ବିଶ୍ବପ୍ରସିଦ୍ଧ ରଥାଯାତ୍ରା ପାଇଁ ପ୍ରସ୍ତୁତି, ନୟାଗଡ଼ରୁ ପୁରୀରେ ପହଞ୍ଚିଲା ପ୍ରଥମ ପର୍ଯ୍ୟାୟ ରଥକାଠ

FIRST PHASE TIMBER FOR RATH YATRA: ନୟାଗଡ଼/ପୁରୀ: ବିଶ୍ବପ୍ରସିଦ୍ଧ ରଥଯାତ୍ରା ପାଇଁ ପ୍ରସ୍ତୁତି ଆରମ୍ଭ, ଶ୍ରୀକ୍ଷେତ୍ରରେ ପହଞ୍ଚିଲା ପ୍ରଥମ ପର୍ଯ୍ୟାୟ ରଥକାଠ । ଚଳିତ ମହାପ୍ରଭୁ ଜଗନ୍ନାଥଙ୍କ ରଥଯାତ୍ରା ପାଇଁ ନୟାଗଡ଼ ବନଖଣ୍ଡ ପକ୍ଷରୁ ପ୍ରଥମ ପର୍ଯ୍ୟାୟ ରଥକାଠ ପରିବହନର ଶୁଭାରମ୍ଭ ହୋଇଛି । ଏଥିପାଇଁ ଦଶପଲ୍ଲା ବନାଞ୍ଚଳର ପୋଖରୀ ଗୋଛା,ଟାକେରା ସେକ୍ସନରୁ 101 ଖଣ୍ଡା କାଠ ପୁରୀକୁ ପଠାଯାଇଛି । ସେଥିମଧ୍ୟରେ ରହିଛି 48 ଖଣ୍ଡ ଅସନ, 53 ଖଣ୍ଡ ଧଉରା କାଠ ।

ତେବେ ଚଳିତ ବର୍ଷ ପୁରୀ ରଥଯାତ୍ରା ପାଇଁ 865 ଖଣ୍ଡ ଅସନ, ଧଉରା, ଶିମିଳୀ ଫାଶୀ କାଠ ଆବଶ୍ୟକ ଥିବାବେଳେ, ଗତ ବର୍ଷର 51 ଖଣ୍ଡ କାଠ ବଳକା ରହିଛି । ତେଣୁ ନୟାଗଡ଼ ବନଖଣ୍ଡକୁ 814 ଖଣ୍ଡ କାଠ ପୁରୀକୁ ପଠାଇବା ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ନିର୍ଦ୍ଦେଶ ରହିଛି । ବିଧି ଅନୁଯାୟୀ ଶ୍ରୀପଞ୍ଚମୀ ପୂର୍ବରୁ 3 ଟ୍ରିପ୍ କାଠ ନୟାଗଡ଼ ବନ ଖଣ୍ଡରୁ ସଂଗ୍ରହ କରି ପୁରୀକୁ ପଠାଇବାର ପରମ୍ପରା ରହିଛି । ଶ୍ରୀପଞ୍ଚମୀ ଦିନ ରଥଖଳା ରଥ ନିର୍ମାଣର ଅନୁକୂଳ ହେବ । ବିଧି ଅନୁଯାୟୀ ପୁରୀକୁ ରଥକାଠ ପରିବହନ ପୂର୍ବରୁ ଦଶପଲ୍ଲାର ମହାବୀର ଏବଂ ନୟାଗଡ଼ ପୁରୁଣା ସହର ଜଗନ୍ନାଥଙ୍କ ମନ୍ଦିରଆଗରେ ବନ ବିଭାଗ ପକ୍ଷରୁ ପୂଜା କରିବାରେ ରଥକାଠ ବୋଝେଇ ଟ୍ରକ୍ ପୁରୀ ଅଭିମୁଖେ ଗଡିଥାଏ ।

ଏନେଇ ନୟାଗଡ଼ DFO କ୍ଷମା ଷଡଙ୍ଗୀ କହିଛନ୍ତି," ବର୍ଷ ବିଶ୍ବ ପ୍ରସିଦ୍ଧ ରଥଯାତ୍ରା ପାଇଁ ଆମର ୮୧୪ ଖଣ୍ଡ କାଠ ପଠାଇବା ପାଇଁ ନିର୍ଦ୍ଦେଶ ରହିଛି । ସରସ୍ବତୀ ପୂଜା ପୂର୍ବରୁ ପ୍ରଥମ ପର୍ଯ୍ୟାୟରେ ୩ଟି ଟ୍ରକରେ ୧୦୧ ଖଣ୍ଡ କାଠ ପୁରୀ ପଠାଯାଉଛି । ସେଥିମଧ୍ୟରେ ରହିଛି 48 ଖଣ୍ଡ ଅସନ, 53 ଖଣ୍ଡ ଧଉରା କାଠ । ଆମର ଆହୁରି କାଠ ଚିହ୍ନଟ ପ୍ରକ୍ରିୟା ଜାରି ରହିଛି ।"

ଇଟିଭି ଭାରତ, ନାୟଗଡ଼ ଓ ପୁରୀ