ଭୁବନେଶ୍ବର: ନେପାଳୀ ଛାତ୍ରୀ ମୃତ୍ୟୁ ଘଟଣା । ରାଜ୍ୟ ସରକାରଙ୍କ ଏକ ଉଚ୍ଚସ୍ତରୀୟ ଟିମ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛି । ଗୃହ ବିଭାଗ ସଚିବଙ୍କ ନେତୃତ୍ବରେ ଗଠିତ ଏହି ଟିମ ଉକ୍ତ ଘରୋଇ ବିଶ୍ବବିଦ୍ୟାଳୟ ପରିସରରେ ସମ୍ପୂର୍ଣ୍ଣ ଘଟଣାର ତଦନ୍ତ କରିଛନ୍ତି । ଛାତ୍ରଙ୍କ ସମସ୍ୟା ନେଇ ଆନ୍ତର୍ଜାତିକ ସ୍ତରରେ ଭାରତ- ନେପାଳ ମଧ୍ୟରେ ସ୍ଥିତି ସୁଧାରିବା ପାଇଁ ଚେଷ୍ଟା ଜାରି ରହିଛି । ଏନେଇ ଗଠିତ ଉଚ୍ଚସ୍ତରୀୟ କମିଟିର ବରିଷ୍ଠ ପ୍ରଶାସନିକ ଅଧିକାରୀ ଉକ୍ତ ଘରୋଇ ବିଶ୍ବବିଦ୍ୟାଳୟ ପରିସରରେ ବୁଲି ଛାତ୍ରଛାତ୍ରୀ ଓ ବିଶ୍ବବିଦ୍ୟାଳୟ କର୍ତ୍ତୃପକ୍ଷଙ୍କ ସହ ଆଲୋଚନା କରିଛନ୍ତି ।
- 'ସମସ୍ତ ରିପୋର୍ଟ ରାଜ୍ୟ ସରକାରଙ୍କ ପାଖରେ ଉପସ୍ଥାପନା କରିବୁ'
ଗୃହ ସଚିବ ସତ୍ୟବ୍ରତ ସାହୁ କହିଛନ୍ତି,"ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ଆମେ ଆସିଥିଲୁ । ଆମେ ଚାରିଆଡ଼େ ବୁଲି ଦେଖିଛୁ ଓ ଛାତ୍ରଛାତ୍ରୀଙ୍କ ସହ ଆଲୋଚନା କରିଛୁ । ଯାହା ତଦନ୍ତ କରିଛୁ ସମସ୍ତ ରିପୋର୍ଟ ରାଜ୍ୟ ସରକାରଙ୍କ ପାଖରେ ଉପସ୍ଥାପନା କରିବୁ । କେବଳ ଆମେ ନୁହେଁ ଆମ ସହିତ ନେପାଳ ଟିମ୍ ମଧ୍ୟ ବୁଲିଥିଲେ । ଆମେ ଯାହା ରିପୋର୍ଟ ଦେବୁ ସେହି ହିସାବରେ ରାଜ୍ୟ ସରକାର ଯାହା କାର୍ଯାନୁଷ୍ଠାନ ନେବେ ।"
ଏପରି କହିଲେ ପୋଲିସ କମିଶନର:
ପୋଲିସ କମିଶନର ସୁରେଶ ଦେବଦତ୍ତ ସିଂ କହିଛନ୍ତି," ବିଶ୍ବବିଦ୍ୟାଳୟରେ ଆଇନଶୃଙ୍ଖଳା ପରିସ୍ଥିତି କିପରି ରହିଛି, ତାହା ଅନୁଧ୍ୟାନ କରିଥିଲୁ ।ଆସିଥିବା ଉଚ୍ଚସ୍ତରୀୟ କମିଟି ଛାତ୍ରଛାତ୍ରୀଙ୍କ ସହ ଆଲୋଚନା କରିଛନ୍ତି । ବର୍ତ୍ତମାନ ପାଠପଢା ଜାରି ରହିଛି । ବିଭିନ୍ନ ହଷ୍ଟେଲକୁ ଯାଇ ନେପାଳୀ ଛାତ୍ରଛାତ୍ରୀଙ୍କ ସହ ଆଲୋଚନା କରାଯାଇଛି । ଯେଉଁମାନେ ଫେରି ନାହାନ୍ତି ସେମାନଙ୍କୁ ନିବେଦନ କରାଯାଇଛି, ସେମାନେ ବିଶ୍ବବିଦ୍ୟାଳୟକୁ ଫେରିବା ପାଇଁ । ନେପାଳ ଡେଲିଗେଟସ ମଧ୍ୟ ଆସିଛନ୍ତି, ସେମାନଙ୍କ ସହ ମଧ୍ୟ ଆଲୋଚନା କରାଯାଇଛି । ବିଶ୍ବବିଦ୍ୟାଳୟ କର୍ତ୍ତୃପକ୍ଷ ସହ ମଧ୍ୟ ଆଲୋଚନା କରାଯାଇଛି ।"
- ରିମାଣ୍ଡରେ ଆସିବ ଅଭିଯୁକ୍ତ:
ସେ ଆହୁରି ମଧ୍ୟ କହିଛନ୍ତି,"ନେପାଳୀ ଛାତ୍ରୀ ମୃତ୍ୟୁ ଘଟଣା ନେଇ ଯେଉଁ ରିପୋର୍ଟ ହୋଇଥିଲା । ସେହି ଆଧାରରେ ଜଣେ ବ୍ୟକ୍ତିଙ୍କୁ ଗିରଫ କରଯାଇଛି । ତା'ଠାରୁ ମୋବାଇଲ ଓ ଅନ୍ୟାନ୍ୟ ଜିନିଷ ଜବତ କରାଯାଇଛି । ପୋଲିସ ମଧ୍ୟ ବିଭିନ୍ନ ଦିଗକୁ ନେଇ ତର୍ଜମା କରୁଛି । ଗିରଫ ଅଭିଯୁକ୍ତ ଜୁଡିସିଆଲ କଷ୍ଟୋଡିରେ ଅଛି । ତାଙ୍କୁ ରିମାଣ୍ଡରେ ନେବା ପାଇଁ ତିନିଦିନ ପାଇଁ କୋର୍ଟରେ ଆବେଦନ କରଯାଇଛି । "
ଇଟିଭି ଭାରତ, ଭୁବନେଶ୍ବର
