ବିଶ୍ବକପ ପାଇଁ ରାଉରକେଲାରେ ଫ୍ୟାନ୍ସଙ୍କ ମଧ୍ୟରେ ଉତ୍ସାହ, ଟିମ ଇଣ୍ଡିଆକୁ ଜଣାଇଲେ ଶୁଭେଚ୍ଛା

ରାଉରକେଲା: ପାଖେଇ ଆସୁଛି ସମୟ । ଆଉ ଫ୍ୟାନ୍ସଙ୍କ ମଧ୍ୟରେ ବଢିବାରେ ଲାଗିଛି ଉତ୍କଣ୍ଠା । ଆସନ୍ତାକାଲି ସୁପର ସଣ୍ଡେରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ହେବ ମହାମୁକାବିଲା । ଦୁଇ ଦଳ ପ୍ରସ୍ତୁତ ଏବଂ ସମ୍ପୂର୍ଣ୍ଣ ବିଶ୍ବ ମଧ୍ୟ ପ୍ରସ୍ତୁତ । ମାତ୍ର ଆଉ କେଇ ଘଣ୍ଟାର ଅପେକ୍ଷା । ଏହି ଦୁଇ ସୁପର ପାୱାର ଆଇସିସି କ୍ରିକେଟ ବିଶ୍ବକପ ଫାଇନାଲର ମୈଦାନକୁ ଓହ୍ଲାଇବେ । ଏନେଇ ରାଉରକେଲା ସହରର କ୍ରିକେଟ ପ୍ରେମୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି । ଅହମ୍ମଦବାଦ ସ୍ଥିତ ବିଶ୍ବର ସବୁଠୁ ବଡ଼ କ୍ରିକେଟ ଷ୍ଟାଡିୟମ ନରେନ୍ଦ୍ର ମୋଦି ଷ୍ଟାଡିୟମରେ ଖେଳାଯିବ ଫାଇନାଲ ମ୍ୟାଚ । ତେବେ କିଏ ପଡିବ କାହା ଉପରେ ଭାରି । କିଙ୍ଗ କୋହଲି, ପ୍ରିନ୍ସ ଶୁଭମନ ଏବଂ ହିଟମ୍ୟାନଙ୍କ ବଲ୍ଲା ଚାଲିବ ନା ଷ୍ଟାର୍କ ଓ ହାଜେଲଉଡଙ୍କ ବୋଲିଂରେ ନାଚିବେ ଭାରତୀୟ ଦଳ । ତେବେ ଭାରତୀୟ କ୍ରିକେଟ ଦଳ ବିଜୟୀ ହୋଇ ବହୁବର୍ଷର ସ୍ବପ୍ନ ପୂରଣ ନେଇ ବୋଲି ଆଶା ରଖିଛନ୍ତି କ୍ରିକେଟ ପ୍ରେମୀ । ଭାରତ ୨୦୦୩ ବିଶ୍ବକପ ପରାଜୟର ପ୍ରତିଶୋଧ ନେବା ଏବଂ ୨୦୨୩ ବିଶ୍ବକପ ଫାଇନାଲରେ ଏକ ଗୁରୁତ୍ବପୂର୍ଣ୍ଣ ବିଜୟ ହାସଲ କରିବାରେ ସଫଳ ହେବ ବୋଲି ଆଶା । ସେହି ପରାଜୟର କ୍ଷତ ଏବେ ବି ରହିଛି ଏବଂ ଆସନ୍ତାକାଲି ଭାରତ ପାଇଁ ପ୍ରତିଶୋଧ ନେବାର ସୁବର୍ଣ୍ଣ ସୁୟୋଗ ରହିଛି । ତେବେ ଏହି ଫାଇନାଲ ଫାଇଟ ପାଇଁ ଟିମ ଇଣ୍ଡିଆକୁ ଫ୍ୟାନ୍ସ ଶୁଭେଚ୍ଛା ଜଣାଇଛନ୍ତି ।  

ଇଟିଭି ଭାରତ, ରାଉରକେଲା