ଖୋର୍ଦ୍ଧାରେ ସିରିଜ ଦୁର୍ଘଟଣା, ଜଣେ ମୃତ

ଖୋର୍ଦ୍ଧା: ଜିଲ୍ଲା ବେଗୁନିଆ ଥାନା ଧଳାପଥର ଫାଣ୍ଡି ଅଧିନ ମେଡ଼ିକାଲ ଛକରେ ସିରିଜ ଦୁର୍ଘଟଣା । ଘଟଣାସ୍ଥଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ୫ଜଣ ଗୁରୁତର ଆହତ ହୋଇଛନ୍ତି । ତେବେ ସମସ୍ତ ଗୁରୁତରଙ୍କୁ ଖୋର୍ଦ୍ଧା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ସୂଚନା ମୁତାବକ, ଗତକାଲି ରାତି ସମୟରେ ବାଘମାରୀ ପାର୍ଶ୍ଵରୁ ଏକ ସ୍ୱିଫ୍ଟ କାର ଦ୍ରୁତଗତିରେ କଣ୍ଟିଲୋ ଅଭିମୁଖେ ଯାଉଥିଲା । କାରଟି ଭାରସାମ୍ୟ ହରାଇ ଗୋଟିଏ ପରେ ଗୋଟିଏ ଏଭଳି ୪ଟି ବାଇକ୍‌କୁ ଧକ୍କା ଦେବା ସହ ବିଦ୍ୟୁତ୍‌ ଖୁଣ୍ଟକୁ ଧକ୍କା ଦେଇ ଏକ ଦୋକାନ ଭିତରକୁ ପଶି ଯାଇଥିଲା । ଏହି ଦୁର୍ଘଟଣାରେ ନିକଟସ୍ଥ ପଥୁରିପଡ଼ା ଗ୍ରାମର ସରୋଜ କୁମାର ସାହୁଙ୍କ ମୃତ୍ୟୁ ଘଟିଛି । ଗୁରୁତରମାନଙ୍କୁ ସ୍ଥାନୀୟ ଲୋକେ ଉଦ୍ଧାର କରି ୧୦୮ ଆମ୍ବୁଲାନ୍ସ ଯୋଗେ ଖୋର୍ଦ୍ଧା ମୁଖ୍ୟ ଚିକିତ୍ସାଳୟକୁ ପଠାଇଛନ୍ତି । ସେପଟେ କାର ଚାଳକ ଘଟଣାସ୍ଥଳରୁ ଫେରାର ହୋଇଯାଇ ଥିବା ସୂଚନା ମିଳିଛି । ଅନ୍ୟପଟେ ଏନେଇ ଖବରପାଇ ଧଳାପଥର ଫାଣ୍ଡି ଅଧିକାରୀ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ଗାଡ଼ିଗୁଡିକୁ ଜବତ କରି ଘଟଣାର ଅଧିକ ତଦନ୍ତ ଜାରି ରଖିଛି । ସେହିପରି ଉଭୟ ପାର୍ଶ୍ଵରେ ଅଟକି ରହିଥିବା ଗାଡ଼ି ଚଳାଚଳ ସ୍ୱାଭବିକ ହୋଇଥିଲା ।

ଇଟିଭି ଭାରତ,ଖୋର୍ଦ୍ଧା