍ତି କର୍ପୋରେଟର ।  

ଇଟିଭି ଭାରତ, କଟକ