ଚଳନ୍ତା ଟ୍ରେନରୁ ଖସି ପଡିଲେ ଯାତ୍ରୀ, ଦେବଦୂତ ସାଜିଲେ ଆରପିଏଫ ମହିଳା କନେଷ୍ଟବଳ

ହାଇଦ୍ରାବାଦ: ଚଳନ୍ତା ଟ୍ରେନରେ ଚଢିବା ସମୟରେ ଖସିପଡିଲେ ଯାତ୍ରୀ । ଯାତ୍ରୀଙ୍କ ଜୀବନ ବଞ୍ଚାଇଲେ ମହିଳା ଆରପିଏଫ କନେଷ୍ଟବଳ । ବେଗମପେଟ ରେଲଓ୍ବେ ଷ୍ଟେସନରେ ଘଟିଛି ଏପରି ଘଟଣା । ଟ୍ରେନରୁ ପଡି ଟ୍ରାକକୁ ଯିବା ପୂର୍ବରୁ ମହିଳା ଯାତ୍ରୀଙ୍କ ଜୀବନ ବଞ୍ଚାଇ ଦେଇଛନ୍ତି ମହିଳା କନେଷ୍ଟବଳ । ଯାହାର ପୁରା ଦୃଶ୍ୟ ସିସିଟିଭିରେ କଏଦ ହୋଇଛି । ମହିଳା ଆରପିଏଫ କନେଷ୍ଟବଳ ଜଣଙ୍କ ହେଉଛନ୍ତି କେ ସନିଥା । ଭିଡିଓରେ ଦେଖିବାକୁ ମଳୁଛି ଯେ, ଟ୍ରେନଟି ଚାଲୁଥିବା ସମୟରେ ଜଣେ ମହିଳା ଯାତ୍ରୀ ଚଢିବାକୁ ଚେଷ୍ଟା କରୁଛନ୍ତି । କିନ୍ତୁ ଏଥିରେ ବିଫଳ ହୋଇ ସେ ତଳେ ପଡିଯାଉଛନ୍ତି । ସେଠାରେ ଉପସ୍ଥିତ ଥିବା ମହିଳା କନେଷ୍ଟବଳ ଜଣଙ୍କ ସଙ୍ଗେ ସଙ୍ଗେ ଯାତ୍ରୀ ଜଣଙ୍କୁ ଟ୍ରେନ ନିକଟରୁ ଟାଣି ଆଣୁଛନ୍ତି । ତେବେ ଏହା ପ୍ରଥମ ଘଟଣା ନୁହଁ ପୂର୍ବରୁ ଏମିତି ଅନେକ ଖବର ସାମ୍ନାକୁ ଆସିଛି । ନିଜ ଅସାବଧାନତା କାରଣରୁ କିଛି ଯାତ୍ରୀ ଟ୍ରେନରୁ ଖସିପଡିବା ପରେ ଉପସ୍ଥିତ ଥିବା ଆରପିଏଫ ପୋଲିସ କର୍ମଚାରୀ ସେମାନଙ୍କ ଜୀବନ ବଞ୍ଚାଇଛନ୍ତି।